Bengaluru: ಲೈವ್​​ ಬ್ಯಾಂಡ್​​ನಲ್ಲಿ ಯುವತಿಯರ ಡ್ಯಾನ್ಸ್​ ನೋಡಲು ಕಳ್ಳತನವನ್ನೇ ವೃತ್ತಿಯನ್ನಾಗಿಸಿಕೊಂಡಿದ್ದ ಗ್ಯಾಂಗ್ ಅಂದರ್

ಬೆಂಗಳೂರು: ಕಳ್ಳರ ಕಳ್ಳ, ಕುಳ್ಳ ಕಳ್ಳ, ಕಳ್ಳ ಮಳ್ಳ ಹೀಗೆ ಹಲವು ಸಿನಿಮಾಗಳನಲ್ಲಿ ಕಳ್ಳರನ್ನು ಹೀರೋಗಳನ್ನಾಗಿ ಮಾಡಿದ್ದಾರೆ. ಆದರೆ ಸಿನಿಮಾಗಳಲ್ಲಿ ನಾವು ನೋಡುವ ಟಫ್ ವಿಲನ್ ಗಳಿಗಿಂತ ನಿಜವಾದ ಕಳ್ಳರೇ ಹೆಚ್ಚು ಅಪಾಯಕಾರಿ! ಕಳ್ಳರ ದೃಷ್ಟಿಯಲ್ಲಿ ಕಳ್ಳತನ ಒಂದು ಕಲೆ. 64 ಕಲೆಗಳಲ್ಲಿ ಎಲ್ಲರಿಗೂ ಸಾಧ್ಯವಾಗದ ಅದ್ಭುತ ಕಲೆ ಎಂದು ಪರಿಗಣಿಸಲಾಗಿದೆ.

ಮೇಲಾಗಿ ತಾವು ಮಾಡುವ ಕೆಲಸ ಕೆಟ್ಟದ್ದಾದರೂ ಅದನ್ನು ಕ್ರಮಬದ್ಧವಾಗಿ ಮಾಡುತ್ತೇವೆ ಎಂದು ಹೆಮ್ಮೆಯಿಂದ ಹೇಳುತ್ತಾರೆ. ಇದೇ ರೀತಿ ನಗರದಲ್ಲಿ ಐಷಾರಾಮಿ ಜೀವನಕ್ಕಾಗಿ ಕಳ್ಳತನವನ್ನೇ ವೃತ್ತಿಯನ್ನಾಗಿಸಿಕೊಂಡಿದ್ದ ಗ್ಯಾಂಗ್​ ಒಂದನ್ನು ಬಂಧನ ಮಾಡಿರುವ ಪೊಲೀಸರು, ಹೆಡೆಮುರಿ ಕಟ್ಟಿದ್ದಾರೆ.

ಲೈವ್ ಬ್ಯಾಂಡ್​​ನಲ್ಲಿ ಯುವತಿಯರ ಡ್ಯಾನ್ಸ್ ನೋಡಲು ಹಾಗೂ ಐಷಾರಾಮಿ ಜೀವನಕ್ಕೆ ಮಾರುಹೋಗಿ ಕಳ್ಳತನವನ್ನೇ ವೃತ್ತಿಯನ್ನಾಗಿಸಿಕೊಂಡಿದ್ದ ಐವರು ಆರೋಪಿಗಳನ್ನು ಸಿಟಿ ಮಾರ್ಕೆಟ್ ಪೊಲೀಸರು ಬಂಧಿಸಿದ್ದಾರೆ.

ಮಹಮದ್ ಆಲಿಂ, ರಿಜ್ವಾನ್ ಖಾನ್, ವಾಸೀಂ ಅಹಮದ್, ಮಹಮದ್ ಫರಸ್, ತಬ್ರೇಜ್ ಬಂಧಿತ ಆರೋಪಿಗಳಾಗಿದ್ದಾರೆ. ರಾತ್ರಿ ವೇಳೆ ಲೈವ್ ಬ್ಯಾಂಡ್‌ ಡ್ಯಾನ್ಸ್ ನೋಡಲು ಹಗಲು ವೇಳೆ ಕಳ್ಳತನ, ದರೋಡೆಯನ್ನೇ ವೃತ್ತಿಯನ್ನಾಗಿ ಮಾಡುತ್ತಿದ್ದರು. ಕೈಗೆ ಸಿಕ್ಕ ಸಿಕ್ಕ ವಸ್ತುಗಳನ್ನು ಕಳ್ಳತನ ಮಾಡಿ ಬಂದ ಹಣದಲ್ಲಿ ಶೋಕಿ ಜೀವನ ಮಾಡುತ್ತಿದ್ದರು.

ದರೋಡೆಗೆ ಹೊಂಚು ಹಾಕಿದ್ದಾಗ ಸಿಟಿ ಮಾರ್ಕೆಟ್ ಪೊಲೀಸರ ಕೈಗೆ ಆರೋಪಿಗಳು ರೆಡ್​​ಹ್ಯಾಂಡೆಡ್​​ ಆಗಿ ಸಿಕ್ಕಿಬಿದ್ದಿದ್ದು, ಮಾರಾಕಾಸ್ತ್ರಗಳೊಂದಿಗೆ ದರೋಡೆಗೆ ನಿಂತಿದ್ದ ಗ್ಯಾಂಗ್ ಅನ್ನು ಬಂಧಿಸಿ, ಮಾರಾಕಾಸ್ತ್ರಗಳನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.

ಆರೋಪಿಗಳ ವಿಚಾರಣೆ ವೇಳೆ ಬಂಧಿತರಿಗೆ ಲೈವ್ ಬ್ಯಾಂಡ್ ಹುಚ್ಚು ಸೇರಿ ಹಲವು ಕೃತ್ಯಗಳು ಬೆಳಕಿಗೆ ಬಂದಿದೆ. ನಗರದ ಸಿಟಿ ಮಾರ್ಕೆಟ್, ಕಾಟನ್ ಪೇಟೆ, ಡಿಜೆ ಹಳ್ಳಿ ಸುತ್ತಮುತ್ತ ಕೂಡ ಆರೋಪಿಗಳು ಬೈಕ್ ಕಳ್ಳತನ ಮಾಡುತ್ತಿದ್ದರು.

ಅಲ್ಲದೇ ಬಸ್​ಗಳಲ್ಲಿ ಸಿಕ್ಕ ಸಿಕ್ಕವರ ಮೊಬೈಲ್ ಕದ್ದು ಪರಾರಿಯಾಗುತ್ತಿದ್ದರು. ಬಂಧಿತರಿಂದ ಆರು ಬೈಕ್, 8 ಮೊಬೈಲ್ ಫೋನ್ ವಶಕ್ಕೆ ಪಡೆದುಕೊಂಡಿದ್ದು, ಸಿಟಿ ಮಾರ್ಕೆಟ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.