Congress Guarantee: 2 ಸಾವಿರ ಪಡೆಯಲು 'ಗೃಹಲಕ್ಷ್ಮಿ'ಯರ ಸಾಹಸ, ಆಧಾರ್ ಜೋಡಣೆಗೆ ಸೈಬರ್ ಸೆಂಟರ್ ಮುಂದೆ ಮಹಿಳೆಯರ ಕ್ಯೂ!

ಕೋಲಾರ: ಜಿಲ್ಲೆಯ ಕೆಜಿಎಫ್​ ನಗರದ ಬ್ರೌಸಿಂಗ್​ ಸೆಂಟರ್​​ಗಳ ಮೇಲೆ ತಹಶೀಲ್ದಾರ್​ ಹಾಗೂ ರಾಬರ್ಟ್ ಸನ್ ಪೇಟೆ ಪೊಲೀಸರ ತಂಡ ದಾಳಿ ನಡೆಸಿದ್ದು, ಅನಗತ್ಯವಾಗಿ ಮಹಿಳೆಯರಿಂದ ಆಧಾರ್​ ಕಾರ್ಡ್​​, ರೇಷನ್​ ಕಾರ್ಡ್​​ ಲಿಂಕ್​ ಮಾಡ್ತೇವೆ ಅಂತ ಹಣ ವಸೂಲಿ ಮಾಡುತ್ತಿದ್ದವರಿಗೆ ಬ್ರೇಕ್ ಹಾಕಿದ್ದಾರೆ.

ರಾಜ್ಯ ಸರ್ಕಾರದ ಗ್ಯಾರಂಟಿ ಗೃಹ ಲಕ್ಷ್ಮೀ ಯೋಜನೆಗಾಗಿ ರೇಷನ್ ಕಾರ್ಡ್ ಮತ್ತು ಆಧಾರ್ ಕಾರ್ಡ್​ ಲಿಂಕ್‌ ಮಾಡಬೇಕು ಎಂಬ ಗಾಳಿ ಸುದ್ದಿ ನಗರದಲ್ಲಿ ಹಬ್ಬಿತ್ತು. ಇದನ್ನೇ ನಿಜ ಎಂದು ನಂಬಿದ್ದ ಮಹಿಳೆಯರು ಕಾಮನ್​ ಸರ್ವೀಸ್ ಸೆಂಟರ್​ಗೆ ಲಗ್ಗೆ ಇಟ್ಟು, ಕ್ಯೂ ನಿಂತಿದ್ದರು.

ಈ ಹಿನ್ನೆಲೆಯಲ್ಲಿ ತಹಶೀಲ್ದಾರ್ ಅವರ ನೇತೃತ್ವದಲ್ಲಿ ಕೆಜಿಎಫ್ ನಗರದ ಬಸ್ ನಿಲ್ದಾಣ, ರಾಬರ್ಟ್ ಸನ್ ಪೇಟೆ ಮೊದಲ ಕ್ರಾಸ್ ಸೇರಿದಂತೆ ಹಲವೆಡೆ ದಾಳಿ ನಡೆಸಿದ್ದಾರೆ. ಅಲ್ಲದೇ ಬ್ರೌಸಿಂಗ್ ಸೆಂಟರ್ ಗಳಲ್ಲಿ ಜಮಾಯಿಸಿದ್ದ ಮಹಿಳೆಯರಿಗೆ ಅರಿವು ಮೂಡಿಸುವ ಕೆಲಸ ಮಾಡಿದ್ದಾರೆ.

ಇನ್ನು, ಅಧಿಕಾರಿಗಳು ದಾಳಿ ಮಾಡುತ್ತಿದ್ದಂತೆ ಕ್ಯೂ ನಿಂತಿದ್ದ ಜನರು ಸ್ಥಳದಿಂದ ಪರಾರಿಯಾಗಿದ್ದಾರೆ. ಇನ್ನು, ರೇಷನ್ ಕಾರ್ಡ್ ಮತ್ತು ಆಧಾರ್ ಲಿಂಕ್ ಗೆ 250 ರೂಪಾಯಿ ಹಣ ವಸೂಲಿ ಮಾಡುತ್ತಿದ್ದ ಕೆಲ ಸೈಬರ್ ಸೆಂಟರ್ ಸಿಬ್ಬಂದಿಗೂ ಪೊಲೀಸರು ವಾರ್ನಿಂಗ್ ಕೊಟ್ಟಿದ್ದಾರೆ.

ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಕೆಜಿಎಫ್ ತಹಶೀಲ್ದಾರ್​ ಶ್ರೀನಿವಾಸ್ ಅವರು, ಈಗಾಗಲೇ ಇಂತಹ 6 ಸೈಬರ್ ಸೆಂಟರ್ ಮಾಲೀಕರ ವಿರುದ್ದ ಪ್ರಕರಣ ದಾಖಲು ಮಾಡಿದ್ದೇವೆ ಎಂದು ತಿಳಿಸಿದ್ದಾರೆ.

ಅಲ್ಲದೇ, ರಾಜ್ಯ ಸರ್ಕಾರದ ಗೃಹಲಕ್ಷ್ಮೀ ಯೋಜನೆಗೆ ರೇಷನ್ ಕಾರ್ಡ್ ಜೊತೆಗೆ ಆಧಾರ್ ಕಾರ್ಡ್ ಲಿಂಕ್ ಮಾಡಬೇಕೆಂಬ ವದಂತಿ ಹಬ್ಬಿದೆ. ಸೈಬರ್ ಸೆಂಟರ್ ಗಳ ಎದುರು ಸಾಲುಗಟ್ಟಿ ಮಹಿಳೆಯರು ನಿಂತಿದ್ದರು. ಈ ಬಗ್ಗೆ ಜನರಲ್ಲಿ ಗೊಂದಲ ಏರ್ಪಟ್ಟಿದೆ, ರಾಜ್ಯ ಸರ್ಕಾರದ ಗೃಹಲಕ್ಷ್ಮೀ ಯೋಜನೆ ಪಡೆಯಲು, ರೇಷನ್ ಕಾರ್ಡ್, ಆಧಾರ್ ಕಾರ್ಡ್ ಜೋಡಣೆ ಮಾಡಬೇಕಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ.

ಘಟನೆ ಸಂಬಂಧ 5 ಸೈಬರ್ ಸೆಂಟರ್ ಮಾಲೀಕರ ವಿರುದ್ಧ ಎಫ್​​ಐಆರ್​ ದಾಖಲು ಮಾಡಲಾಗಿದೆ. ರಾಜ್ಯ ಸರ್ಕಾರದಿಂದ ಅರ್ಜಿ ಸಲ್ಲಿಸುವ ಪ್ರಕ್ರಿಯೆಯೂ ಆರಂಭಿಸಿಲ್ಲ, ಸರ್ಕಾರದ ಯೋಜನೆ ಪಡೆಯಲು, ಸರ್ಕಾರಿ ಕಚೇರಿಯಿಂದಲೇ ಪ್ರಕ್ರಿಯೆ ಶುರು ಮಾಡುತ್ತೇನೆ ಎಂದು ಇದೇ ಸಂದರ್ಭದಲ್ಲಿ ಅಧಿಕಾರಿ ಮಾಹಿತಿ ನೀಡಿದ್ದಾರೆ.