Bengaluru-Mysuru Expresswayನಲ್ಲಿ ಪ್ರಯಾಣಿಸುವ ವಾಹನ ಸವಾರರಿಗೆ ಗುಡ್​ನ್ಯೂಸ್​; ನಾಳೆಯಿಂದಲೇ ಕಟ್ಟಬೇಕಿಲ್ಲ ಟೋಲ್​​!

ಬೆಂಗಳೂರು-ಮೈಸೂರು ಎಕ್ಸ್​ಪ್ರೆಸ್ ಸಂಚರಿಸುವ ವಾಹನ ಸವಾರರಿಗೆ ಸಿಹಿ ಸುದ್ದು ಸಿಕ್ಕಿದೆ. ನಾಳೆ ಬೆಳಗ್ಗೆ 8ಗಂಟೆಯಿಂದ ಸಂಗ್ರಹವಾಗಬೇಕಿದ್ದ ಟೋಲ್​ಗೆ ಸಾರ್ವಜನಿಕರ ವಲಯದಿಂದ ತೀವ್ರ ವಿರೋಧ ವ್ಯಕ್ತವಾದ ಹಿನ್ನೆಲೆಯಲ್ಲಿ ಟೋಲ್​ ಸಂಗ್ರಹವನ್ನು ಮುಂದೂಡಲಾಗಿದೆ.

ಈ ಕುರಿತಂತೆ ಟ್ವೀಟ್​ ಮಾಡಿ ಮಾಹಿತಿ ಹಂಚಿಕೊಂಡಿರುವ ಕೊಡಗು ಮೈಸೂರು ಸಂಸದ ಪ್ರತಾಪ್ ಸಿಂಗ್ ಅವರು, ಸರ್ವೀಸ್​ ರಸ್ತೆಗಳು ಪೂರ್ಣಗೊಳ್ಳುವವರೆಗೆ ಟೋಲ್ ಸಂಗ್ರಹ ಮಾಡುವುದನ್ನು ಮುಂದೂಡಲಾಗಿದೆ ಎಂದು ಬರೆದು ಟೋಲ್​ ದರದ ಪಟ್ಟಿಯ ಫೋಟೋವನ್ನು ಟ್ವೀಟ್​ ಮಾಡಿದ್ದರು. ಆದರೆ ಕೆಲ ಸಮಯದ ಬಳಿಕ ತಮ್ಮ ಟ್ವೀಟ್​ ಡಿಲೀಟ್​ ಮಾಡಿದ ಸಂಸದರು, ಅಧಿಕೃತ ಟೋಲ್ ಬೆಲೆಯ ಪಟ್ಟಿಯನ್ನು ಪಡೆಕೊಂಡು ಶೀಘ್ರದಲ್ಲೇ ಮಾಹಿತಿ ನೀಡುತ್ತೇನೆ ಎಂದು ಮತ್ತೊಂದು ಟ್ವೀಟ್​ ಮಾಡಿದ್ದಾರೆ.

ಪ್ರತಾಪ್​ ಸಿಂಹ ಅವರು ಟ್ವೀಟ್​​ಗೆ ಪ್ರತಿಕ್ರಿಯೆ ನೀಡಿರುವ ಸಾರ್ವಜನಿಕರು, ಉತ್ತಮ ನಿರ್ಧಾರ ಧನ್ಯವಾದಗಳು. ಕಾಮಗಾರಿ ಸಂಪೂರ್ಣವಾಗಿ ಪೂರ್ಣ ಆಗುವವರೆಗೂ ಟೋಲ್​ ಸಂಗ್ರಹಕ್ಕೆ ಮುಂದಾಗಬೇಡಿ ಎಂದು ಹೇಳಿದ್ದಾರೆ. ಇನ್ನು ಕೆಲವರು ಮೊದಲು ಸರ್ವಿಸ್ ರಸ್ತೆಯನ್ನು ಸರಿ ಮಾಡಿ ಆಮೇಲೆ ಟೋಲ್ ಸಂಗ್ರಹ ಮಾಡಿ ಎಂದರೆ, ಒಂದು ಕಿಲೋ ಮೀಟರ್​ಗೆ 2.45 ರೂಪಾಯಿ ನಿಗದಿ ಮಾಡಿದ್ದಾರೆ. ಸಾಮಾನ್ಯ ಜನರು ಎಲ್ಲಿಂದ ಹಣ ಪಾವತಿ ಮಾಡಬೇಕು. ಇದರಿಂದ ಜನರಿಗೆ ಅನುಕೂಲಕ್ಕಿಂತ ತೊಂದರೆ ಹೆಚ್ಚಾಗುತ್ತದೆ ಎಂದು ಪ್ರತಿಕ್ರಿಯೆ ನೀಡಿದ್ದಾರೆ.

ಇದಕ್ಕೂ ಮುನ್ನ, ಫೆಬ್ರವರಿ 28ರಿಂದಲೇ ದಶಪಥ ಹೆದ್ದಾರಿಯಲ್ಲಿ ಪ್ರಯಾಣಿಸುವ ಪ್ರಯಾಣಿಕರು ಟೋಲ್ ಪಾವತಿ ಮಾಡಬೇಕು. ಅಲ್ಲದೆ, ಇದರಲ್ಲಿನ ಎರಡು ಪಥಗಳ ಸರ್ವೀಸ್ ರಸ್ತೆಯಲ್ಲಿ ಪ್ರಯಾಣಿಸುವ ಪ್ರಯಾಣಿಕರು ಟೋಲ್ ಹಣ ಪಾವತಿ ಮಾಡಬೇಕೆಂದಿಲ್ಲ ಎಂದು ಸೂಚಿಸಲಾಗಿತ್ತು.

ಹೆದ್ದಾರಿಯ ಟೋಲ್ ದರ ಕನಿಷ್ಠ 135 ರೂಪಾಯಿ, ಸ್ಥಳೀಯ ವಾಹನಗಳಿಗೆ 70 ರೂಪಾಯಿ ನಿಗದಿಪಡಿಸಲಾಗಿತ್ತು. ಕಾರು, ಜೀಪು ಅಥವಾ ವ್ಯಾನ್ ಹೊಂದಿದ್ದರೆ ಏಕಮುಖ ಸಂಚಾರಕ್ಕೆ 135 ರೂಪಾಯಿ ಪಾವತಿಸಬೇಕು. ಅದೇ ದಿನ, ಮರಳಿ ಬರಲು 205 ರೂಪಾಯಿ ಪಾವತಿಸಬೇಕು. ಸ್ಥಳೀಯ ವಾಹನಗಳಿಗೆ 70 ರೂಪಾಯಿ ಆಗಿದೆ.

ಒಂದು ತಿಂಗಳ 50 ಏಕ‌ಮುಖ ಸಂಚಾರದ ಪಾಸ್‌ಗೆ 4,525 ರೂಪಾಯಿ ನಿಗದಿ ಮಾಡಲಾಗಿದೆ. ಉಳಿದಂತೆ 4,425 ರೂಪಾಯಿಯಿಂದ ಆರಂಭವಾಗಿ 29,255 ರೂಪಾಯಿ ವರೆಗೂ ಹಲವು ಬಗೆಯ ತಿಂಗಳ ಪಾಸ್​ಗಳು ಲಭ್ಯವಿರುತ್ತದೆ.

ನೀವು ಲಘು ವಾಣಿಜ್ಯ ವಾಹನ, ಲಘು ಸರಕು ವಾಹನ ಅಥವಾ ಮಿನಿ ಬಸ್ ಹೊಂದಿದ್ದರೆ ಒಂದು ಬದಿ ಪ್ರಯಾಣಕ್ಕೆ 220 ರೂಪಾಯಿ ಪಾವತಿಸಬೇಕು. ಅದೇ ದಿನ ಮರಳಿ ಬರಲು 320 ರೂಪಾಯಿ ಪಾವತಿಸಬೇಕು. ಆದರೆ ಸ್ಥಳೀಯ ವಾಹನಗಳಿಗೆ 110 ರೂಪಾಯಿ ಪಾವತಿಸಿದರೆ ಸಾಕು. ಈ ವಾಹನಗಳಿಗೆ ಒಂದು ತಿಂಗಳ 50 ಏಕ‌ಮುಖ ಸಂಚಾರದ ಪಾಸ್‌ ಪಡೆಯಲು 7,315 ರೂಪಾಯಿ ಹಣ ನೀಡಬೇಕು.