ನಿಯಮ ವಿಧಿಸಿ ಮರೆತ ಮೇಯರ್​ಗೆ ಬಿತ್ತು 500 ರೂ. ದಂಡ..!

ಬೆಂಗಳೂರು ಮಹಾನಗರ ಪಾಲಿಕೆಯ ಎಲ್ಲ 198 ವಾರ್ಡ್​ಗಳಲ್ಲೂ ಪ್ಲಾಸ್ಟಿಕ್​ಗೆ ನಿಷೇಧ ಹೇರಳಾಗಿದೆ. ಈ ಹೊಸ ನಿಯಮವು ಜುಲೈ ತಿಂಗಳಿನಿಂದ ಜಾರಿಗೆ ಬಂದಿದ್ದು, ಇದರ ಮೀರಿ ಪ್ಲಾಸ್ಟಿಕ್ ಕವರ್ ಅಥವಾ ಪ್ಲಾಸ್ಟಿಕ್ ವಸ್ತುಗಳನ್ನು ಮಾರಾಟ ಹಾಗೂ ಬಳಕೆ ಮಾಡುವುದು ಕಂಡು ಬಂದರೆ ದಂಡ ವಿಧಿಸುವುದಾಗಿ ಬಿಬಿಎಂಪಿ ಮೇಯರ್ ಗಂಗಾಬಿಕೆ ಕೆಲ ದಿನಗಳ ಹಿಂದೆ ಎಚ್ಚರಿಸಿದ್ದರು.

ಆದರೆ ಪ್ಲಾಸ್ಟಿಕ್ ನಿಷೇಧಕ್ಕೆ ಪಣತೊಟ್ಟಿದ್ದ ಮೇಯರ್ ಅವರೇ ಖುದ್ದು ಪ್ಲಾಸ್ಟಿಕ್ ಬಳಕೆ ಮಾಡಿ ಇದೀಗ ದಂಡ ಕಟ್ಟಿದ ಘಟನೆ ನಡೆದಿದೆ. ಕರ್ನಾಟಕದ ನೂತನ ಮುಖ್ಯಮಂತ್ರಿಯಾಗಿ ಬಿ.ಎಸ್​ ಯಡಿಯೂರಪ್ಪ ಪ್ರಮಾಣವಚನ ಸ್ವೀಕರಿಸಿದ್ದರು. ಹೊಸ ಸಿಎಂರನ್ನು ಭೇಟಿ ಮಾಡಿದ ಮೇಯರ್ ಗಂಗಾಬಿಕೆ ಶುಭಾಶಯದೊಂದಿಗೆ ಡ್ರೈಫ್ರೂಟ್ಸ್ ಬುಟ್ಟಿಯೊಂದನ್ನು ನೀಡಿದ್ದರು. ಈ ಬುಟ್ಟಿಯ ಮೇಲ್ಬಾಗವನ್ನು ಪ್ಲಾಸ್ಟಿಕ್ ಕವರ್​ನಿಂದ ಮುಚ್ಚಲಾಗಿತ್ತು.

ಈ ಭೇಟಿಯ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದಲ್ಲದೇ, ಮಹಾನಗರ ಪಾಲಿಕೆಯ ಮೇಯರ್ ಪ್ಲಾಸ್ಟಿಕ್ ಬಳಸಿದ್ದಾರೆಂಬ ಆರೋಪಗಳು ಕೇಳಿ ಬಂದಿದ್ದವು. ಇದರಿಂದ ಎಚ್ಚೆತ್ತ ಮೇಯರ್ ನಿಯಮ ಉಲ್ಲಂಘಿಸಿದಕ್ಕಾಗಿ 500 ರೂ ದಂಡ ಕಟ್ಟಿದ್ದಾರೆ.

ನಿಮಯ ಮೀರಿರುವುದಕ್ಕೆ ಕ್ಷಮೆಯಾಚಿಸಿದ ಮೇಯರ್ ಗಂಗಾಬಿಕೆ ಬಿಬಿಎಂಪಿ ಆರೋಗ್ಯ ಇಲಾಖೆಗೆ ತೆರಳಿ ದಂಡ  ಕಟ್ಟಿದರು.