Mysore Palace: ತಾಜ್ ಮಹಲ್​ ಹಿಂದಿಕ್ಕಿದೆ ಮೈಸೂರು ಅರಮನೆ, ‘ಅಂಬಾ ವಿಲಾಸ’ಕ್ಕೆ ವಿಶ್ವ ಮನ್ನಣೆ

ಜಗತ್ತಿನ ಅಸಂಖ್ಯಾತ ಪ್ರವಾಸಿಗರನ್ನು ಸೆಳೆಯುತ್ತಿರುವ ಆಗ್ರಾದ ತಾಜ್ ಮಹಲ್​ಗಿಂತ ಮೈಸೂರು ಅರಮನೆಯು ಹೆಚ್ಚು ಪರಾಮರ್ಶೆಗೊಳಪಟ್ಟಿದೆ. ಅತ್ಯಧಿಕ ಪರಾಮರ್ಶೆಗೊಳಪಟ್ಟ ಪ್ರವಾಸಿ ತಾಣಗಳಲ್ಲಿ ವಿಶ್ವದಲ್ಲೇ ಮೈಸೂರು ಅರಮನೆಯು 15ನೇ ಸ್ಥಾನದಲ್ಲಿದೆ.

ಗೂಗಲ್ ಮ್ಯಾಪ್​ನಲ್ಲಿ ಹೆಚ್ಚು ಪರಾಮರ್ಶಿತವಾದ (ಮೋಸ್ಟ್ ರಿವ್ಯೂವ್ಡ್) ಅಗ್ರ 20 ತಾಣಗಳ ಪಟ್ಟಿಯನ್ನು www.top,rated.online ವೆಬ್ ಸೈಟ್ ಪ್ರಕಟಿಸಿದ್ದು, ಅರಮನೆಗೆ 1.93 ಲಕ್ಷ ಪ್ರೇಮಸೌಧ ತಾಜ್ ಮಹಲ್​ಗೆ 1.87 ಲಕ್ಷ ಪರಾಮರ್ಶೆ ದೊರಕಿದೆ.

ಮೆಕ್ಕಾದ ಮಸೀದ್ ಅಲ್ ಹರಮ್ ಮೊದಲ ಸ್ಥಾನ ಪಡೆದಿದ್ದು, 3.31 ಲಕ್ಷ ಪರಾಮರ್ಶೆಗಳು ಲಭಿಸಿವೆ. ಮುಂಬೈನ ಗೈಟ್ ವೇ ಆಫ್ ಇಂಡಿಯಾ (2.58 ಲಕ್ಷ ಪರಮಾರ್ಶೆ) 5ನೇ ಸ್ಥಾನ ಹಾಗೂ ನವದೆಹಲಿಯ ಇಂಡಿಯಾ ಗೇಟ್ (2.01 ಲಕ್ಷ ಪರಾಮರ್ಶೆ) 14ನೇ ಸ್ಥಾನ ಗಳಿಸಿದೆ.

ದಸರೆ, ಮಾಗಿ ಉತ್ಸವ , ಯುಗಾದಿ ಸಂಗೀತ, ಯೋಗ ದಿನ ಸೇರಿ ಅರಮನೆಯಲ್ಲಿ ವರ್ಷಕ್ಕೆ 4ನೇ ಕಾರ್ಯಕ್ರಮ ಆಯೋಜಿಸುತ್ತೇವೆ. ವಾರದಲ್ಲಿ 6 ದಿನ ಧ್ವನಿ ಮತ್ತು ಬೆಳಕು ಕಾರ್ಯಕ್ರಮ ನಡೆಯುತ್ತಿದ್ದು, ಪ್ರವಾಸಿಗರಿಗೆ ಬಹಳ ಇಷ್ಟವಾಗುತ್ತಿದೆ ಎಂದ ಅರಮನೆ ಮಂಡಳಿ ಉಪನಿರ್ದೇಶಕ ಟಿ.ಎಸ್ ಸುಬ್ರಮಣ್ಯ ತಿಳಿಸಿದ್ದಾರೆ.

ಅಂಬಾ ವಿಲಾಸ್ ಅರಮನೆ ಮೈಸೂರು ನಗರದಲ್ಲಿರುವ ಅನೇಕ ಅರಮನೆಗಳಲ್ಲಿ ಮುಖ್ಯವಾದ ಅರಮನೆಯಾಗಿದೆ. ಮೈಸೂರನ್ನು ಅರಮನೆಗಳ ನಗರಿ ಎಂದೇ ಕರೆಯಲಾಗುತ್ತದೆ. ಮೈಸೂರು ಅರಮನೆ ಎನ್ನುವಾಗ ಸಾಮಾನ್ಯವಾಗಿ ಮುಖ್ಯ ಅರಮನೆಯಾದ ಅಂಬಾ ವಿಲಾಸವನ್ನು ಮುಖ್ಯವಾಗಿ ಹೇಳಲಾಗುತ್ತದೆ.

ಚಚ್ಚೌಕದ ಕಂಬಗಳು, ಮೇಲೆ ಸುಂದರ ವಿನ್ಯಾಸದ ಗೋಪುರ, ವಿಶಾಲವಾದ ಮೈದಾನ, ಸುಂದರ ಹಾಗೂ ಮನಮೋಹಕ ಶಿಲ್ಪಗಳಿಂದ, ನುಣುಪಾದ ನೆಲಹಾಸು, ಗಾಜಿನ ಅಲಂಕಾರಿಕ ವಿನ್ಯಾಸದಿಂದ ಕೂಡಿದ ದರ್ಬಾರ್ ಹಾಲ್, ಅರಮನೆಯ ಸುತ್ತ ಇರುವ ಸಿಂಹ ಲಾಂಛನಗಳು ಪ್ರವಾಸಿಗರನ್ನು ಕೈ ಬೀಸಿ ಕರೆಯುತ್ತದೆ.

ದಿನನಿತ್ಯ ದೀಪಾಲಂಕಾರದಿಂದ ಕಂಗೊಳಿಸುವ ಅರಮನೆಗೆ ದಸರಾ ವೇಳೆ ವಿಶೇಷ ಅಲಂಕಾರ ಮಾಡಲಾಗುತ್ತದೆ. ಮೈಸೂರು ಅರಮನೆಯು 97 ಸಾವಿರಕ್ಕೂ ಹೆಚ್ಚು ವಿದ್ಯುತ್ ದೀಪಗಳಿಂದ ಅಲಂಕರಿಸಲಾಗಿದ್ದು, ರಾತ್ರಿಯ ಹೊತ್ತು ವಿದ್ಯುತ್ ದೀಪಾಲಂಕಾರಗಳಿಂದ ಗತವೈಭವ ಮೆರೆಯುತ್ತದೆ.