Karnataka Assembly Session: ಸುವರ್ಣ ಸೌಧದಲ್ಲಿ ಸಾವರ್ಕರ್ ಫೋಟೊ ಅನಾವರಣ, ಸರ್ಕಾರದ ವಿರುದ್ಧ ಹರಿಹಾಯ್ದ ಕಾಂಗ್ರೆಸ್

ಬೆಳಗಾವಿಯಲ್ಲಿ ಆರಂಭವಾದ ಚಳಿಗಾಲದ ಅಧಿವೇಶನಕ್ಕೂ ಮುನ್ನ ಸುವರ್ಣ ಸೌಧದಲ್ಲಿ ಸರ್ಕಾರ ಒಟ್ಟು 7 ಚಿತ್ರಗಳನ್ನು ಅನಾವರಣಗೊಳಿಸಿದೆ. ಅವುಗಳಲ್ಲಿ ಸಾವರ್ಕರ್ ಫೋಟೊ ಸಹ ಇರುವುದು ವಿಪಕ್ಷಗಳ ಕೆಂಗಣ್ಣಿಗೆ ಗುರಿಯಾಗಿದೆ.

ಸುವರ್ಣ ಸೌಧದಲ್ಲಿ ಸ್ವಾಮಿ ವಿವೇಕಾನಂದ, ಸುಭಾಷ್ ಚಂದ್ರ ಬೋಸ್, ಡಾ. ಅಂಬೇಡ್ಕರ್, ಬಸವಣ್ಣ, ಗಾಂಧಿಜೀ, ವಲ್ಲಭಭಾಯ್ ಪಟೇಲ್, ಸಾವರ್ಕರ್ ಫೋಟೊಗಳನ್ನು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅನಾವರಣಗೊಳಿಸಿದ್ದಾರೆ.

ಸುವರ್ಣ ಸೌಧದ ಸ್ಪೀಕರ್ ಪೀಠದ ಮೇಲೆ ಬಸವಣ್ಣನವರ ಭಾವಚಿತ್ರ ಅಳವಡಿಸಲಾಗಿದೆ. ಸಿಎಂ ಬೊಮ್ಮಾಯಿ ಮೊದಲು ಬಸವಣ್ಣನವರ ಭಾವಚಿತ್ರವನ್ನೇ ಅನಾವರಣ ಮಾಡಿದ್ದಾರೆ.

ನಾಲ್ಕನೆಯದಾಗಿ ಸಾವರ್ಕರ್ ಭಾವಚಿತ್ರವನ್ನು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅನಾವರಣಗೊಳಿಸಿದ್ದಾರೆ.

ಸಾವರ್ಕರ್ ಪೋಟೋ ಅನಾವರಣ ವಿಚಾರವಾಗಿ ಸರ್ಕಾರಕ್ಕೆ ಠಕ್ಕರ್ ಕೊಡಲು ಕಾಂಗ್ರೆಸ್ ಪ್ಲಾನ್ ಮಾಡಿದೆ.

ಕುವೆಂಪು, ವಾಲ್ಮೀಕಿ, ಬಸವಣ್ಣ, ನಾರಾಯಣಗುರ, ಶಿಶುನಾಳ ಶರೀಫ, ಕನಕದಾಸರ ಪೋಟೋಗಳನ್ನು ವಿಧಾನಸಬೆ ಹಾಲ್ನಲ್ಲಿ ಹಾಕುವಂತೆ ವಿಪಕ್ಷ  ನಾಯಕ ಸಿದ್ದರಾಮಯ್ಯ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರಿಗೆ ಪತ್ರ ಬರೆಯಲು ಉದ್ದೇಶಿಸಿದ್ದಾರೆ.

ಕಲಾಪ ಆರಂಭಕ್ಕೂ ಮುನ್ನ ಮಾತನಾಡಿದ ಸಿಎಂ ಬಸವರಾಜ ಬೊಮ್ಮಾಯಿ, ಸರ್ಕಾರದ ಕಲಾಪದಲ್ಲಿ ಹತ್ತು ಹಲವು ಕಾನೂನು ರಚನೆ ಆಗಬೇಕು. ಎಲ್ಲರ ಅಭಿಪ್ರಾಯದೊಂದಿಗೆ ಒಳ್ಳೆಯ ಚರ್ಚೆ ಆಗಿ ಜನರ ಸಮಸ್ಯೆ ಗಳಿಗೆ ಪರಿಹಾರ ಕೊಡಬೇಕು. ನೆಲ - ಜಲ - ಭಾಷೆ ಎಲ್ಲ ವಿಷಯಗಳ ಬಗ್ಗೆಯೂ ಚರ್ಚೆ ಆಗಲಿದೆ ಎಂದು ತಿಳಿಸಿದ್ದಾರೆ. ಜೊತೆಗೆ ಎಲ್ಲ ಮಹನೀಯರ ಫೋಟೋ ಹಾಕುವ ವಿಚಾರವಾಗಿ ವಿಪಕ್ಷ ನಾಯಕ ಸಿದ್ದರಾಮಯ್ಯ ಮತ್ತು ಸ್ಪೀಕರ್ ಜೊತೆ ಚರ್ಚೆ ಮಾಡ್ತೀನಿ ಎಂದು ಹೇಳಿದ್ದಾರೆ.

ಸುವರ್ಣಸೌಧದ ಸಭಾಂಗಣದಲ್ಲಿ ಮಹಾತ್ಮಾ ಗಾಂಧಿ, ವಲ್ಲಭಭಾಯ್ ಪಟೇಲ್, ಬಸವಣ್ಣ, ಮಹರ್ಷಿ ವಾಲ್ಮಿಕಿ, ಡಾ. ಅಂಬೇಡ್ಕರ್, ಪಂ. ನೆಹರು, ಅಬು ಜಗಜೀವನ್ ರಾಂ, ಕುವೆಂಪು ಅವರ ಪೋಟೋ ಹಾಕಬೇಕು. ಅದು ಬಿಟ್ಟು ಏಕಾಏಕಿ ಸಾವರ್ಕರ್ ಫೋಟೊ ಹಾಕಲಾಗುತ್ತಿದೆ ಎಂದು ಕೆಪಿಸಿಸಿ ಕಾರ್ಯಾಧ್ಯಕ್ಷ ಸಲೀಂ ಅಹ್ಮದ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.