Siddaramaiah- DK Shivakumar: ಸಿದ್ದು ಬಂದ್ರು, ಡಿಕೆಶಿ ಹೋದ್ರು! ‘ಟಗರು-ಬಂಡೆ’ ನಡುವೆ ಮೈಮನಸ್ಸು ವೇದಿಕೆ ಮೇಲೆಯೇ ಬಯಲಾಯ್ತಾ?

ಬೆಂಗಳೂರು: ಕಾಂಗ್ರೆಸ್ ಸರ್ಕಾರ ರಚನೆಯಾಗಿದೆ, ಪ್ರಮಾಣ ವಚನ ಸ್ವೀಕಾರವೂ ಅದ್ಧೂರಿಯಾಗಿತ್ತು. ಆದರೆ ಸಿದ್ದರಾಮಯ್ಯ, ಡಿಕೆ ಶಿವಕುಮಾರ್​ ನಡುವೆ ಒಗ್ಗಟ್ಟು ಗಟ್ಟಿ ಆಯ್ತಾ? ಅಥವಾ ಕಂದಕ ದೊಡ್ಡದಾಯಿತಾ ಅನ್ನೋ ಚರ್ಚೆ ಶುರುವಾಗಿದೆ.

ಪ್ರಮಾಣ ವಚನದ ವೇದಿಕೆಯಲ್ಲೂ ಸಿದ್ದರಾಮಯ್ಯ ಹಾಗೂ ಡಿಕೆ ಶಿವಕುಮಾರ್ ನಡುವಿನ ವೈಮನಸ್ಸು ಮುಂದುವರೆದಿದ್ಯಾ? ಇಂಥದ್ದೊಂದು ಪ್ರಶ್ನೆಯನ್ನು ವೇದಿಕೆ ಮೇಲೆ ನಡೆದ ಸನ್ನಿವೇಶ ಹುಟ್ಟು ಹಾಕಿತ್ತು.

ಹೌದು, ಪ್ರಮಾಣ ವಚನ ಕಾರ್ಯಕ್ರಮದಲ್ಲಿ ಸಿದ್ದರಾಮಯ್ಯ ಭಾಷಣ ಮಾಡುತ್ತಾರೆ ಅಂತ ಡಿಕೆ ಶಿವಕುಮಾರ್​ ಭಾಷಣ ಮಾಡುತ್ತಿದ್ದರು. ಆದರೆ ಸಿದ್ದರಾಮಯ್ಯ ಬಂದು ಡಿ.ಕೆ ಶಿವಕುಮಾರ್ ಅವ​ರನ್ನು ಸೈಡಿಗೆ ಕಳಿಸಿದರು.

ಆ ಬಳಿಕ ಡಿಕೆ ಶಿವಕುಮಾರ್ ಮಾತನಾಡುವ ಸಂದರ್ಭದಲ್ಲಿ ಮೈಕ್ ಕೈಕೊಟ್ಟಿತ್ತು. ಮೈಕ್ ಹಿಡಿದು ರಾಹುಲ್​ ಗಾಂಧಿ ಭಾಷಣ ಮಾಡಲಿದ್ದಾರೆ ಎಲ್ಲರೂ ಸುಮ್ಮನಿರಿ ಎಂದು ಹೇಳುತ್ತಿದ್ದರು. ಆದರೆ ಮೈಕ್​ ಕೈಕೊಟ್ಟಿತ್ತು. ಇದರಿಂದ ಡಿಕೆ ಶಿವಕುಮಾರ್​ ಪೇಚಿಗೆ ಸಿಲುಕಿ ರಿಪೇರಿಗೂ ಕೈಹಾಕಿದ್ದರು. ಅಷ್ಟರಲ್ಲಿ ರಾಹುಲ್​ ಗಾಂಧಿ ಅವರೇ ಭಾಷಣ ಶುರು ಮಾಡಿದ್ದರು.

ಪರಂ ಕಿವಿಹಿಂಡಿದ ಸಿದ್ದರಾಮಯ್ಯ; ಇನ್ನು ಇಂದಿನ ಪ್ರಮಾಣ ವಚನದ ವೇದಿಕೆಗೆ ಬಂದ ಸಿದ್ದರಾಮಯ್ಯ ಅವರಿಗೆ ಎಲ್ಲರೂ ನಮಸ್ಕರಿಸುತ್ತಿದ್ದರು. ಮಾಜಿ ಡಿಸಿಎಂ ಪರಮೇಶ್ವರ್ ಅವರು ಕೂಡ ಸಿದ್ದರಾಮಯ್ಯ ಅವರಿಗೆ ನಮಸ್ಕರಿಸಿದರು. ಆದರೆ ಈ ವೇಳೆ ನಗುತ್ತಲೇ ಸಿದ್ದರಾಮಯ್ಯ ಅವರು ಪರಮೇಶ್ವರ್ ಅವರ ಕಿವಿಹಿಡಿದ ವಿಡಿಯೋ ವೈರಲ್​​​ ಆಗಿದೆ.

ಉಳಿದಂತೆ ಪ್ರಮಾಣವಚನ ಸ್ವೀಕರಿಸಿದ ಸಿದ್ದರಾಮಯ್ಯ ಮತ್ತು ಡಿಕೆ ಶಿವಕುಮಾರ್ ಅವರು ನೇರವಾಗಿ ವಿಧಾನಸೌಧಕ್ಕೆ ಆಗಮಿಸಿದ್ದರು. 5 ವರ್ಷದ ಬಳಿಕ ಮತ್ತೆ ಸಿಎಂ ಆಗಿ ಸಿದ್ದರಾಮಯ್ಯ ವಿಧಾನಸೌಧಕ್ಕೆ ಪ್ರವೇಶ ಕೊಟ್ಟ ವೇಳೆ ಪದಗ್ರಹಣದ ಬಳಿಕ ಝೀರೋ ಟ್ರಾಫಿಕ್​​ನಲ್ಲಿ ಆಗಮಿಸಿದ್ದರು. ಈ ವೇಳೆ ಸಿಬ್ಬಂದಿ ಶಾಲು ಹೊದಿಸಿ, ಹಾರ ಹಾಕಿ ಸ್ವಾಗತಿಸಿದ್ದರು.

ಇದೇ ವೇಳೆ ಉಪ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್ ವಿಧಾನಸೌಧ ಪ್ರವೇಶಕ್ಕೂ ಮುನ್ನ ಶಕ್ತಿಸೌಧದ ಮೆಟ್ಟಿಲುಗಳಿಗೆ ತಲೆ ಬಾಗಿ, ಮೊಣಕಾಲೂರಿ ನಮಸ್ಕರಿಸಿದ್ದು ಎಲ್ಲರ ಗಮನ ಸೆಳೆಯಿತು.