Free Bus: ಮಹಿಳೆಯರಿಗೆ ಫ್ರೀ ಪಾಸ್​​ಗೆ ಹತ್ತಾರು ವಿಘ್ನ! ಫ್ರೀ ಕೊಡೋದಕ್ಕೆ ಬಸ್ಸೇ ಇಲ್ಲಾ ಅಂದರೆ ಹೇಗೆ?

ಬೆಂಗಳೂರು: ಗ್ಯಾರಂಟಿ ಸರ್ಕಾರದ ಒಂದೊಂದು ಗ್ಯಾರೆಂಟಿಗೂ ಹತ್ತಾರು ವಿಘ್ನಗಳಿದೆ. ಅದರಲ್ಲೂ ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣಕ್ಕೆ ಸಂಬಂಧಿಸಿದಂತೆ ದೊಡ್ಡದೊಂದು ತಲೆನೋವು ಎದುರಾಗಿದೆ. ಫ್ರೀ ಕೊಡೋದಕ್ಕೆ ಬಸ್ಸೇ ಇಲ್ಲಾ ಅಂದರೆ ಹೇಗೆ? ಅಸಲಿ ಲೆಕ್ಕ ಇಲ್ಲಿದೆ ನೋಡಿ.

ಫ್ರೀ ಬಸ್‌ ನೀಡಲು ಬಸ್‌ಗಳ ಶಾರ್ಟೆಜ್: ಹೌದು, ಜೂನ್ 11ರಿಂದ ರಾಜ್ಯ ಸರ್ಕಾರ ರಾಜ್ಯ ಎಲ್ಲಾ ಮಹಿಳೆಯರಿಗೆ ಸಾರಿಗೆ ಬಸ್ ಉಚಿತ ಪ್ರಯಾಣ ಅಂತ ಘೋಷಣೆ ಮಾಡಿದೆ. ಅದರಂತೆ ರಾಜ್ಯದ ಎಲ್ಲಾ ಮಹಿಳೆಯರು ರಾಜ್ಯದ್ಯಂತ ಸರ್ಕಾರಿ ಬಸ್ ನಲ್ಲಿ ಉಚಿತವಾಗಿ‌ ಸಂಚರಿಸಬಹುದು. ಆದರೆ ಲಕ್ಷುರಿ ಬಸ್ ಹಾಗೂ ಸೆಮಿ‌ ಲಕ್ಷುರಿ ಬಸ್ ಗಳಲ್ಲಿ ಉಚಿತ ನೀಡಿಲ್ಲ.

ಸಾರಿಗೆ ಇಲಾಖೆಯ 4 ನಿಗಮಗಳ ಸಾಮಾನ್ಯ ಬಸ್​​ಗಳಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣ ಘೋಷಣೆ ಆಗಿರುವುದರಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರ ಸಂಚಾರ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಫ್ರೀ ಇರುವುದರಿಂದ ಎಲ್ಲಾ ಮಹಿಳೆಯರೂ ಸರ್ಕಾರಿ ಬಸ್ ಅನ್ನೇ ಹತ್ತಬೇಕಿದೆ.

ಸದ್ಯ ರಾಜ್ಯದಲ್ಲಿ ಎಷ್ಟು ಬಸ್​​ಗಳು ಕಾರ್ಯ ನಿರ್ವಹಿಸುತ್ತಿದೆ? ಎಷ್ಟು ಜನ ಪ್ರಯಾಣಿಕರು ನಿತ್ಯ ಓಡಾಡ್ತಾರೆ? ಇನ್ನೂ ಎಷ್ಟು ಬಸ್​​ಗಳ ಅವಶ್ಯಕತೆ ಇದೆ ನೋಡುವುದಾದರೆ ರಾಜ್ಯದಲ್ಲಿ ಒಟ್ಟು 23 ಸಾವಿರದ 978‌ ಸರ್ಕಾರಿ ಬಸ್‌ ಇದ್ದರೆ, 10 ಸಾವಿರ ಲಕ್ಷುರಿ, ಸೆಮಿ ಲಕ್ಷುರಿ ಬಸ್ ಇವೆ. 2500 ಗುತ್ತಿಗೆ ಬಸ್‌ ಇದ್ದು, 11 ಸಾವಿರ ಸಾಮಾನ್ಯ ಬಸ್​​ ಬಸ್ ಇವೆ.. ರಾಜ್ಯದಲ್ಲಿ 50 ಸಾವಿರ ಖಾಸಗಿ ಬಸ್‌ಗಳೂ ಇವೆ.

ರಾಜ್ಯದಲ್ಲಿ 80 ಲಕ್ಷ ಜನ ನಿತ್ಯ ಬಸ್‌ ಪ್ರಯಾಣವನ್ನೇ ಅವಲಂಬಿಸಿದ್ದಾರೆ. 40 ಲಕ್ಷ ಮಹಿಳಾ ಪ್ರಯಾಣಿಕರಿದ್ದಾರೆ. ಸದ್ಯ ಉಚಿತ ಬಸ್ ಸೇವೆ ಒದಗಿಸಲು 10,000ಕ್ಕೂ ಹೆಚ್ಚು ಬಸ್​​ ಬೇಕು. ಆ ಅಗತ್ಯ ಪೂರೈಸೋ ಶಕ್ತಿ ಇರೋದು ಕೇವಲ ಖಾಸಗಿ ಬಸ್ ಮಾಲೀಕರಿಗೆ.

ಪ್ರಯಾಣಿಕರ ಸಂಖ್ಯೆ ಹೆಚ್ಚಾದರೆ ಅದಕ್ಕೆ ತಕ್ಕಂತೆ ಬಸ್​​ಗಳ ಸಂಖ್ಯೆ ಮಾತ್ರ ಸಾರಿಗೆ ಇಲಾಖೆ ಬಳಿ ಇಲ್ಲ. ಹೀಗಾಗಿ ಖಾಸಗಿ ಬಸ್​​ಗಳನ್ನು ಕೂಡ ಉಚಿತ ಬಸ್ ಪ್ರಯಾಣ ಯೋಜನೆಗೆ ಬಳಸಿಕೊಳ್ಳಿ ಅಂತ ಖಾಸಗಿ ಬಸ್ ಮಾಲೀಕರ ಸಂಘ ಸರ್ಕಾರಕ್ಕೆ ಮನವಿ ಮಾಡಿದೆ.

ಸಾರಿಗೆ ಸಂಸ್ಥೆಯ ಸುಮಾರು 10 ಸಾವಿರ ನಾರ್ಮಲ್ ಬಸ್ ನಿಂದ ಈ ಯೋಜನೆ ಯಶಸ್ವಿ ಅಸಾಧ್ಯ ಅಂತ ರಾಜ್ಯ ಖಾಸಗಿ ಬಸ್ ಮಾಲೀಕರ ಪೆಡರೆಷನ್ ಅಭಿಪ್ರಾಯ ಪಟ್ಟಿದೆ.

ರಾಜ್ಯದಲ್ಲಿ 50 ಸಾವಿರಕ್ಕೂ ಹೆಚ್ಚಿನ ಸಾಧಾರಣ ಖಾಸಗಿ ಬಸ್ ಗಳು ಸೇವೆ ನೀಡುತ್ತಿವೆ. ಹೀಗಾಗಿ ಸಿಎಂ ಸಿದ್ದರಾಮಯ್ಯನವರು ಈ ಬಗ್ಗೆ ಅವಲೋಕಿಸಬೇಕು ರಾಜ್ಯ ಖಾಸಗಿ ಬಸ್ ಮಾಲೀಕರ ಪೆಡರೆಷನ್ ಮನವಿ ಮಾಡಿದೆ.