Gaganachukki Falls: ಧುಮ್ಮಿಕ್ಕಿ ಹರಿಯುತ್ತಿರುವ ಗಗನಚುಕ್ಕಿ ಜಲಪಾತ ನೋಡಲು ಎರಡು ಕಣ್ಣು ಸಾಲದು..!

ಮಂಡ್ಯ ಜಿಲ್ಲೆಯ ಕೆ.ಆರ್.ಎಸ್ ಜಲಾಶಯ ಬಹುತೇಕ ಭರ್ತಿಯಾಗಿದ್ದು, ಜಲಾಶಯಕ್ಕೆ ಹರಿದು ಬರುತ್ತಿರುವ ಹೆಚ್ಚುವರಿ ನೀರನ್ನು ಡ್ಯಾಂ ಮೂಲಕ ನದಿಗೆ ಹರಿಯ ಬಿಡಲಾಗುತ್ತಿದೆ. ಈಗಾಗಲೇ‌ ಜಲಾಶಯದಿಂದ ಸುಮಾರು 80 ಸಾವಿರ ಕ್ಯೂಸೆಕ್ ನೀರನ್ನ ನದಿಗೆ ಹರಿ ಬಿಡಲಾಗಿದೆ. ಇದರಿಂದಾಗಿ ಬರಡಾಗಿದ್ದ ಕಾವೇರಿ ನದಿಯ ಗಗನಚುಕ್ಕಿ ಜಲಪಾತಕ್ಕೆ ಇದೀಗ ಕಾವೇರಿ ನದಿ ಪ್ರವಾಹ ಹೊಸ ಜೀವಕಳೆ ತಂದುಕೊಟ್ಟಿದೆ.

ಈ ಬಾರಿಯ ಮಳೆಗಾಲ ಹಲವು ತಿಂಗಳಿನಿಂದ ಬರಡಾಗಿದ್ದ ಕಾವೇರಿ ಗಗನಚುಕ್ಕಿ ಜಲಪಾತದ ಸೌಂದರ್ಯಕ್ಕೆ ಮೆರಗು ತಂದುಕೊಟ್ಟಿದೆ. ಮಂಡ್ಯ ಜಿಲ್ಲೆ ಮಳವಳ್ಳಿ ತಾಲೂಕಿನಲ್ಲಿರುವ ಈ ಗಗನಚುಕ್ಕಿ ಜಲಪಾತ ಇದೀಗ ಮತ್ತೆ ತನ್ನ ಹೊಸ ಕಳೆಯೊಂದಿಗೆ ವಯ್ಯಾರದ ಸೊಬಗು ಪ್ರದರ್ಶನ ಮಾಡ್ತಿದೆ.

KRS ಡ್ಯಾಂ ಹೆಚ್ಚಿನ‌ ನೀರು ಹರಿದು ಬರುತ್ತಿರುವ ಕಾರಣದಿಂದ ನದಿಗೆ ನೀರು‌ ಹರಿಯ ಬಿಡಲಾಗಿದೆ. ಇದರ ಜೊತೆಗೆ ಕಬಿನಿಯಿಂದ ಪ್ರವಾಹದ ನೀರು ಹರಿದು ಬರ್ತಿದ್ದು ಈ ಜಲಪಾತ ಮತ್ತೆ ತನ್ನ ಹಿಂದಿನ ಸೊಬಗು ಪಡೆದುಕೊಂಡಿದೆ. ಪ್ರವಾಹ ನೀರಿನಿಂದಾಗಿ ಜಲಪಾತವು ಜೀವ ಕಳೆಯ ಸೊಬಗು ಪಡೆದುಕೊಂಡಿದೆ.

ಪ್ರವಾಹದಿಂದಾಗಿ ಕಾವೇರಿ ಭೋರ್ಗರೆಯುತ್ತಾ ಎತ್ತರದ ಬಂಡೆಯ ಮೇಲಿಂದ ಧುಮ್ಮಿಕ್ಕಿ‌ ಹರಿಯುತ್ತಿದ್ದು, ಶ್ವೇತ ವರ್ಣದ ಸೀರೆಯುಟ್ಟ ನವ ವಧುನಂತೆ ಕಾವೇರಿ ಕಂಗೊಳಿಸ್ತಿದಾಳೆ.

ನೂರಾರು ಅಡಿ ಮೇಲಿಂದ ಹಾಲ್ನೊರೆಯಂತೆ ಕೆಳಗೆ ಬೀಳ್ತಿರೋ ಕಾವೇರಿ ಈ ಪ್ರಕೃತಿ‌ ವೈಭವದ ಈ ಸೊಬಗು ನೋಡಲು ಈಗ ಹೆಚ್ಚಿನ ಪ್ರವಾಸಿಗರು ಇತ್ತ ಬರ್ತಿದ್ದಾರೆ.

ಧುಮ್ಮಿಕ್ಕಿ ಎತ್ತರದ ಬಂಡೆಯ ಮೇಲಿಂದ ಭೋರ್ಗೆರೆಯತ್ತಿರುವ ಕಾವೇರಿ ಸೊಬಗನ್ನು ಸೆಲ್ಫಿಯೊಂದಿಗೆ ಪ್ರವಾಸಿಗರು ಆಸ್ವಾದಿಸುತ್ತಾ ಕಾವೇರಿ ಜಲ ವೈಭವವನ್ನು ಕಣ್ತುಂಬಿಕೊಂಡು ಸಂಭ್ರಮಿಸ್ತಿದ್ದಾರೆ.

ಒಟ್ಟಾರೆ ಮಂಡ್ಯದ ಗಗನಚುಕ್ಕಿ ಜಲಪಾತ ಪ್ರವಾಹದಿಂದಾಗಿ ಮತ್ತೆ ಸೊಬಗನ್ನು ಮೈದುಂಬಿಕೊಂಡಿದೆ. ತನ್ನ ಪ್ರಕೃತಿ ಸೊಬಗಿನಿಂದಲೇ ಪ್ರವಾಸಿಗರನ್ನು ಇದೀಗ ತನ್ನತ್ತಾ ಕೈಬೀಸಿ ಕರೆಯುತ್ತಿದೆ. ಮಳೆಗಾದ ಪ್ರಕೃತಿ ಸೊಬಗು ಕಣ್ತಿಂಬಿಕೊಳ್ಳಲು ಕೊರೊನಾ ಆತಂಕದ ನಡುವೆ ಕೂಡ ಪ್ರವಾಸಿಗರು ಸೂಜಿ ಗಲ್ಲಿನಂತೆ ಆಕರ್ಷಿತರಾಗ್ತಿರೋದು ಮಾತ್ರ ಸುಳ್ಳಲ್ಲ.