Bengaluru Roads: ದೇಶದ ಮೊಟ್ಟ ಮೊದಲ ರ‍್ಯಾಪಿಡ್‌ ರಸ್ತೆಯಲ್ಲಿ ಬಿರುಕು, ಕಿತ್ತು ಬರ್ತಿದೆ ಕಾಂಕ್ರಿಟ್!

ದೇಶದ ಪ್ರಥಮ ರ್ಯಾಪಿಡ್ ರಸ್ತೆ ನಿರ್ಮಾಣ ಮಾಡಿದ ಖ್ಯಾತಿಯನ್ನು ಬಿಬಿಎಂಪಿ ಪಡೆದುಕೊಂಡಿತ್ತು. ಆದರೆ ಪಾಲಿಕೆಯ ಮತ್ತೊಂದು ಹೊಸ ಕಾಮಗಾರಿಯಲ್ಲಿ ಕಳಪೆ‌ ಕಾಮಗಾರಿ ಪ್ರದರ್ಶನಗೊಂಡಿದೆ.

ರಾಜಧಾನಿಯ ಹಳೆ ಮದ್ರಾಸ್ ರಸ್ತೆಯಲ್ಲಿ ಪ್ರಾಯೋಗಿಕ ಹಂತವಾಗಿ ರ್ಯಾಪಿಡ್ ರಸ್ತೆ ನಿರ್ಮಾಣ ಮಾಡಿತ್ತು. ಅಂದು ರಸ್ತೆಯಲ್ಲಿ ಭಾರೀ ವಾಹನ ಸಂಚಾರ ಮಾಡಿದರೂ ಶೇಕ್ ಆಗೋದಿಲ್ಲ ಎಂದು ಪಾಲಿಕೆ ತಿಳಿಸಿತ್ತು.

ಅಲ್ಲದೇ, ರಸ್ತೆ ನಿರ್ಮಾಣದ ವೆಚ್ಚ ಹೆಚ್ಚಾದರು ನಾವು ಮಾಡಿರೋ ರಸ್ತೆ ಫುಲ್ ಸ್ಟ್ರಾಂಗ್ ಇರಲಿದೆ ಎಂದು ತಿಳಿಸಿತ್ತು. ಆದರೆ ಕಳಪೆ ಗುಣಮಟ್ಟದ ಸಿಮೆಂಟ್ ಬಳಕೆಯಿಂದ ರಸ್ತೆ ಬಿರುಕು ಬಿಟ್ಟಿರುವ ಆರೋಪ ಸದ್ಯ ಕೇಳಿ ಬಂದಿದೆ. ಕೋಟಿ ಖರ್ಚು ಮಾಡಿ ರ್ಯಾಪಿಡ್ ಆಗಿ ಹಾಕಿದ್ದ 337.5 ಮೀಟರ್ ಉದ್ದದ ರ್ಯಾಪಿಡ್ ರಸ್ತೆಯಲ್ಲಿ ರ್ಯಾಪಿಡ್ ಆಗಿಯೇ ಬಿರುಕು ಮೂಡಿದೆ.

ಮಹಾನಗರಿ ಬೆಂಗಳೂರಿನ ರಸ್ತೆಗುಂಡಿಗಳಿಂದಾಗಿ ಜನರು ಆತಂಕದಲ್ಲಿಯೇ ರಸ್ತೆಗೆ ಇಳಿಯುತ್ತಾರೆ. ಇನ್ನು ಮಳೆ ಬಂದರಂತೂ ರಸ್ತೆಯಲ್ಲಿಯ ಗುಂಡಿಗಳು ಕಾಣಿಸೋದೇ ಇಲ್ಲ. ಪರಿಣಾಮ ರಸ್ತೆಗುಂಡಿಗಳಿಂದಾಗಿ ಸವಾರರು ಪ್ರಾಣ ಕಳೆದುಕೊಂಡಿರುವ ಉದಾಹರಣೆಗಳಿವೆ.

ರಸ್ತೆಗುಂಡಿ ಸಮಸ್ಯೆ ಮುಕ್ತಿ ನೀಡುವ ಉದ್ದೇಶದಿಂದ ಬಿಬಿಎಂಪಿ ಬೆಂಗಳೂರಿನ ರಸ್ತೆಗಳಿಗೆ ಆಧುನಿಕ ಟಚ್ ಕೊಟ್ಟು, ರ್ಯಾಪಿಡ್ ರೋಡ್ ಮೂಲಕ ವೈಟ್​ ಟಾಪಿಂಗ್ ಮಾದರಿಯ ರಸ್ತೆಗಳನ್ನು ನಿರ್ಮಾಣ ಮಾಡುವ ಯೋಜನೆ ರೂಪಿಸಿತ್ತು. ಇದರ ಪ್ರಯೋಗರ್ತವಾಗಿ ಹಳೆ ಮದ್ರಾಸ್ ರಸ್ತೆಯಲ್ಲಿ 337.5 ಮೀಟರ್ ಉದ್ದದ ರಸ್ತೆ ನಿರ್ಮಾಣ ಮಾಡಲಾಗಿತ್ತು.

ಸ್ಥಳದಲ್ಲಿ ಯಾವುದೇ ಕಾಂಕ್ರಿಟ್ ಮಿಶ್ರಣ ಇಲ್ಲದೆ ಕಾರ್ಖಾನೆಗಳಲ್ಲೇ ತಯಾರಾದ ಸ್ಲಾಬ್​ಗಳನ್ನು ತಂದು ಜೋಡಿಸಿ ಈ Rapid ರೋಡ್ ಟೆಕ್ನಾಲಜಿ ರಸ್ತೆಗಳನ್ನು ನಿರ್ಮಾಣ ಮಾಡಲಾಗಿತ್ತು.

ವೈಟ್ ಟಾಪಿಂಗ್ ಮಾಡಿದರೆ ರಸ್ತೆ ಟ್ರಾಫಿಕ್ ಫ್ರೀ‌ ಮಾಡೋಕೆ‌ 25 ದಿನಗಳ ಅವಧಿ ಬೇಕು. ಆದರೆ ರ್ಯಾಪಿಡ್ ರೋಡ್ ಟೆಕ್ನಾಲಜಿ ಮೂಲಕ ನಿರ್ಮಿಸಿದರೆ ಕೇವಲ ನಾಲ್ಕೇ ದಿನದಲ್ಲಿ ಸಂಚಾರಕ್ಕೆ ರಸ್ತೆ ಮುಕ್ತವಾಗಲಿದೆ ಎಂದು ಪಾಲಿಕೆ ತಿಳಿಸಿತ್ತು. ಅಲ್ಲದೇ ಈ ರಸ್ತೆ ಸುಮಾರು 45ಕ್ಕೂ ಅಧಿಕ ವರ್ಷ ಬಾಳಿಕೆ ಬರುತ್ತೆ ಎಂದು ಬಿಬಿಎಂಪಿ ಇಂಜಿನಿಯರ್ ಚೀಫ್​ ಪ್ರಹ್ಲಾದ್ ನ್ಯೂಸ್ 18ಗೆ ತಿಳಿಸಿದ್ದರು.