ಬೆಳ್ತಂಗಡಿಯಲ್ಲಿ‌ ನಿಧಿ ಪತ್ತೆಯಾದ ವದಂತಿ; ರೈತನ ಗದ್ದೆಯಲ್ಲಿ ಗುಂಡಿ ತೋಡಿದ ಪೊಲೀಸರು

ಬೆಳ್ತಂಗಡಿ ತಾಲೂಕಿನ ನಡ ಗ್ರಾಮದ ಹೊಲದಲ್ಲಿ ನಿಧಿ ಇರುವ ಬಗ್ಗೆ ಶಂಕೆ ವ್ಯಕ್ತವಾಗಿದೆ. ಹೊಲದ ನಡುವೆ ಭೂಮಿ ಕುಸಿದಿದ್ದು, ಈ ಜಾಗದಲ್ಲಿ ನಿಧಿ ಇದೆ ಎಂದು ಗ್ರಾಮಸ್ಥರು ಅನುಮಾನ ವ್ಯಕ್ತಪಡಿಸಿದ್ದಾರೆ.

ಬೆಳ್ತಂಗಡಿ ತಾಲೂಕಿನ ನಡ ಗ್ರಾಮ ಪಂಚಾಯತ್ ವ್ಯಾಪ್ತಿಯ ಬರಾಯ ಕನ್ಯಾಡಿ ಗ್ರಾಮದ ಪಣಿತ್ತಡಿ ನಿವಾಸಿ ಆನಂದ ಶೆಟ್ಟಿ ಎಂಬುವವರಿಗೆ ಸೇರಿದ ಪ್ರದೇಶ ಇದಾಗಿದ್ದು ಕಳೆದ ಒಂದು ತಿಂಗಳ ಹಿಂದೆ ಹೊಲದಲ್ಲಿ ಬೋರ್ ವೇಲ್ ಕೊರೆಸಿದ್ದರು.

ಬೋರ್​​​ವೆಲ್​ಗೆ ಪೈಪ್ ಅಳವಡಿಸುವ ವೇಳೆ ಹೊಂಡವೊಂದು ಪತ್ತೆಯಾಗಿದ್ದು, ಹೊಂಡ ಕೆಲ ದಿನವಾಗುತ್ತಿದ್ದಂತೆಯೇ ಆಳವಾಗಿ ಕುಸಿಯಲಾರಂಭಿಸಿದೆ. ಸುಮಾರು ಹತ್ತು ಅಡಿ ಆಳದಷ್ಟು ಭೂಮಿ ಕುಸಿದಿದ್ದು, ಇದರಲ್ಲಿ ಗ್ರಾಮದ ದೈವಗಳಿಗೆ ಸೇರಿದ ಭಂಡಾರದ ನಿಧಿ ಇರುವ ಬಗ್ಗೆ ಸಂಶಯ ಗ್ರಾಮಸ್ಥರದ್ದಾಗಿದೆ.

ಆನಂದ ಶೆಟ್ಟಿಯವರ ಜಮೀನಿನ ವಿಡಿಯೋವನ್ನು ಸ್ಥಳೀಯ ಯುವಕನೊಬ್ಬ ಮೊಬೈಲ್​ನಲ್ಲಿ ಸೆರೆಹಿಡಿದು ಪುತ್ತೂರು ಉಪವಿಭಾಗಾಧಿಕಾರಿಗೆ ರವಾನಿಸಿದ್ದರು. ವಿಡಿಯೋ ಗಮನಿಸಿದ ಪುತ್ತೂರು ಎಸಿಯವರು ಘಟನೆಯ ಕುರಿತು ತನಿಖೆ ನಡೆಸುವಂತೆ ಬೆಳ್ತಂಗಡಿ ತಹಶೀಲ್ದಾರ್ ಮಹೇಶ್​​ ರವರಿಗೆ ಸೂಚನೆ ನೀಡಿದ್ದರು.

ಈ ಹಿನ್ನಲೆಯಲ್ಲಿ ನಡ ಗ್ರಾಮ ಪಂಚಾಯತ್ ಗ್ರಾಮ ಲೆಕ್ಕಾಧಿಕಾರಿ ಸ್ಥಳ ಪರಿಶೀಲನೆ ಮಾಡಿದ್ದಾರೆ. ಆದರೆ ಸ್ಥಳೀಯರು ನಿಧಿ ಇರುವ ಬಗ್ಗೆ ಬಲವಾಗಿ ಸಂಶಯ ವ್ಯಕ್ತಪಡಿಸಿದ ಹಿನ್ನಲೆಯಲ್ಲಿ ನಿಧಿ ಶೋಧನೆ ಮಾಡುವಂತೆ ಬೆಳ್ತಂಗಡಿ ತಹಶೀಲ್ದಾರ್ ಮಹೇಶ್ ಸೂಚನೆ ನೀಡಿದ್ದಾರೆ.

ಬೆಳ್ತಂಗಡಿ ಎಸ್ ಐ ನಂದ ಕುಮಾರ್ ನೇತೃತ್ವದ ತಂಡ ಸ್ಥಳ ಪರಿಶೀಲನೆ ಮಾಡಿದ್ದು ಹಿಟಾಚಿ ಮೂಲಕ ಹೊಲದಲ್ಲಿರುವ ನಿಧಿಯ ಸತ್ಯಶೋಧನೆಗಿಳಿದಿದ್ದಾರೆ. ಸ್ಥಳದಲ್ಲಿ ಗ್ರಾಮಸ್ಥರು ಸೇರಿದಂತೆ ನೂರಾರು ಮಂದಿ ಸೇರಿದ್ದಾರೆ.

ಆದರೆ ಜಮೀನು ಮಾಲಕ ಆನಂದ ಶೆಟ್ಟಿಯವರ ಪ್ರಕಾರ ಈ ಹಿಂದೆ ಹೊಲದ ಮಧ್ಯೆ ತಾಳೆಮರ ಇತ್ತು. ಅದನ್ನು ತೆರವುಗೊಳಿಸುವಾಗ ಮಣ್ಣು ಕುಸಿತಗೊಂಡಿದ್ದು, ಯಾವುದೇ ನಿಧಿ ಇಲ್ಲ. ನಿಧಿ ಇರುವ ಸುದ್ದಿ ಸಂಪೂರ್ಣ ವದಂತಿಯಾಗಿದೆ ಅಂತ ಜಮೀನು ಮಾಲಕ ಆನಂದ ಶೆಟ್ಟಿ ಸ್ಪಷ್ಟೀಕರಣ ನೀಡಿದ್ದಾರೆ.

ನಿಧಿ ಇದ್ದರೂ ಅದನ್ನು ಹೊರತೆಗೆಯುವಂತಿಲ್ಲ, ಅದು ಗ್ರಾಮದ ದೈವಗಳ ಭಂಡಾರದ ಸ್ವತ್ತಾಗಿದ್ದು, ಹೊರಗೆ ತೆಗೆದರೂ ಊರಿಗೆ ದೈವಗಳ ಶಾಪ ತಟ್ಟಬಹುದು ಎನ್ನುವುದು ಕೆಲ ಸ್ಥಳೀಯರ ವಾದವಾಗಿದೆ. ಸ್ವತಃ ಜಾಗದ ಮಾಲಕರೇ ಈ ಸುದ್ದಿ ವದಂತಿ ಎಂದು ಹೇಳಿದ್ರೂ ಪೊಲೀಸರು ಮಾತ್ರ ಸತ್ಯಶೋಧನೆಗಿಳಿದಿದ್ದಾರೆ. ವದಂತಿಯನ್ನು ನಂಬಿ ರೈತನ ಹೊಲದಲ್ಲಿ ಹೊಂಡ ತೋಡಿದ ಪೊಲೀಸರು ನಿಧಿ ಸಿಗದಿದ್ದಲ್ಲಿ ಮಾತ್ರ ಬಂದ ದಾರಿಗೆ ಸುಂಕ ಇಲ್ಲ ಎಂದು ಬರೀ ಕೈಯಲ್ಲಿ ಹೋಗಬೇಕಾಗಿದೆ.