PHOTOS: ವಿಶ್ವಾಸಮತಯಾಚನೆ ಮೇಲಿನ ಚರ್ಚೆ; ಸದನದಲ್ಲಿ ಕಂಡುಬಂದ ಅಪರೂಪದ ಚಿತ್ರಗಳು!

“ವಿರೋಧ ಪಕ್ಷದ ನಾಯಕರಾದ ಬಿ.ಎಸ್. ಯಡಿಯೂರಪ್ಪ ವಿಶ್ವಾಸಮತಕ್ಕೆ ಅವಸರ ಮಾಡುತ್ತಿದ್ದಾರೆ. ಆದರೆ, ಈ ಕುರಿತ ಚರ್ಚೆಯಾಗದೆ ತೀರ್ಮಾನ ತೆಗೆದುಕೊಳ್ಳುವುದು ಸರಿ ಅಲ್ಲ. ಅಧಿಕಾರ ಶಾಶ್ವತ ಅಲ್ಲ, ನಾವು ಇಲ್ಲಿ ಗೂಟ ಹೊಡ್ಕಂಡು ಕೂತಿಲ್ಲ. ಆದರೆ, 14 ತಿಂಗಳ ಸುಭದ್ರ ಸರ್ಕಾರವನ್ನು ಅಸ್ಥಿರಗೊಳಿಸಲು ಪ್ರಯತ್ನಿಸಿದವರು ಯಾರು? ಇಂದು ಜನ ಅಸಹ್ಯಕರ ರಾಜಕೀಯವನ್ನು ನೋಡಲು ಕಾರಣ ಯಾರು? ಎಂಬ ಕುರಿತು ಚರ್ಚೆ ಆಗಲೇಬೇಕು. ಚರ್ಚೆಯಾಗದೆ ಬಹುಮತಕ್ಕೆ ನಾವು ಆಸ್ಪದ ನೀಡುವುದಿಲ್ಲ” ಎಂದು ಸಿಎಂ ಕುಮಾರಸ್ವಾಮಿ ತಿಳಿಸಿದರು

ನಿಯಾಮಾವಳಿ 350ರ ಪ್ರಕಾರ ಸದನದಲ್ಲಿ ಸ್ಪೀಕರ್​ ಮಾತಿಗೆ ಕ್ರಿಯಾಲೋಪ ಪ್ರಸ್ತಾಪ ಮಾಡಿ ಮಾತನಾಡಿದ ಸಿದ್ದರಾಮಯ್ಯ, "ಪಕ್ಷಾಂತರದಿಂದಾಗಿ ಮೌಲ್ಯಾಧಾರಿತ ರಾಜಕಾರಣ ಇಂದು ಹಳ್ಳ ಹಿಡಿದಿದೆ. ವಿಪ್ ಜಾರಿಮಾಡುವ ನಮ್ಮ ಅಧಿಕಾರವನ್ನೂ ಸಹ ಸುಪ್ರೀಂ ಕೋರ್ಟ್ ಕಸಿದುಕೊಂಡಿದೆ" ಎಂದು ಸುಪ್ರೀಂ ಆದೇಶದ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದರು.

ಮೈತ್ರಿಪಕ್ಷ ನಾಯಕರ ಕ್ರಿಯಾ ಲೋಪ ಪ್ರಸ್ತಾಪಕ್ಕೆ ಬಿಜೆಪಿ ಸದಸ್ಯರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. ವಿಶ್ವಾಸ ಮತ ಯಾಚನೆಯ ಗೊತ್ತುವಳಿ ಮೇಲೆ ಚರ್ಚೆ ಪ್ರಾರಂಭವಾದ ನಂತರ ಪಾಯಿಂಟ್ ಆಫ್ ಆರ್ಡರ್ ಎತ್ತಿರುವುದು ಸರಿಯಲ್ಲ ಎಂದು ಜಗದೀಶ್ ಶೆಟ್ಟರ್ ಹೇಳಿದರು. ಮಾಧುಸ್ವಾಮಿ, ಸುರೇಶ್ ಕುಮಾರ್ ಮೊದಲಾದ ಬಿಜೆಪಿ ಸದಸ್ಯರೂ ಕೂಡ ಇದನ್ನು ಪುನರುಚ್ಚರಿಸಿದರು. ಪಾಯಿಂಟ್ ಆಫ್ ಆರ್ಡರ್ ಮೇಲೆ ಚರ್ಚೆ ನಡೆಸುವ ಮೂಲಕ ವಿಶ್ವಾಸ ಮತಯಾಚನೆಯನ್ನು ವಿಳಂಬ ಮಾಡಲಾಗುತ್ತಿದೆ ಎಂಬುದು ಬಿಜೆಪಿ ಸದಸ್ಯರ ಆಕ್ಷೇಪ.

ಶ್ರೀಮಂತ ಪಾಟೀಲ್​​ ಸದನಕ್ಕೆ ಹಾಜರಾಗುತ್ತೇನೆ ಎಂದರೂ ಬಿಜೆಪಿ ಬಿಡುತ್ತಿಲ್ಲ. ಇಂಡಿಗೋ ವಿಮಾನದಲ್ಲಿ ಕರೆದೊಯ್ದು ಮುಂಬೈ ಆಸ್ಪತ್ರೆಯಲ್ಲಿ ದಾಖಲು ಮಾಡಿದ್ದಾರೆ. ಮಲಗಿರೋ ತರ ಫೋಟೊ ಹೊಡೆದು ಫೋಟೊ ರಿಲೀಸ್ ಮಾಡಿದ್ದಾರೆ. ತಾನು ಆರೋಗ್ಯವಾಗಿದ್ದೇನೆ ಎಂದು ಹೇಳಿದರೂ, ಬಲವಂತವಾಗಿ ಅಪಹರಿಸಲಾಗಿದೆ. ಹಾಗಾಗಿ ನೀವು ಈ ವಿಚಾರದಲ್ಲಿ ಮಧ್ಯ ಪ್ರವೇಶಿಸಬೇಕು. ಕಾಂಗ್ರೆಸ್​​ ಶಾಸಕರಿಗೆ ರಕ್ಷಣೆ ಕೊಡಿಸಬೇಕು ಎಂದು ಸ್ಪೀಕರ್​​ಗೆ ಸಚಿವ ಡಿ.ಕೆ ಶಿವಕುಮಾರ್​​ ಮನವಿ ಮಾಡಿದ್ದಾರೆ

ಸದನದಲ್ಲಿ ವಿರಾಮದ ವೇಳೆ ಪರಸ್ಪರ ಚರ್ಚೆ ನಡೆಸಿದ ಶ್ರೀರಾಮುಲು, ಡಿ.ಕೆ. ಶಿವಕುಮಾರ್.

ಗುರುವಾರ ಅಧಿವೇಶನದಲ್ಲಿ ಬಹುಮತ ಸಾಬೀತಿನ ಮೇಲೆ ಬೆಳಗಿನಿಂದ ನಿರಂತರವಾಗಿ ಚರ್ಚೆ ನಡೆಯುತ್ತಿದೆ. ಆದರೆ, ಸರ್ಕಾರ ಬಹಮತ ಸಾಬೀತಿಗೆ ವಿಳಂಬನೀತಿ ಅನುಸರಿಸುತ್ತಿದೆ ಎಂದು ವಿರೋಧ ಪಕ್ಷಗಳ ಟೀಕೆಯ ನಡುವೆ, ಸ್ಪೀಕರ್​ ರಮೇಶ್ ಕುಮಾರ್ ಅವರಿಗೆ ಸಂದೇಶ ಕಳಿಸಿರುವ ರಾಜ್ಯಪಾಲ ವಜುಭಾಯ್ ವಾಲಾ ಆಡಳಿತ ಪಕ್ಷ ಇಂದೇ ಬಹುಮತ ಸಾಬೀತುಪಡಿಸಲಿ ಎಂದು ಸೂಚಿಸುವ ಮೂಲಕ ಕುತೂಹಲ ಮೂಡಿಸಿದ್ದಾರೆ.

ಕಾಗವಾಡ ಕಾಂಗ್ರೆಸ್ ಶಾಸಕ ಶ್ರೀಮಂತ ಪಾಟೀಲ್​ ಅವರನ್ನು ಬಿಜೆಪಿಯವರೇ ಕಿಡ್ನಾಪ್​​ ಮಾಡಿದ್ದಾರೆ. ಈಗಲೇಬೇಕಾದರೆ ನಾನು ಅಪಹರಣದ ದಾಖಲೆ ಕೊಡಬಲ್ಲೇ" ಎಂದು ಅವರ ಚಿತ್ರ ವಿಡಿದು ಮೈತ್ರಿ ಪಕ್ಷದ ಶಾಸಕರು ಪ್ರದರ್ಶಿಸಿದರು.

ವಿಶ್ವಾಸ ಮತ ಯಾಚನೆ ವೇಳೆ ನಡೆದ ಗದ್ದಲದಿಂದ ಸ್ಪೀಕರ್​ ನಾಳೆಗೆ ಸದನವನ್ನು ಮುಂಡೂಡಿದೆ. ಅವಿಶ್ವಾಸ ನಿರ್ಣಯದಲ್ಲಿ​ ವಿಳಂಬ ನೀತಿ ಮಾಡಲಾಗಿದೆ ಎಂದು ಆರೋಪಿಸಿ ಇಂದು ಅಹೋರಾತ್ರಿ ಧರಣಿಗೆ ಬಿಜೆಪಿ ನಾಯಕರು ಮುಂದಾಗಿದ್ದಾರೆ