Prediction: ಪುಣ್ಯ ಸ್ತ್ರೀಯಳ ಒಲುಮೆ ಬಣ್ಣ ಭಜನೆ ಅಲ್ಲ; ಕೊಡೇಕಲ್ ಕಾಲಜ್ಞಾನಿ ಬಸವಣ್ಣನ ಭವಿಷ್ಯದ ನುಡಿ

ಯಾದಗಿರಿ ಜಿಲ್ಲೆಯ ಹುಣಸಗಿ ತಾಲೂಕಿನ ಕೊಡೇಕಲ್ ಗ್ರಾಮದಲ್ಲಿರುವ ಕಾಲಜ್ಞಾನಿ ಬಸವಣ್ಣನ ದೇವಸ್ಥಾನ ಇದೆ. ಇಲ್ಲಿ ಕಾಲಜ್ಞಾನಿ ಬಸವಣ್ಣನವರ ವಚನಗಳನ್ನೆ ಪ್ರತಿ ವರ್ಷ ಶಿವರಾತ್ರಿ ಹಬ್ಬದ ದಿನ ನುಡಿಯುತ್ತಾರೆ.

ಈ ವಚನದ ನುಡಿಗಳನ್ನೇ ಮುಂದಿನ ವರ್ಷದ ಭವಿಷ್ಯದ ಹೇಳಿಕೆ ಎಂದು ಭಕ್ತರು ನಂಬುತ್ತಾರೆ. ವಚನದ ನುಡಿಯನ್ನು ನಂತರ ವಿಶ್ಲೇಷಣೆ ಮಾಡಿ ತಿಳಿಸಲಾಗುತ್ತದೆ. ಬಸವರಾಜ ಭದ್ರಗೋಳ ಎಂಬವರು ವಚನದ ನುಡಿಯನ್ನು ವಿಶ್ಲೇಷಣೆ ಮಾಡಿ ಹೇಳಿದರು.

ಶಿವರಾತ್ರಿ ನುಡಿಯಲ್ಲಿ ಪಕ್ಷಾಂತರಿಗಳಿಗೆ ಎಚ್ಚರಿಕೆ ನೀಡಲಾಗಿದೆ ಎಂದು ಬಸವರಾಜ್ ಭದ್ರಗೋಳ ಹೇಳಿದ್ದಾರೆ. ನುಡಿದಂತೆ ನಡೆಯುವರಿಗೆ ಮತ್ತೆ ಅಧಿಕಾರದ ಗದ್ದುಗೆ ಸಿಗಲಿದೆ ಎಂಬುವುದು ವಚನ ನುಡಿಯ ವಿಶ್ಲೇಷಣೆ ಆಗಿದೆ.

 ವಚನ ನುಡಿ

ಪುಣ್ಯ ಸ್ತ್ರೀಯಳ ಒಲುಮೆ ಬಣ್ಣ ಭಜನೆ ಅಲ್ಲ, ತನ್ನ ಪುರುಷನೇ ತನಗೆ ಗತಿ ಎಂದು ಇದ್ದರೆ ಮನ್ನಣೆ ಉಂಟು ಶಿವನಲ್ಲಿ ಎಂದು ವಚನ ನುಡಿ ಹೇಳಲಾಗಿತ್ತು.

 ವಚನದ ವಿಶ್ಲೇಷಣೆ

ಪಕ್ಷಾಂತರ, ಕುದುರೆ ವ್ಯಾಪಾರ ಮಾಡುವ ಪಕ್ಷದವರಿಗೆ ಶಾಸಕರಿಗೆ ಅಧಿಕಾರ ಯೋಗವಿಲ್ಲ. ಬಣ್ಣ ಬಣ್ಣದ ಮಾತುಗಳನ್ನಾಡೋರಿಗೆ ಈ ಬಾರಿ ಚುನಾವಣೆಯಲ್ಲಿ ಗೆಲುವು ಕಷ್ಟ, ನುಡಿದಂತೆ ನಡೆದುಕೊಳ್ಳುವರು ಜನರ ನಂಬಿಕೆ ಇಟ್ಟುಕೊಂಡವರಿಗೆ ಅಧಿಕಾರ ಗದ್ದುಗೆ ಎಂದು ಇಡೀ ವಚನ ನುಡಿಯನ್ನು ಬಸವರಾಜ್ ಭದ್ರಗೋಳ ವಿಶ್ಲೇಷಣೆ ಮಾಡಿ ಭಕ್ತರಿಗೆ ತಿಳಿಸಿದರು.

ಕಳೆದ ವರ್ಷದ ವಚನದ ನುಡಿಯೂ ನಿಜವಾಗಿದೆ. ಪ್ರತಿ ವರ್ಷದ ಈ ವಚನ ನುಡಿ ಕೇಳಲು ನಾವು ಇಲ್ಲಿಗೆ ಆಗಮಿಸುತ್ತೇವೆ ಎಂದು ಭಕ್ತರೊಬ್ಬರು ಹೇಳಿದ್ದಾರೆ.

ಕೆಲ ದಿನಗಳ ಹಿಂದೆ ಹಾವೇರಿ ಮತ್ತು ವಿಜಯನಗರ ಜಿಲ್ಲೆಯ ಹರಪ್ಪನಹಳ್ಳಿಯ ಮೈಲಾರ ಕಾರ್ಣಿಕ ನುಡಿಯಲಾಗಿತ್ತು. ಎರಡೂ ಕಾರ್ಣಿಕ ಶುಭ ಸಂದೇಶವನ್ನು ನುಡಿದಿದ್ದವು.