ಕರಗುತ್ತಿಲ್ಲ APPU ಅಗಲಿಕೆಯ ನೋವು; ಮನೆಗೆ ಬಂದ ನಟ Ram Charan ಕೈ ಹಿಡಿದು ಕಣ್ಣೀರಿಟ್ಟ ಶಿವಣ್ಣ

ಮೊದಲು ಪುನೀತ್ ಅವರ ಸದಾಶಿವನಗರದ ಮನೆಗೆ ಭೇಟಿ ನೀಡಿದ ನಟ ರಾಮ್ ಚರಣ್, ಅಪ್ಪು ಫೋಟೋಗೆ ನಮಿಸಿದರು. ಪುನೀತ್ ಫೋಟೋ ಮುಟ್ಟಿ ನೋವು ನುಂಗಿಕೊಂಡ ಘಳಿಗೆ ಎಂಥವರ ಕಣ್ಣಾಲಿಗೆಯೂ ತೇವವಾಗುವಂತೆ ಇತ್ತು.

ಕುಟುಂಬಸ್ಥರಿಗೆ ಸಾಂತ್ವನ ಹೇಳಿದ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ರಾಮ್ ಚರಣ್, ಈ ರೀತಿ ಆಗಬಾರದಿತ್ತು. ಯಾರಿಗಾದರೂ ಆಗಿದ್ರೆ ಒಪ್ಪಬಹುದಿತ್ತು, ಆದ್ರೆ ಪುನೀತ್ ಗೆ ಅಂದ್ರೆ ನಂಬಲಾಗುತ್ತಿಲ್ಲ. ನನಗೆ ಏನು ಹೇಳಬೇಕು ಗೊತ್ತಾಗ್ತಿಲ್ಲ ಎಂದು ಕಂಬನಿ ಮಿಡಿದರು.

ನಂತರ ಮಾನ್ಯತಾ ಟೆಕ್ಪಾರ್ಕ್ ಬಳಿ ಇರುವ ಶಿವರಾಜ್ ಕುಮಾರ್ ನಿವಾಸಕ್ಕೆ ರಾಮ್ ಚರಣ್ ಭೇಟಿ ನೀಡಿದರು. ಈ ವೇಳೆ ಚರಣ್ ಕೈ ಹಿಡಿದುಕೊಂಡು ಶಿವಣ್ಣ ಕಣ್ಣೀರಿಟ್ಟ ಕ್ಷಣ ನಿಜಕ್ಕೂ ಕರುಳು ಹಿಂಡುವಂತಿತ್ತು.

ನಮ್ಮ ಮನೆಗೆ ಬಂದಾಗಲೂ ಸಹ ನಮ್ಮನ್ನೇ ಅತಿಥಿಯಂತೆ ಟ್ರೀಟ್ ಮಾಡಿದ ವ್ಯಕ್ತಿ ಪುನೀತ್. ಅವರ ಕುಟುಂಬ, ಅಭಿಮಾನಿಗಳಿಗೆ ನನ್ನ ಸಂತಾಪಗಳು. We love You Punith. ಪುನೀತ್ ಎಷ್ಟು ವಿನಯಶೀಲರಾಗಿದ್ದರು ಅಂದರೆ ಸ್ನೇಹಮಯ ವ್ಯಕ್ತಿತ್ವ ಹೊಂದಿದ್ದರು, ಸ್ನೇಹಿತರಾಗಿ ಎಲ್ಲರೊಂದಿಗೆ ಬೆರೆಯುತ್ತಿದ್ದರು. ಅವರ ಸಾವು ಸಿನಿಮಾರಂಗಕ್ಕೆ ದೊಡ್ಡ ನಷ್ಟ. ಕುಟುಂಬದವರನ್ನೇ ಕಳೆದುಕೊಂಡಷ್ಟು ನೋವಾಗ್ತಿದೆ. ಮಾನವೀಯತೆಗೆ ಇನ್ನೊಂದು ಹೆಸರೇ ಪುನೀತ್ ಎಂದು ರಾಮ್ ಚರಣ್ ಬಣ್ಣಿಸಿದರು.

ಇನ್ನು ಅಣ್ಣಾವ್ರು ಅಪಹರಣಕ್ಕೊಳಗಾದಾಗ ವೀರಪ್ಪನ್-ಸರ್ಕಾರದ ಮಧ್ಯೆ ಸಂಧಾನಕಾರನಾಗಿದ್ದ ಪತ್ರಕರ್ತ ನಕ್ಕೀರನ್ ಗೋಪಾಲ್ ಸಹ ಶಿವಣ್ಣ ಮನೆಗೆ ಭೇಟಿ ನೀಡಿ ಅಪ್ಪು ಅಗಲಿಕೆಗೆ ಸಂತಾಪ ಸೂಚಿಸಿದರು.

ಕಾಂಗ್ರೆಸ್ ಮುಖಂಡ ಈಶ್ವರ ಖಂಡ್ರೆ ಕೂಡ ಅಪ್ಪು ಮನೆಗೆ ಭೇಟಿ ನೀಡಿದರು. ಪುನೀತ್ ಅಕಾಲಿಕ ನಿಧನದಿಂದ ಮನಸಿಗೆ ತುಂಬಾ ನೋವಾಗಿದೆ. ಅವರು ಬಲಗೈ ನಲ್ಲಿ ಕೊಟ್ಟಿದ್ದು ಎಡಗೈಗೂ ತಿಳಿಯದಂತೆ ಸೇವೆ ಮಾಡ್ತಿದ್ರು. ಅವರ ಅಗಲುವಿಕೆ ತಡೆದುಕೊಳ್ಳುವ ಶಕ್ತಿ ಯನ್ನು ಅವರ ಕುಟುಂಬಕ್ಕೆ ಅಭಿಮಾನಿಗಳಿಗೆ ದೇವರು ನೀಡಲಿ. ಅವರ ಸೇವಾಕಾರ್ಯಗಳನ್ನು ಅಭಿಮಾನಿಗಳು ಅನುಸರಿಸಿಕೊಂಡು ಹೋಗಲಿ ಎಂದರು.