Karnataka Elections: ಕುಕ್ಕರ್ ರಾಜಕೀಯ: 159 ಮುಸ್ಲಿಂ ಮಹಿಳೆಯರಿಗೆ ಉಡುಗೊರೆ ವಿತರಿಸಿದ ಬಿಜೆಪಿ ಶಾಸಕ!

ಕರ್ನಾಟಕ ಚುನಾವಣಾ ಅಖಾಡ ರಂಗೇರಿದೆ. ಕೆಲವೇ ದಿನಗಳಲ್ಲಿ ನಡೆಯಲಿರುವ ಚುನಾವಣೆಗೆ ಮತದಾರರು ಸೇರಿದಂತೆ ರಾಜಕೀಯ ನಾಯಕರು ಸಿದ್ಧರಾಗಿದ್ದಾರೆ.

ಒಂದೆಡೆ ರಾಜಕೀಯ ನಾಯಕರು ಮತದಾರರನ್ನು ಓಲೈಸುವ ತಂತ್ರ ಆರಂಭಿಸಿದ್ದರೆ, ಇತ್ತ ಮತದಾರರು ಈ ರಾಜಕೀಯ ಗಣ್ಯರ ಆಟಕ್ಕೆ ಸಾಕ್ಷಿಯಾಗುತ್ತಿದ್ದಾರೆ.

ಇನ್ನು ಈ ಬಾರಿ ರಾಜಕೀಯ ನಾಯಕರಿಂದ ಮತದಾರರಿಗೆ ಹಂಚಲಾಗುವ ಉಡುಗೊರೆಗಳ ಭರಾಟೆಯೂ ಸದ್ದು ಮಾಡುತ್ತದೆ. ಅಲ್ಲಲ್ಲಿ ಪೆಂಡಾಲ್​ ಹಾಕಿ ತಮ್ಮ ಕ್ಷೇತ್ರದ ಮತದಾರರಿಗೆ ನಾಯಕರು ಕುಕ್ಕರ್​, ಟಿವಿ ಹೀಗೆ ನಾನಾ ವಸ್ತುಗಳನ್ನು ಗಿಫ್ಟ್​ ಆಗಿ ನಿಡುತ್ತಿದ್ದಾರೆ.

ಸದ್ಯ ಚಿಕ್ಕಪೇಟೆ ವಿಧಾನಸಭಾ ಕ್ಷೇತ್ರದಲ್ಲಿ ಮತದಾರರಿಗೆ ಕುಕ್ಕರ್ ವಿತರಣೆ ಮಾಡಿರುವ ವಿಚಾರ ಬೆಳಕಿಗೆ ಬಂದಿದೆ. ಶಾಸಕ ಉದಯ್ ಗರುಡಾಚಾರ್ ಇಲ್ಲಿನ 159 ಮುಸ್ಲಿಂ ಮಹಿಳೆಯರಿಗೆ ಕುಕ್ಕರ್ ವಿತರಿಸಿದ್ದಾರೆ.

ಹೌದು ಚಿಕ್ಕಪೇಟೆಯ ಹಾಲಿ ಬಿಜೆಪಿ ಶಾಸಕ ಕುಕ್ಕರ್ ಹಂಚಿರುವ ವಿಚಾರ ಗಮನಿಸಿದರೆ ಅವರು ಅಲ್ಪ ಸಂಖ್ಯಾತ ಮತಗಳನ್ನ ಟಾರ್ಗೆಟ್ ಮಾಡಿದ್ರಾ ಎಂಬ ಅನುಮಾನ ಕಾಡದಿರಲ್ಲ.

ಲಾಲ್ ಬಾಗ್ ಸಿದ್ಧಾಪುರದಲ್ಲಿ ನಿನ್ನೆ ಮಧ್ಯಾಹ್ನ ಕುಕ್ಕರ್ ವಿತರಣೆ ಮಾಡಲಾಗಿದ್ದು, ಇಲ್ಲಿನ ಮುಸ್ಲಿಂ ಮಹಿಳೆಯರಿಗೇ ಅಧಿಕ ಪ್ರಮಾಣದಲ್ಲಿ ಕುಕ್ಕರ್ ವಿತರಿಸಲಾಗಿದೆ ಎನ್ನಲಾಗಿದೆ.

ಚಿಕ್ಕಪೇಟೆ ವಿಧಾನಸಭಾ ಕ್ಷೇತ್ರದ ಎಲ್ಲಾ ಮುಸ್ಲಿಂ ಮಹಿಳೆಯರಿಗೆ ಕುಕ್ಕರ್ ನೀಡಲು ಪ್ಲಾನ್ ಮಾಡಲಾಗಿದ್ದು, ನಿನ್ನೆ 300 ಕ್ಕೂ ಹೆಚ್ಚು ಮುಸ್ಲಿಂ ಕುಟುಂಬಗಳಿಗೆ ಕುಕ್ಕರ್ ವಿತರಣೆ ಮಾಡಲಾಗಿದೆ.

ಇಂದೂ ಸಹ ಕುಕ್ಕರ್ ವಿತರಣಾ ಕಾರ್ಯಕ್ರಮ ಮುಂದುವರೆದಿದ್ದು, ಕೆಲ ಹಿಂದೂ ಕುಟುಂಬಗಳಿಗೂ ವಿತರಿಸಲಾಗಿದೆ ಎನ್ನಲಾಗಿದೆ.

ಈಗಿನ ಬೆಳವಣಿಗೆಗಳನ್ನು ಗಮನಿಸಿದರೆ ಮುಂದಿನ ದಿನಗಳಲ್ಲಿ ಮತದಾರರಿಗೆ ರಾಶಿ ರಾಶಿ ಉಡುಗೊರೆಗಳು ಸಿಗಲಿವೆ ಎಂಬುವುದರಲ್ಲಿ ಎರಡು ಮಾತಿಲ್ಲ.