PM Kisan: 18 ಲಕ್ಷ ರೂಪಾಯಿ ಆರ್ಥಿಕ ಸಹಾಯ, ರೈತರಿಗೆ ಕೇಂದ್ರ ಸರ್ಕಾರದ ಯೋಜನೆ, ಹಣ ಪಡೆಯುವುದು ಹೇಗೆ? ಡೀಟೆಲ್ಸ್...

ರೈತರ ಶ್ರೇಯೋಭಿವೃದ್ಧಿಗೆ, ಅವರ ಬೆಂಬಲಕ್ಕಾಗಿ ಕೇಂದ್ರ ಸರ್ಕಾರ ಅನೇಕ ಯೋಜನೆಗಳನ್ನು ಪರಿಚಯಿಸಿದೆ. ಆದರೆ ಕಿಸಾನ್ ಯೋಜನೆ ಉಳಿದ ಯೋಜನೆಗಳಂತಲ್ಲ. ಈ ಯೋಜನೆಯಡಿಯಲ್ಲಿ ರೈತರಿಗೆ ನೇರವಾಗಿ ಹಣವನ್ನೇ ನೀಡಲಾಗುತ್ತದೆ.

ರೈತರಿಗೆ 18 ಲಕ್ಷ ರೂಪಾಯಿ ನಗದು ಹಣವನ್ನು ಸಹಾಯಧನವಾಗಿ ನೀಡುವ ಈ ಯೋಜನೆಯ ಹೆಸರು PM Kisan FPVO (Farmers Producer Organization) scheme. ಈ ಯೋಜನೆಯ ಪ್ರಯೋಜನಗಳೇನು ಎನ್ನುವ ವಿವರ ಇಲ್ಲಿದೆ.

ಸಣ್ಣ ರೈತರಿಗೆ ಕೃಷಿ ಉತ್ಪನ್ನಗಳ ಮಾರಾಟ, ಮಾರುಕಟ್ಟೆಯ ಬಗ್ಗೆ ಮಾಹಿತಿ, ತಂತ್ರಜ್ಞಾನದ ಬಳಕೆ ಸೇರಿದಂತೆ ಹೆಚ್ಚು ಇಳುವರಿ ಪಡೆದು ಆರ್ಥಿಕ ಸ್ವಾವಲಂಬನೆಗೆ ಉತ್ತೇಜನ ನೀಡಲು ಪ್ರಧಾನಿ ನರೇಂದ್ರ ಮೋದಿ ಈ ಯೋಜನೆಯನ್ನು ಜಾರಿಗೆ ತಂದಿದ್ದಾರೆ. ಇದು 5 ವರ್ಷಗಳಲ್ಲಿ ದೇಶದಾದ್ಯಂತ ಸುಮಾರು 1000 ಪಿಎಂ ಕಿಸಾನ್ ಕೇಂದ್ರಗಳನ್ನು ತೆರೆಯುವ ಉದ್ದೇಶ ಹೊಂದಿದೆ.

ಈ ಯೋಜನೆ ರೈತರಿಗೆ ಸಣ್ಣ ಪ್ರಮಾಣದ ಕೃಷಿ ಆಧಾರಿತ ವ್ಯವಹಾರವನ್ನು ಸ್ಥಾಪಿಸಲು ಅನುಕೂಲ ಮಾಡಿಕೊಡುತ್ತದೆ. ಇದರಂತೆ 11 ರೈತರು ಜೊತೆಯಾಗಿ ವ್ಯವಹಾರ ಆರಂಭಿಸಬೇಕಾಗುತ್ತದೆ.

3 ವರ್ಷಗಳ ಕಾಲಾವಧಿಯಲ್ಲಿ ಹಂತಹಂತವಾಗಿ ರೈತರಿಗೆ ಈ ಬೆಂಬಲದ ಹಣ ನೀಡಲಾಗುತ್ತದೆ. ಸಣ್ಣ ರೈತರಿಗೆ ಹೆಚ್ಚಿನ ತಂತ್ರಜ್ಞಾನದ ಬಳಕೆ ಮಾಡಲು ಸಾಧ್ಯವಾಗುವುದಿಲ್ಲ. ಹಾಗಾಗಿ ರೈತರು ಈ ರೀತಿ ಗುಂಪಾಗಿ ಕೆಲಸ ಮಾಡಿದರೆ ಉತ್ತಮ ತಂತ್ರಜ್ಞಾನ, ಯಂತ್ರೋಪಕರಣಗಳನ್ನು ಕೊಳ್ಳಲು ಯೋಜನೆ ಸಹಾಯ ಮಾಡುತ್ತದೆ. ಇದರಿಂದ ಎಲ್ಲಾ ರೈತರೂ ಆಧುನಿಕ ಯಂತ್ರೋಪಕರಣಗಳನ್ನು ಬಳಸಿಕೊಂಡು ಉತ್ತಮ ಇಳುವರಿ ಪಡೆಯುವತ್ತ, ಹೆಚ್ಚು ಲಾಭ ಗಳಿಸುವತ್ತ ಗಮನ ಹರಿಸಬಹುದಾಗಿದೆ.

2023ನೇ ಇಸವಿಯ ವೇಳೆಗೆ ದೇಶದಾದ್ಯಂತ 6885 ಕೋಟಿ ರೂಪಾಯಿಗಳನ್ನು ಈ ಯೋಜನೆಗೆ ನೀಡಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. 18 ಲಕ್ಷ ರೂಪಾಯಿ ಹಣವನ್ನು ಪಡೆದರೆ ರೈತರಿಗೆ ಹೆಚ್ಚಿನ ಅನುಕೂಲವಾಗುವುದಂತೂ ಖಂಡಿತಾ.