Divorce: ಒಬ್ಬರಿಗೆ ನೈಟ್ ಶಿಫ್ಟ್, ಇನ್ನೊಬ್ರಿಗೆ ಡೇ ಶಿಫ್ಟ್! ಹೀಗಾದ್ರೆ ಸಂಸಾರ ಹೇಗೆ ಮಾಡ್ತೀರಿ? ಬೆಂಗಳೂರು ದಂಪತಿಗೆ ಸುಪ್ರೀಂ ಪ್ರಶ್ನೆ

ಡಿವೋರ್ಸ್ ಕೋರಿ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದ ಬೆಂಗಳೂರು ಮೂಲದ ಟೆಕ್ಕಿ ದಂಪತಿಗೆ ನ್ಯಾಯಪೀಠ ಇನ್ನೊಂದು ಅವಕಾಶ ಕೊಟ್ಟಿದೆ. ಡಿವೋರ್ಸ್ ನೀಡುವಂತೆ ಕೋರಿ ಬೆಂಗಳೂರಿನ ಸಾಫ್ಟ್ವೇರ್ ಉದ್ಯೋಗಿ ದಂಪತಿ ಸುಪ್ರೀಂ ಕೋರ್ಟ್ ಮೊರೆ ಹೋಗಿದ್ದರು.

ಹಿಂದೂ ವಿವಾಹ ಕಾಯ್ದೆ 1955ರ ಸೆಕ್ಷನ್ 13ಬಿ ಅಡಿ ಕೆಲವು ನಿಯಮ ಹಾಗೂ ಷರತ್ತುಗಳಿಗೆ ಒಳಪಟ್ಟು ಪರಸ್ಪರ ಒಪ್ಪಿಗೆ ಮೇರೆಗೆ ವಿಚ್ಛೇದನ ಪಡೆದುಕೊಳ್ಳುವ ಮೂಲಕ ಮದುವೆಯನ್ನು ಮುರಿದುಕೊಳ್ಳಲು ಪರಿಹಾರ ಒಪ್ಪಂದಕ್ಕೆ ಗಂಡ ಮತ್ತು ಹೆಂಡತಿ ಇಬ್ಬರೂ ಬಂದಿದ್ದಾರೆ ಎಂದು ಅರ್ಜಿಯಲ್ಲಿ ತಿಳಿಸಲಾಗಿತ್ತು. (ಸಾಂದರ್ಭಿಕ ಚಿತ್ರ)

ಸುಪ್ರೀಂ ಕೋರ್ಟ್ ನ್ಯಾಯಮೂರ್ತಿಗಳಾದ ಕೆ.ಎಂ. ಜೋಸೆಫ್ ಮತ್ತು ಬಿ.ವಿ. ನಾಗರತ್ನ ಅವರಿದ್ದ ಪೀಠ ಅರ್ಜಿ ವಿಚಾರಣೆ ನಡೆಸಿತು. ನಿಮಗೆ ಸಂಸಾರ ನಡೆಸಲು ಸಮಯ ಎಲ್ಲಿದೆ? ನೀವಿಬ್ಬರೂ ಬೆಂಗಳೂರಿನಲ್ಲಿ ಕೆಲಸ ಮಾಡುತ್ತಿರುವ ಸಾಫ್ಟ್ವೇರ್ ಎಂಜಿನಿಯರ್ಗಳು. ಒಬ್ಬರು ಹಗಲಿನಲ್ಲಿ ಕೆಲಸಕ್ಕೆ ಹೋದರೆ ಮತ್ತೊಬ್ಬರು ರಾತ್ರಿ ಹೋಗುತ್ತೀರಿ. ಹೀಗೆ ಮಾಡಿದ್ರೆ ಸಂಸಾರ ಮಾಡುವುದು ಹೇಗೆ ಅಂತ ಕೋರ್ಟ್ ಪ್ರಶ್ನಿಸಿತು.

ನಿಮಗೆ ವಿಚ್ಛೇದನ ಬಗ್ಗೆ ಪಶ್ಚಾತ್ತಾಪವಿಲ್ಲ, ಆದರೆ ಮದುವೆ ಬಗ್ಗೆ ಪಶ್ಚಾತ್ತಾಪ ಇದೆ. ನಿಮಗೆ ಈ ಸಂಸಾರ ಸರಿಪಡಿಸಲು ಎರಡನೇ ಅವಕಾಶ ಏಕೆ ನೀಡಬಾರದು? ಎಂದು ನ್ಯಾಯಮೂರ್ತಿಗಳಾದ ಕೆಎಂ ಜೋಸೆಫ್ ಮತ್ತು ಬಿವಿ ನಾಗರತ್ನ ಅವರ ಪೀಠ ಪ್ರಶ್ನಿಸಿದೆ.

ಈ ವೇಳೆ ಪತ್ನಿಗೆ ಶಾಶ್ವತ ಜೀವನಾಂಶವಾಗಿ ಎಲ್ಲ ಹಣಕಾಸು ವಿಚಾರಗಳನ್ನು ಪೂರ್ಣ ಹಾಗೂ ಅಂತಿಮಗೊಳಿಸಲು ಒಟ್ಟು 12.51 ಲಕ್ಷ ರೂಪಾಯಿಗಳನ್ನು ನೀಡಲು ಗಂಡ ಒಪ್ಪಿಕೊಂಡಿದ್ದಾನೆ ಎಂದು ದಂಪತಿ ಪರ ವಕೀಲರು ಹೇಳಿದರು.

ಬೆಂಗಳೂರು ವಿಚ್ಛೇದನಗಳು ಹೆಚ್ಚು ಹೆಚ್ಚು ನಡೆಯುವಂತಹ ಸ್ಥಳವಲ್ಲ. ಹೀಗಾಗಿ ನೀವು ಗಂಡ ಹೆಂಡತಿ ಇಬ್ಬರೂ ಜೊತೆಯಾಗಿ ಬಾಳಲು ನಿಮಗೆ ಮತ್ತೊಂದು ಅವಕಾಶ ನೀಡಬಹುದು ಎಂದು ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ.

ಭಾರತವು 2022 ರಲ್ಲಿ ವಿಶ್ವಾದ್ಯಂತ ಕಡಿಮೆ ವಿಚ್ಛೇದನ ಪ್ರಮಾಣವನ್ನು ಹೊಂದಿದೆ, 1,000 ಜನರಿಗೆ 0.01 (1% ಕ್ಕಿಂತ ಕಡಿಮೆ) ಎಂದು ಅಂದಾಜಿಸಲಾಗಿದೆ. ಇದಲ್ಲದೆ, ದೇಶವು 2020 (0.022) ಮತ್ತು 2021 (0.077) ನಲ್ಲಿ ಕಡಿಮೆ ಜಾಗತಿಕ ವಿಚ್ಛೇದನ ದರಗಳನ್ನು ಹೊಂದಿದೆ.