Karnataka CM Announcement: ಸಿಎಂ ಸ್ಥಾನಕ್ಕೆ ಸಿದ್ದು ಪಟ್ಟು, ಡಿಕೆ ಶಿವಕುಮಾರ್​​ ತವರಲ್ಲಿ ಹೈ ಅಲರ್ಟ್​!

ರಾಮನಗರ: ಕಾಂಗ್ರೆಸ್‌ನೊಳಗಿನ ಕುರ್ಚಿ ಕಿತ್ತಾಟ ಇನ್ನೂ ಬಗೆಹರಿತಿಲ್ಲ. ನೀ ಕೊಡೆ ನಾ ಬಿಡೆ ಎಂಬಂತೆ ಸಿದ್ದರಾಮಯ್ಯ ಹಾಗೂ ಡಿಕೆ ಶಿವಕುಮಾರ್‌ ಪಟ್ಟಕ್ಕಾಗಿ ಪಟ್ಟು ಹಿಡಿದಿದ್ದಾರೆ.

ದೂರದ ದೆಹಲಿಯಲ್ಲಿ ಮಲ್ಲಿಕಾರ್ಜುನ ಖರ್ಗೆ, ರಾಹುಲ್ ಗಾಂಧಿ ಸಭೆ ಮೇಲೆ ಸಭೆ ನಡೆದರೂ ಅಂತಿಮ ಆಗುತ್ತಿಲ್ಲ. ಸಿಎಂ ಪಟ್ಟ ನನಗೇ ಬೇಕು ಅಂಥ ಉಭಯ ನಾಯಕರು ಪಟ್ಟು ಹಿಡಿದಿದ್ದಾರೆ.

ಮಲ್ಲಿಕಾರ್ಜುನ ಖರ್ಗೆ ಇಬ್ಬರನ್ನೂ ಕರೆಸಿ ಮಾತನಾಡಿದರೂ ಯಾರೂ ಒಪ್ಕೋತಿಲ್ಲ. ರಾಹುಲ್ ಇಬ್ಬರನ್ನೂ ಕರೆಸಿ ಮನವರಿಕೆ ಮಾಡಿದರೂ ಜಗ್ಗುತ್ತಿಲ್ಲ. ಹೀಗಾಗಿ ಸಿಎಂ ಆಯ್ಕೆ ಕಾಂಗ್ರೆಸ್‌ ಹೈಕಮಾಂಡ್‌ಗೆ ದೊಡ್ಡ ತಲೆನೋವಾಗಿದೆ.

ಈ ನಡುವೆ ತಮ್ಮ ನಾಯಕನನ್ನ ಬಿಟ್ಟು ಬೇರೆಯವರಿಗೆ ಅವಕಾಶ ಸಿಕ್ಕರೆ ಅಭಿಮಾನ ಅತಿರೇಕಕ್ಕೆ ಹೋಗಬಹುದು ಅನ್ನುವ ಆತಂಕ. ಹಾಗಾಗೆ ಇವತ್ತು ಸಿದ್ದು ಸಿಎಂ ಆಗುತ್ತಾರೆ ಅನ್ನೋ ಸುದ್ದಿ ಹರಿದಾಡಲು ಪ್ರಾರಂಭವಾಗುತ್ತಿದ್ದಂತೆ ಡಿಕೆ ಊರಲ್ಲಿ ಪೊಲೀಸ್ ಅಲರ್ಟ್ ಆಗಿದ್ದಾರೆ.

ದೆಹಲಿಯಲ್ಲಿ ಸಿಎಂ ಆಯ್ಕೆಗೆ ಹಗ್ಗಜಗ್ಗಾಟ ನಡೆಯುತ್ತಿದೆ. ಸಿಎಂ ಆಗುವ ರೇಸ್​ನಲ್ಲಿ ಸಿದ್ದರಾಮಯ್ಯ ಮುಂದಿದ್ದಾರೆ. ಆದ್ದರಿಂದ ಕೆಪಿಸಿಸಿ ಅಧ್ಯಕ್ಷ ಡಿಕೆ ಶಿವಕುಮಾರ್ ತವರು ಜಿಲ್ಲೆಯಲ್ಲಿ ಹೈ ಅಲರ್ಟ್ ಘೋಷಿಸಲಾಗಿದೆ. ರಾಮನಗರಕ್ಕೆ ಹೆಚ್ಚುವರಿ ಪೊಲೀಸ್ ತುಕಡಿ ನಿಯೋಜನೆ ಮಾಡಲಾಗಿದೆ. ಯಾವುದೇ ಪ್ರತಿಭಟನೆ ನಡೆಸದಂತೆ ಬೆಂಬಲಿಗರಿಗೆ ಡಿ.ಕೆ ಬ್ರದರ್ಸ್ ಸೂಚನೆಯನ್ನೂ ಕೊಟ್ಟಿದ್ದಾರಂತೆ.

ಕನಕಪುರದಲ್ಲಿರುವ ಡಿ.ಕೆ ಶಿವಕುಮಾರ್​ ಮನೆಯಲ್ಲಿ ನೀರವ ಮೌನ ಆವರಿಸಿದೆ. ಒಂದು ವೇಳೆ ಡಿಕೆ ಶಿವಕುಮಾರ್ ಸಿಎಂ ಆಗಿದ್ದರೆ ಸಂಭ್ರಮ ಇರುತ್ತಿತ್ತು. ಆದರೆ ಮುಖ್ಯಮಂತ್ರಿ ಹೆಸರು ಘೋಷಿಸದಿದ್ದಕ್ಕೆ ಡಿಕೆ ಶಿವಕುಮಾರ್ ಮನೆಗೆ ಯಾರೂ ಬರ್ತಿಲ್ಲ.

ಕಷ್ಟಪಟ್ಟು ಪಕ್ಷ ಅಧಿಕಾರಕ್ಕೆ ತಂದಿದ್ದು ಡಿಕೆ ಶಿವಕುಮಾರ್, ಈಗ ಅಧಿಕಾರ ಮಾತ್ರ ಬೇರೆಯವರಿಗಾ? ಡಿಕೆಶಿ ಸಿಎಂ ಆಗ್ಲಿಲ್ಲ ಅಂದ್ರೆ ನೇಣಾಕೋತ್ತೀನಿ ಅಂತ ಕನಕಪುರದಲ್ಲಿ ಡಿಕೆಶಿ ಅಭಿಮಾನಿ ಫುಲ್ ಗರಂ ಆಗಿದ್ದ ಘಟನೆಯೂ ನಡೆಯಿತು.