ನೆರೆಗೆ ಕೊಚ್ಚಿಹೋದ ಬದುಕು; ಒಂದೂವರೆ ವರ್ಷದಿಂದ ಮುರಿದ ಶಾಲೆಯಲ್ಲೇ ದಿನದೂಡುತ್ತಿರುವ ಕುಟುಂಬ; ತಿರುಗಿಯೂ ನೋಡದ ಅಧಿಕಾರಿಗಳು

2018ರಲ್ಲಿ ಮಲೆನಾಡಲ್ಲಿ ಸುರಿದ ಮಳೆ ಆ ಕುಟುಂಬವನ್ನು ಸಂಪೂರ್ಣ ಬೀದಿಗೆ ತಂದಿತ್ತು. ಮನೆಯ ಗೋಡೆಗಳು ಬಿರುಕು ಬಿಟ್ಟು ಕುಸಿಯುತ್ತಿದ್ದಾಗ ಅಧಿಕಾರಿಗಳು ಅವರಿಗೆ ನೆಲೆ ಕೊಟ್ಟಿದ್ದು ಸರ್ಕಾರಿ ಶಾಲೆಯಲ್ಲಿ. ಮುಚ್ಚಿದ ಸರ್ಕಾರ ಶಾಲೆಯಲ್ಲಿ ಸಂಸಾರ ಆರಂಭಿಸಿದ ಆ ಕುಟುಂಬಕ್ಕೆ ಒಂದೂವರೆ ವರ್ಷಗಳಿಂದ ಬಿಡುಗಡೆಯ ಭಾಗ್ಯವೇ ಸಿಕ್ಕಿಲ್ಲ.

ಜನವರಿ, ಫೆಬ್ರವರಿ, ಮಾರ್ಚ್‍ಗೆ ಮನೆ ಎಂದು ಹೇಳುತ್ತಿರುವ ಸರ್ಕಾರ ಒಂದೂವರೆ ವರ್ಷದಿಂದ ಅತ್ತ ತಿರುಗಿಯೂ ನೋಡಿಲ್ಲ. ಆಗೊಮ್ಮೆ-ಈಗೊಮ್ಮೆ ಬರುವ ಅಧಿಕಾರಿಗಳು ಬರುತ್ತೆ-ಬರುತ್ತೆ ಅಂತ ಭರವಸೆಯ ಮನೆಯನ್ನೇ ಕಟ್ಟುತ್ತಿದ್ದಾರೆ. ಇದು ಕಾಫಿನಾಡ ನೊಂದ ಕುಟುಂಬದ ಕಥೆ.

ಬಿರುಕು ಬಿಟ್ಟ ಸೂರು. ಕುಸಿದು ಬಿದ್ದ ಮನೆ. ಮನೆ ಸ್ಥಿತಿ ಕಂಡು ಕಂಗಲಾದ ಯಜಮಾನ. ಕತ್ತಲ ಕೋಣೆಯಲ್ಲಿ ಅಡುಗೆ ಮಾಡುತ್ತಿರುವ ಯಜಮಾನಿ. ಅದು ಸರ್ಕಾರಿ ಶಾಲೆಯಲ್ಲಿ. ಇಂತಹ ಕರುಣಾಜನಕ ಕಥೆಗೆ ಸಾಕ್ಷಿಯಾಗಿದ್ದು ಚಿಕ್ಕಮಗಳೂರು ಜಿಲ್ಲೆ ಕೊಪ್ಪ ತಾಲೂಕಿನ ಹುಲಿಗರಡಿ ಗ್ರಾಮದ ರಾಘವೇಂದ್ರ-ಶಾಂಭವಿ ದಂಪತಿ.

ಯಾಕೆಂದರೆ, 2018ರಲ್ಲಿ ಮಲೆನಾಡ ಜಲಪ್ರಳಯಕ್ಕೆ ಇವರ ಮನೆ ಸಂಪೂರ್ಣ ಕುಸಿದು ಬಿದ್ದಿತ್ತು. ಹಾಗಾಗಿ, 2018 ಆಗಸ್ಟ್ 25ನೇ ತಾರೀಕಿನಂದೇ ಅಧಿಕಾರಿಗಳು ಮುಚ್ಚಿದ ಶಾಲಾ ಕೊಠಡಿಗೆ ತಂದು ಬಿಟ್ಟಿದ್ದರು. ಅಂದಿನಿಂದ ಇಲ್ಲೇ ಬದುಕು ಸಾಗಿಸುತ್ತಿದ್ದಾರೆ.

ಅಡುಗೆ, ಊಟ, ವಾಸ, ನಿದ್ರೆ ಎಲ್ಲಾ ಇಲ್ಲೆ. ಸ್ನಾನಕ್ಕೆ ಬಾತ್ ರೂಂ ಇಲ್ಲ. ಶೌಚಾಲಯವನ್ನು ಕೇಳೋದೇ ಬೇಡ. ತಾತ್ಕಾಲಿಕವಾಗಿರಿ ಎಂದ ಅಧಿಕಾರಿಗಳು ಒಂದೂವರೆ ವರ್ಷದಿಂದ ಇವರಿಗೆ ಮನೆ ಕಟ್ಟಿಸಿಕೊಡುವುದರಲ್ಲೇ ಇದ್ದಾರೆ. ಬಂದವರು ತಿಂಗಳುಗಳ ಹೆಸರು ಹೇಳಿ ಹೋಗುತ್ತಿದ್ದಾರೆ ವಿನಃ ಬದಲಿ ವ್ಯವಸ್ಥೆ ಮಾಡಿಲ್ಲ. ಇವರ ಬದುಕಿನ ಶೈಲಿ ನೋಡಿದರೆ ಸರ್ಕಾರ ಇದೆಯಾ ಅದು ಬೇಕಾ ಅನಿಸುತ್ತದೆ.

ಮಲೆನಾಡು ಈ ಬಾರಿಯೂ ಭೀಕರ ಜಲಪ್ರಳಯಕ್ಕೆ ಸಾಕ್ಷಿಯಾಗಿತ್ತು. ನಿರಾಶ್ರಿತರು-ನಿರ್ಗತಿಕರಾದವರು ಸಾವಿರಾರು ಜನ. ಅವರಿಗೆ ತಕ್ಕಮಟ್ಟಿಗೆ ಪರಿಹಾರ ಸಿಕ್ಕಿದೆ. ಆದರೆ, ವಿಪರ್ಯಾಸವೋ-ದುರಂತವೋ ಈ ಕಟುಂಬಕ್ಕೆ 2018ರ ಮಳೆಗೆ ಸೂರು ಕಳೆದುಕೊಂಡರು. ಇಲ್ಲಿಯವರೆಗೆ ಒಂದೇ ಒಂದು ರೂಪಾಯಿ ಬಂದಿಲ್ಲ. ಮನೆ ಕನಸಿನ ಮಾತಾಗಿದೆ.

ಚುನಾವಣೆ ಸಂದರ್ಭದಲ್ಲಿ ಇದೇ ಶಾಲೆ ಕೊಠಡಿ ಬೂತ್ ಆಗಿತ್ತು. ಆಗ ಬಂದಿದ್ದ ತಹಶೀಲ್ದಾರ್ ಇನ್ನೂ ಸಿಕ್ಕಿಲ್ವಾ? ಇವರಿಗೆ ಬೇಗ ಮನೆ ಕೊಡಿ ಎಂದು ಅಧಿಕಾರಿಗಳಿಗೆ ಹೇಳಿದ್ದರು. ಆದರೆ ಎಲೆಕ್ಷನ್ ಮುಗಿದ ಮೇಲೆ ಎಲ್ಲರೂ ಮರೆತರು. ಶಾಸಕರಂತೂ ಬಂದೇ ಇಲ್ಲ. ಇನ್ನು ಅಧಿಕಾರಿಗಳು ಬಂದರೂ ಉಪಯೋಗವಿಲ್ಲ. ಒಂದು ಎಕರೆ ಅಡಿಕೆ ತೋಟ ಹಳದಿ ಎಲೆ ರೋಗಕ್ಕೆ ತುತ್ತಾಗಿದೆ. ಇರೋ ಮಗನನ್ನ ಹಾಸ್ಟೆಲ್‍ನಲ್ಲಿ ಬಿಟ್ಟು ಕೂಲಿ ಮಾಡುತ್ತಾ ಸರ್ಕಾರದ ನೆರವಿನ ಹಾದಿ ಕಾಯುತ್ತಿದ್ದಾರೆ.

ಪಾಪ, ಈ ಮುಗ್ಧ ಹಳ್ಳಿಗರು ಯಾರ ಬಗ್ಗೆಯೂ ಅಸಮಾಧಾನ ತೋರುತ್ತಿಲ್ಲ. ಸರ್, ನಮಗೊಂದು ಮನೆ ಕಟ್ಟಿಸಿಕೊಡಿ, ಅಂತ ಅಂಗಲಾಚುತ್ತಾರೆ. ಇವರ ಮುಗ್ಧತೆಯನ್ನೇ ಬಂಡವಾಳ ಮಾಡಿಕೊಂಡಿರುವ ಅಧಿಕಾರಿಗಳು ಅತ್ತ ತಲೆ ಹಾಕಿಲ್ಲ. ಹೋದರೂ ಸಮಾಧಾನ ಮಾಡುವುದನ್ನು ಚೆನ್ನಾಗಿ ಕಲಿತಿದ್ದಾರೆ.