Karnataka Elections: ಮತಯಂತ್ರ ಒಡೆದು ಆತಂಕ ಸೃಷ್ಟಿಸಿದ ವ್ಯಕ್ತಿ; ಬೆಚ್ಚಿಬಿದ್ದ ಮತಗಟ್ಟೆ ಸಿಬ್ಬಂದಿ, ಅಸಲಿಗೆ ಆಗಿದ್ದೇನು?

ಮೈಸೂರು: ಮತ ಹಾಕಲು ಬಂದು ಮತಯಂತ್ರ ಒಡೆದು ಹಾಕಿ ದಾಂಧಲೆ ಮಾಡಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಈ ಘಟನೆ ಮೈಸೂರಿನ ಹೂಟಗನಹಳ್ಳಿಯ ಮತಗಟ್ಟೆಯಲ್ಲಿ ನಡೆದಿದೆ.

ಸರತಿ ಸಾಲಿನಲ್ಲಿ ಬಂದು ಮತ ಹಾಕಲು ಬಂದಿದ್ದ ವ್ಯಕ್ತಿ, ಬೆರಳಿಗೆ ಶಾಯಿ ಹಾಕಿಸಿಕೊಂಡು ಮತಗಟ್ಟೆಗೆ ತೆರಳುವಾಗ ಮತಯಂತ್ರ ಒಡೆದು ಹಾಕಿದ್ದಾನೆ.

ಘಟನೆ ನಡೆಸಿದ ಆತ ಮಾನಸಿಕ ಅಸ್ವಸ್ಥ ಎಂದು ತಿಳಿದು ಬಂದಿದ್ದು, ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೈಸೂರಿನ ವಿಜಯನಗರ ಪೊಲೀಸರು ವ್ಯಕ್ತಿಯನ್ನು ಬಂಧಿಸಿದ್ದಾರೆ.

ಮತಯಂತ್ರ ಒಡೆದು ಹಾಕುವ ವಿಡಿಯೋ ಸಖತ್ ವೈರಲ್​ ಆಗಿದ್ದು, ಮೇ 10 ಮತದಾನದ ದಿನದಂದು ನಡೆದ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.

ಮಾನಸಿಕ ಅಸ್ವಸ್ಥನ ದಾಂಧಲೆಯಿಂದ ಬೆಚ್ಚಿಬಿದ್ದ ಚುನಾವಣಾ ಸಿಬ್ಬಂದಿ ಕ್ಷಣ ಕಾಲ ಬೆಚ್ಚಿಬಿದ್ದಿದ್ದು, ಕೂಡಲೇ ಎಚ್ಚೆತ್ತುಕೊಂಡ ಪೊಲೀಸರು ಆತನನ್ನು ಸ್ಥಳದಲ್ಲೇ ವಶಕ್ಕೆ ಪಡೆದು ಮತಕೇಂದ್ರದಿಂದ ಹೊರಗೆ ಕರೆದುಕೊಂಡು ಹೋಗಿದ್ದಾರೆ.

ಇನ್ನು, ಇವಿಎಂ ಮಿಷನ್​ ನೆಲಕ್ಕೆ ಬಡಿದರು ಕೂಡ ಮಿಷನ್​ಗೆ ಯಾವುದೇ ಹಾನಿ ಆಗಿರಲಿಲ್ಲ ಎಂಬ ಮಾಹಿತಿ ಲಭ್ಯವಾಗಿದ್ದು, ಘಟನೆ ಬಳಿಕ ಕೇಂದ್ರದಲ್ಲಿ ಸ್ವಲ್ಪ ಸಮಯ ಗೊಂದಲ ಉಂಟಾದರೂ ಮತ್ತೆ ಮತದಾನಕ್ಕ ಚಾಲನೆ ನೀಡಿದ್ದರಂತೆ.

ಪ್ರಕರಣದ ಕುರಿತಂತೆ ಸ್ಪಷ್ಟನೆ ನೀಡಿರುವ ಡಿಸಿ ಡಾ. ರಾಜೇಂದ್ರ ಅವರು, ಮತಯಂತ್ರ ಒಡೆದು ಹಾಕಿದ ವ್ಯಕ್ತಿಗೆ ಮೇಲ್ನೋಟಕ್ಕೆ ಮಾನಸಿಕ ಸಮಸ್ಯೆ ಇರುವಂತೆ ಇದೆ. ಆದರೆ ಇನ್ನೂ ವೈದ್ಯರು ಅದನ್ನು ದೃಢೀಕರಿಸಿಲ್ಲ. ಏಕಾಏಕಿ ಲೌಡ್ ಆಗಿದ್ದಾರೆ ಆ ವ್ಯಕ್ತಿ, ಹೀಗಾಗಿ ಕಂಟ್ರೋಲ್ ಮಾಡೋಕೆ‌ ಆಗಿಲ್ಲ. ಈ ಬಗ್ಗೆ ಪೊಲೀಸರು ತನಿಖೆ ಮಾಡಿ ಸೂಕ್ತ ಕ್ರಮ ತೆಗೆದುಕೊಳ್ಳುತ್ತಾರೆ ಎಂದು ತಿಳಿಸಿದ್ದಾರೆ.