Shivamogga News: ಮತಗಟ್ಟೆಗೆ ಬಂದ ಬುಸ್ ಬುಸ್ ನಾಗಪ್ಪ! ಇವಿಎಂ ಮಶಿನ್ ಪೂಜೆಗೆ ಆಗಮಿಸಿದ ಮಹಿಳೆ!

ರಾಜ್ಯದಾದ್ಯಂತ ಮತದಾನ ಈಗಾಗಲೇ ಆರಂಭವಾಗಿದೆ. ಇದೇ ವೇಳೆ ಶಿವಮೊಗ್ಗದ ಮತಗಟ್ಟೆಯೊಂದಕ್ಕೆ ಬುಸ್ ಬುಸ್ ನಾಗಪ್ಪ ಆಗಮಿಸಿದ್ದಾರೆ. ಶಿವಮೊಗ್ಗದ ತೀರ್ಥಹಳ್ಳಿಯ ಪಟ್ಟಣದ ಕುವೆಂಪು ಶಾಲೆಯ ಮತಗಟ್ಟೆಯಲ್ಲಿ ನಾಗರಹಾವು ಪ್ರತ್ಯಕ್ಷವಾಗಿದೆ.

ತೀರ್ಥಹಳ್ಳಿಯ ಹೃದಯ ಭಾಗದಲ್ಲಿ ಇರುವ ಮತಗಟ್ಟೆ ಇದಾಗಿದ್ದು, ನಾಗಪ್ಪನನ್ನು ನೋಡಿ ಚುನಾವಣಾ ಅಧಿಕಾರಿಗಳು ಭಯಗೊಂಡಿದ್ದಾರೆ. ಹಾವು ಬಂದ ಕುರಿತು ಕೂಡಲೇ ಸ್ಥಳೀಯರಿಗೆ ತಿಳಿಸಿದ ಚುನಾವಣಾ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಕೂಡಲೇ ಉರಗ ತಜ್ಞ ಮಾರುತಿ ಮಾಸ್ಟರ್ ಸ್ಥಳಕ್ಕೆ ಆಮಿಸಿದ್ದಾರೆ. ಸುರಕ್ಷಿತವಾಗಿ ಮಾರುತಿ ಮಾಸ್ಟರ್ ಹಾವನ್ನು ಹಿಡಿದು ಕಾಡಿಗೆ ಬಿಟ್ಟಿದ್ದಾರೆ. ಹೀಗಾಗಿ ಚುನಾವಣಾ ಅಧಿಕಾರಿಗಳು ನಿಟ್ಟುಸಿರು ಬಿಟ್ಟಿದ್ದಾರೆ.

ಇತ್ತ ಯಾದಗಿರಿಯ ಪಿಂಕ್ ಮತಗಟ್ಟೆಯಲ್ಲಿ ಕೋತಿಗಳು ಹಾವಳಿ ನೀಡುತ್ತಿವೆ.  ಕೋತಿಗಳ ಹಾವಳಿಯಿಂದ ಮತಗಟ್ಟೆ ಸಿಬ್ಬಂದಿಗಳು ಗಾಬರಿಗೊಂಡಿದ್ದಾರೆ. ಯಾದಗಿರಿ ಜಿಲ್ಲೆಯ ವಡಗೇರಾ ತಾಲೂಕಿನ ಗುಲಸರಂ ಗ್ರಾಮದಲ್ಲಿ ಈ ಘಟನೆ ನಡೆದಿದೆ.

ಇತ್ತ ಬೆಕ್ಕೊಂದು ಮತಗಟ್ಟೆಯ ಬಳಿ ಬೆಳ್ಳಂ ಬೆಳಗ್ಗೆಯೇ ಬಂದು ಕುಳಿತಿದೆ. ಹುಬ್ಬಳ್ಳಿಯ ಲ್ಯಾಮಿಂಗ್ಟನ್ ಶಾಲೆಯಲ್ಲಿ ಈ ಘಟನೆ ನಡೆದಿದೆ. ಮತಗಟ್ಟೆ ಸಂಖ್ಯೆ 188 ರ ಬಳಿ ಬೆಕ್ಕು ಬಂದು ಕುಳಿತಿದೆ. ಮತದಾರರು ಕೂರಲೆಂದು ಹಾಕಿದ್ದ ಕುರ್ಚಿ ಮೇಲೆ ಬೆಕ್ಕು ಕುಳಿತಿದೆ. ಮತದಾರರು ಬಂದರೂ ಕುಳಿತಲ್ಲಿಂದ ಬೆಕ್ಕು ಎದ್ದಿಲ್ಲ. ಮತದಾರರನ್ನು ಕಂಡು ಹೆದರಿ ಓಡಿ ಹೋಗಿಲ್ಲ. (ಸಾಂದರ್ಭಿಕ ಚಿತ್ರ)

ಇವಿಎಂ ಹಾಗೂ ವಿವಿಪ್ಯಾಟ್ ಗೆ ಪೂಜೆ ಸಲ್ಲಿಸಲು ಆಗಮಿಸಿದ ರೈತ ಸಂಘದ ಮಹಿಳೆಯೋರ್ವರು ಆಗಮಿಸಿದ್ದಾರೆ. ಮಂಡ್ಯ ಜಿಲ್ಲೆ ಪಾಂಡವಪುರ ತಾಲೂಕಿನ ತಿಮ್ಮನಕೊಪ್ಪಲು ಗ್ರಾಮದಲ್ಲಿ ಈ ಘಟನೆ ನಡೆದಿದೆ. ಮತಗಟ್ಟೆ ಪ್ರವೇಶ ಮಾಡುತ್ತಿದ್ದಂತೆ ಮಹಿಳೆಯನ್ನ ಚುನಾವಣಾ ಅಧಿಕಾರಿಗಳು ತಡೆದಿದ್ದಾರೆ. ಪೂಜೆ ಸಲ್ಲಿಸಲು ಅವಕಾಶ ನೀಡುವುದಿಲ್ಲವೆಂದು ಮಹಿಳೆಯನ್ನು ಆಚೆ ಕಳುಹಿಸಲಾಗಿದೆ. ಮಹಿಳೆ ಮತಗಟ್ಟೆಯ ಪ್ರವೇಶ ದ್ವಾರದಲ್ಲೇ ಪೂಜೆ ಸಲ್ಲಿಸಿ ತೆರಳಿದ್ದಾರೆ. ಹಣ್ಣು ಕಾಯಿ ಒಡೆದು ಅರಿಶಿಣ ಕುಂಕುಮವಿಟ್ಟು ಹೂವನ್ನ ಬಾಗಿಲಿಗೆ ಇಟ್ಟು ಪೂಜೆ ಸಲ್ಲಿಸಿ ಮಹಿಳೆ ಮರಳಿದ್ದಾರೆ.

ಒಟ್ಟಾರೆ ಇಡೀ ರಾಜ್ಯದಲ್ಲಿ ಮತದಾನ ಮಾಡಲು ನಾಗರಿಕರು ತೀವ್ರ ಉತ್ಸಾಹ ತೋರಿಸುತ್ತಿದ್ದಾರೆ. (ಸಾಂದರ್ಭಿಕ ಚಿತ್ರ)