Peenya Flyover: ಶೀಘ್ರದಲ್ಲಿಯೇ ಭಾರೀ ವಾಹನಗಳ ಓಡಾಟಕ್ಕೆ ಅನುಮತಿ ಸಾಧ್ಯತೆ; ಕಂಡಿಷನ್ ಅಪ್ಲೈ

ಬೆಂಗಳೂರಿನಿಂದ ರಾಜ್ಯದ 18 ಜಿಲ್ಲೆಗಳಲ್ಲಿ ಈ ಮೇಲ್ಸೇತುವೆ ಸಂಪರ್ಕ ಕಲ್ಪಿಸುತ್ತದೆ. ಕಳೆದ ವರ್ಷ ಅಂದ್ರೆ ಡಿಸೆಂಬರ್ 25ರಂದು ಎರಡು ಪಿಲ್ಲರ್‌ಗಳಲ್ಲಿ ಬಿರುಕು ಕಾಣಿಸಿಕೊಂಡ ಹಿನ್ನೆಲೆ ಭಾರೀ ವಾಹನಗಳ ಓಡಾಟಕ್ಕೆ ನಿರ್ಬಂಧ ಹಾಕಲಾಗಿದೆ.

ಮೇಲ್ಸೇತುವೆ ಬಂದ್ ಆಗಿದ್ದರಿಂದ ಪ್ರತಿ ದಿನ ನಗರದ ಜಾಲಹಳ್ಳಿ ಕ್ರಾಸ್, ದಾಸರಹಳ್ಳಿ ಸಿಗ್ನಲ್ ಮತ್ತು ಎಂಟನೇ ಮೈಲ್ ನಲ್ಲಿ ಭಾರೀ ಟ್ರಾಫಿಕ್ ಜಾಮ್ ಉಂಟಾಗುತ್ತಿದೆ. ಈ ಮೂರು ಸಿಗ್ನಲ್ ಕ್ರಾಸ್ ಮಾಡಲು ವಾಹನ ಸವಾರರು ಹೈರಾಣು ಆಗುತ್ತಿದ್ದಾರೆ.

ಫ್ಲೈ ಓವರ್ ಗುಣಮಟ್ಟ ಮತ್ತು ಬಾಳಿಕೆ ಬಗ್ಗೆ ರಾಷ್ಟ್ರೀಯ ಹೆದ್ದಾರಿ ಪಾಧಿಕಾರದವರು ಮತ್ತು ಐಐಎಸ್ ಸಿ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಈ ಸಂಬಂಧ ವರದಿ ಸಹ ಸಲ್ಲಿಕೆಯಾಗಿದೆ.

ಈ ವರದಿ ಹಿನ್ನೆಲೆ ಕೆಲವು ಷರತ್ತುಗಳೊಂದಿಗೆ ಭಾರೀ ವಾಹನಗಳ ಓಡಾಟಕ್ಕೆ ಅವಕಾಶ ನೀಡುವ ಸಾಧ್ಯತೆಗಳಿವೆ. ಆರಂಭದಲ್ಲಿ 20 ಟನ್ ಭಾರದ ವಾಹನಗಳ ಓಡಾಟಕ್ಕೆ ಅವಕಾಶ ನೀಡಲಾಗುತ್ತಿದೆ ಎಂದು ವರದಿಯಾಗಿದೆ.

ಸಾಮಾನ್ಯವಾಗಿ ಒಂದು ಟ್ರಕ್ 10 ರಿಂದ 20 ಟನ್ ತೂಕ ಹೊಂದಿರುತ್ತದೆ. ಹಾಗಾಗಿ ಫ್ಲೈಓವರ್ ಮುಂಭಾಗದಲ್ಲಿ ವಾಹನಗಳ ತೂಕ ಪರಿಶೀಲಿಸಿ ಸಂಚಾರಕ್ಕೆ ಅನುಮತಿ ನೀಡುವ ಕುರಿತು ಚರ್ಚೆಗಳು ನಡೆದಿವೆ.

ಫ್ಲೈ ಓವರ್ ಮೇಲೆ 20 ಟನ್ ಗಳ ವಾಹನಗಳ ಸಂಚರಿಸಬಾರದು. ಹಾಗಾಗಿ ಲೋಡಿಂಗ್ ಮಷೀನ್ ಇರಿಸಿ ಪರಿಶೀಲನೆ ನಡೆಸೋದು ಉತ್ತಮ ಎಂದು ಐಐಎಸ್‍ಸಿ ಸಲಹೆ ನೀಡಿದೆ.

ಇನ್ನುಳಿದಂತೆ ಆಟೋ, ಬಸ್, ಖಾಸಗಿ ವಾಹನಗಳು, ದ್ವಿಚಕ್ರ ವಾಹನಗಳ ಓಡಾಡಲು ಅನುಮತಿ ನೀಡಲಾಗಿದೆ.