Shivamogga: ಮದುವೆಯಾಗು, ಇಲ್ಲ ಸತ್ತು ಹೋಗು; ಕಿರುಕುಳಕ್ಕೆ ಯುವತಿ ಆತ್ಮಹತ್ಯೆ

20 ವರ್ಷದ ಸುಮಾ ಆತ್ಮಹತ್ಯೆಗೆ ಶರಣಾದ ಯುವತಿ. 2019ರಲ್ಲಿ ಸುಮಾ ಮದುವೆ ನ್ಯಾಮತಿ‌ ಮೂಲದ ಪ್ರವೀಣ್ ಎಂಬಾತನ ಜೊತೆ ನಿಶ್ಚಯವಾಗಿತ್ತು. ನಿಶ್ಚಿತಾರ್ಥ ಸಹ ನಡೆದಿತ್ತು.

ಯುವಕನ ಕಡೆಯವರು ಬೇಗ ಮದುವೆ ಮಾಡಿಕೊಡುವಂತೆ ಸುಮಾ ಕುಟುಂಬಸ್ಥರ ಮೇಲೆ ಒತ್ತಡ ಹಾಕಿದ್ದರು. ಆದ್ರೆ ಮಗಳ ಓದಿನ ಹಿನ್ನೆಲೆ ಕುಟುಂಬಸ್ಥರು ಮದುವೆ ಮುಂದೂಡುತ್ತಾ ಬಂದಿದ್ದಾರೆ.

ಸದ್ಯ ಸುಮಾ ನಗರದ ಖಾಸಗಿ ಕಾಲೇಜಿನಲ್ಲಿ ಎಂಸಿಎ ಎರಡನೇ ವರ್ಷ ವ್ಯಾಸಂಗ ಮಾಡುತ್ತಿದ್ದರು. ಪ್ರವೀಣ್ ಸೇರಿದಂತೆ ಆತನ ಕುಟುಂಬಸ್ಥರು ಸುಮಾ ಮೇಲೆಯೂ ಬೇಗ ಮದುವೆ ಆಗುವಂತೆ ಒತ್ತಡ ಹಾಕುತ್ತಿದ್ದರು.

ಈ ನಡುವೆ ಪ್ರವೀಣ್ ತನ್ನನ್ನು ಮದುವೆ ಆಗುವಂತೆ ಫೋನ್‌ನಲ್ಲಿ ಒತ್ತಾಯ ಮಾಡುತ್ತಿದ್ದ ಎನ್ನಲಾಗುತ್ತಿದೆ. ಪ್ರವೀಣ್ ಮತ್ತು ಆತನ ಕುಟುಂಬಸ್ಥರು ಮದುವೆಯಾಗು ಅಥವಾ ಇಲ್ಲವಾದ್ರೆ ಸತ್ತು ಹೋಗು ಎಂದು ಹೇಳಿದ್ದರಂತೆ.

ಇವರ ಮಾತುಗಳಿಂದ ನೊಂದ ಸುಮಾ ಬೊಮ್ಮನಕಟ್ಟೆ ನಿವಾಸದಲ್ಲಿ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದರು. ಕೂಡಲೇ ಪೋಷಕರು ಸುಮಾಳನ್ನು ನಗರದ ಮೆಗ್ಗಾನ್ ಆಸ್ಪತ್ರೆಗೆ ದಾಖಲಿಸಿದ್ದರು.

ನಂತರ ಹೆಚ್ಚಿನ ಚಿಕಿತ್ಸೆಗಾಗಿ ಫೆಬ್ರವರಿ 10ರಂದು ಸುಮಾಳನ್ನು ಮೆಗ್ಗಾನ್ ಆಸ್ಪತ್ರೆಯಿಂದ ಮಣಿಪಾಲ ಆಸ್ಪತ್ರೆಗೆ ಶಿಫ್ಟ್ ಮಾಡಲಾಗಿತ್ತು. ಆದ್ರೆ ಚಿಕಿತ್ಸೆ ಫಲಕಾರಿಯಾಗದೇ ಸುಮಾ ಮೃತಳಾಗಿದ್ದಾಳೆ.

ಈ ಸಂಬಂಧ ಸುಮಾ ತಾಯಿ ನೀಡಿದ ದೂರಿನ ಅನ್ವಯ ಪ್ರವೀಣ್ ಸೇರಿದಂತೆ ಐವರ ವಿರುದ್ಧ ಎಫ್​ಐಆರ್​ ದಾಖಲಾಗಿದೆ.