Siddeshwara Swamiji: ಸಿದ್ದೇಶ್ವರ ಸ್ವಾಮೀಜಿಗಳ ಹೆಲ್ತ್​ಬುಲೆಟಿನ್​ ಬಿಡುಗಡೆ; ಹೇಗಿದೆ ನಡೆದಾಡುವ ದೇವರ ಆರೋಗ್ಯ ಸ್ಥಿತಿ?

ವಿಜಯಪುರ: ಜ್ಞಾನ ಯೋಗಾಶ್ರಮದ ಶ್ರೀ ಸಿದ್ದೇಶ್ವರ ಸ್ವಾಮೀಜಿ (Sri Siddeshwara Swamiji) ಅನಾರೋಗ್ಯ ಹಿನ್ನೆಲೆ ನಡೆದಾಡುವ ದೇವರಿಗೆ ಆಶ್ರಮದ ಮೊದಲ ಮಹಡಿಯಲ್ಲಿಯೇ ಚಿಕಿತ್ಸೆ ನೀಡಲಾಗುತ್ತಿದೆ. ಸದ್ಯ ಅವರ ಮೂರನೇ ಹೆಲ್ತ್ ಬುಲೆಟಿನ್​ ಬಿಡುಗಡೆಯಾಗಿದ್ದು, ಶ್ರೀಗಳು ಆರೋಗ್ಯವಾಗಿದ್ದಾರೆ ಎಂದ ವೈದ್ಯರು ತಿಳಿಸಿದ್ದಾರೆ.

ಡಾ. ಮಲ್ಲಣ್ಣ ಮೂಲಿಮನಿ ಅವರು ಶ್ರೀಗಳ ಆರೋಗ್ಯ ಬಗ್ಗೆ ಮಾಹಿತಿ ನೀಡಿದ್ದು, ಶ್ರೀಗಳು ಆರೋಗ್ಯವಾಗಿದ್ದಾರೆ. ಪಲ್ಸ್, ಬಿಪಿ ಸರಿಯಾಗಿದೆ, ಯಾವುದೇ ರೀತಿಯ ಆತಂಕವಿಲ್ಲ. ಮುಂಜಾನೆಗಿಂತ ಈಗಿನ ಸ್ಥಿತಿ ಮತ್ತಷ್ಟು ಚೇತರಿಕೆಯಾಗಿದೆ. ಉಸಿರಾಟದ ಸಮಸ್ಯೆ ಕೂಡ ಯಾವುದು ಇಲ್ಲ. ಶ್ರೀಗಳು ಸನ್ನೆ ಮೂಲಕ ಎಂ.ಬಿ ಪಾಟೀಲರ್ ಜೊತೆ ಮಾತನಾಡಿದ್ದಾರೆ. ನಾಳೆ ಬೆಳಗ್ಗೆ 7 ಗಂಟೆಗೆ ಶ್ರೀಗಳ ಮತ್ತೊಂದು ಹೆಲ್ತ್​​ ಬುಲೆಟಿನ್ ಬಿಡುಗಡೆ ಮಾಡುತ್ತೇವೆ ಎಂದು ತಿಳಿಸಿದ್ದಾರೆ.

ನಡೆದಾಡುವ ದೇವರು ಎಂದೇ ಖ್ಯಾತಿ ಪಡೆದಿರುವ ಶ್ರೀಗಳ ಅನಾರೋಗ್ಯದ ವಿಷಯ ತಿಳಿಯುತ್ತಲೇ ಆಶ್ರಮದತ್ತ ಅಪಾರ ಸಂಖ್ಯೆಯಲ್ಲಿ ಭಕ್ತರು ಆಗಮಿಸುತ್ತಿದ್ದಾರೆ. ಮಠ ಆಡಳಿತಾಧಿಕಾರಿಗಳು ವೆಬ್​​ಸೈಟ್​​ನಲ್ಲಿ ಶ್ರೀಗಳನ್ನು ಕಾಣಬಹುದು ಎಂದು ಹೇಳಿದ್ರೂ ಭಕ್ತರು ಮಾತ್ರ ಒಪ್ಪಿಕೊಳ್ಳುತ್ತಿಲ್ಲ. ಇನ್ನು, ಮಠದ ಬಳಿ ಆಗಮಿಸಿದ ಭಕ್ತರಿಗೆ ಮಾಹಿತಿ ನೀಡಿ ವಾಪಸ್​ ಕಳುಹಿಸುವ ಕೆಲಸವನ್ನು ಪೊಲೀಸರು ಮಾಡುತ್ತಿದ್ದಾರೆ.

ಶ್ರೀಗಳ ಭೇಟಿ ಬಳಿಕ ಮಾತನಾಡಿದ ಮಾಜಿ ಸಚಿವ ಎಂಬಿ ಪಾಟೀಲ್, ಸಿದ್ದೇಶ್ವರ ಸ್ವಾಮೀಜಿ ಆರೋಗ್ಯವಾಗಿದ್ದಾರೆ. ನಮ್ಮೆಲ್ಲರ ಜೊತೆ ಸಾವಕಾಶವಾಗಿ ಕೆಲ ಮಾತನಾಡಿದರು. ಬೆಳಗಗೆ ಆಕ್ಸಿಜನ್ ಪ್ರಮಾಣ ಕಡಿಮೆ ಇತ್ತು. ನಾವು ದೇವರಲ್ಲಿ ಪ್ರಾರ್ಥನೆ ಮಾಡೋಣ. ಶೀಘ್ರವೇ ಗುಣಮುಖರಾಗಲಿ.

ನಾನು ಒಳಗಡೆ ಹೋಗಿದ್ದಾಗ ಎರಡೇ ಮಾತು ಆಡಿದ್ರು. ಆಸ್ಪತ್ರೆಗೆ ಕರೆದುಕೊಂಡು ಹೋಗ್ತಾರೆ ಅಂತ ಶ್ರೀಗಳಿಗೆ ಆತಂಕ ಇತ್ತು. ಹೀಗಾಗಿ ಇಲ್ಲೇ ಇರಬೇಕು ಅಂತ ಸನ್ನೆ ಮಾಡಿದರು. ಯಾವುದೇ ವದಂತಿಗಳಿಗೆ ಕಿವಿಗೊಡಬೇಡಿ. ನಾಳೆ ಮಾಜಿ ಸಿಎಂ ಸಿದ್ದರಾಮಯ್ಯ ಅವರು ಆಗಮಿಸಲಿದ್ದಾರೆ ಎಂದು ತಿಳಿಸಿದರು.

ಇಳಕಲ್ಲ ಮಹಾಂತ ಶ್ರೀಗಳು ಮಾತನಾಡಿ, ಶ್ರೀಗಳು ಆರಾಮ ಅದಾರ. ಕನೇರಿ ಅಪ್ಪಗೋಳ ಒಳಗ ಅದಾರ. ಪ್ರಜ್ಞೆ ಬಹಳ ಚೆನ್ನಾಗಿದೆ. ಕೈ ಸನ್ನೆ ಮೂಲಕ ಎಲ್ಲಾ ತೋರಿಸುತ್ತಾರೆ. ಎಂಟು ದಿನಗಳಿಂದ ಮಾತೇ ಇರಲಿಲ್ಲ. ಸದ್ಯ ಮಾತಾಡುತ್ತಿಲ್ಲ, ಆದರೆ ಸನ್ನೆ, ಬಾಯಿ ಸನ್ನೆ ಮಾಡುತ್ತಾರೆ. ಬಸವಾದಿ ಶರಣರ ಅನುಗ್ರಹದಿಂದ ಬೇಗ ಚೇತರಿಸಿಕೊಳ್ಳಲಿ ಎಂದರು.

ಇನ್ನು, ಶ್ರೀಗಳ ಆರೋಗ್ಯ ಕುರಿತಂತೆ ಆತಂಕ ಪಡುತ್ತಿದ್ದ ಭಕ್ತರು ಮಠಕ್ಕೆ ಭೇಟಿ ನೀಡಿ ಶ್ರೀಗಳ ದರ್ಶನಕ್ಕಾಗಿ ಕಾದು ಕುಳಿತಿದ್ದರು. ಅಂತಹ ಭಕ್ತರಿಗೆ ಜ್ಞಾನಯೋಗಾಶ್ರಮ ಆವರಣದಲ್ಲಿ ವಿಡಿಯೋ ಮೂಲಕ ದರ್ಶನ ನೀಡಲಾಯಿತು. ಈ ವೇಳೆ ಎಲ್ ಇ ಡಿ ಪರದೆ ಮೇಲೆ ಶ್ರೀಗಳ ದರ್ಶನವಾಗುತ್ತಿದ್ದಂತೆ ಭಕ್ತರು ಭಾವುಕರಾಗಿ ಕಣ್ಣೀರಿಟ್ಟರು.

ಸದ್ಯ ಗಣ್ಯರಿಗೆ ಮಾತ್ರ ಶ್ರೀಗಳ ಭೇಟಿಗೆ ಅವಕಾಶ ನೀಡಲಾಗಿದ್ದು, KPCC ಪ್ರಚಾರ ಸಮಿತಿ ಅಧ್ಯಕ್ಷ ಎಂ ಬಿ ಪಾಟೀಲ್, ಶಾಸಕ ಬಸನಗೌಡ ಪಾಟೀಲ ಯತ್ನಾಳ್, ಬಿವೈ ವಿಜಯೇಂದ್ರ, ಶಾಸಕ ಕುಮಟಳ್ಳಿ ಸೇರಿದಂತೆ ರಾಜಕೀಯ ನಾಯಕರು ಭೇಟಿ ನೀಡಿ ಶ್ರೀಗಳ ದರ್ಶನ ಪಡೆದುಕೊಂಡರು.