Bengaluru-Namma Metro: ಬೈಯಪ್ಪನಹಳ್ಳಿ ಮೆಟ್ರೋ ಪ್ರಯಾಣಿಕರಿಗೆ ಸಂಕಷ್ಟ

ಬೆಂಗಳೂರು: ಕೆ.ಆರ್ ಪುರ ದಿಂದ ವೈಟ್​ಫೀಲ್ಡ್ ತನಕ ಮೆಟ್ರೋ ಮಾರ್ಗಕ್ಕೆ ಚಾಲನೆ ಸಿಕ್ಕಿದೆ. ಈ ಮಾರ್ಗದಲ್ಲಿ ಪ್ರಯಾಣಿಕರು ಆರಾಮವಾಗಿ ಓಡಾಡ್ತಿದ್ದಾರೆ. ಆದರೆ ಬೈಯಪ್ಪನಹಳ್ಳಿಯ ಪ್ರಯಾಣಿಕರು ಮಾತ್ರ ಅದೇ ಟ್ರಾಫಿಕ್ ಜಾಮ್‌ನಲ್ಲಿ ಓಡಾಡೋ ಸ್ಥಿತಿ ಇದೆ.

ಹೌದು, ಜನರು ಮೆಟ್ರೋ ಸ್ಟೇಷನ್‌ನಿಂದ ಇಳಿದ ಕೂಡಲೇ ಇಲ್ಲಿ ಬಸ್ ಹತ್ತುತ್ತಿದ್ದಾರೆ. ಇದು ಬೇರೆ ಕಡೆಗೆ ಸಂಚಾರ ಮಾಡೋದಕ್ಕೆ ಅಲ್ಲ. ಬದಲಿಗೆ ಕೆ.ಆರ್.ಪುರ ಮೆಟ್ರೋ ಸ್ಟೇಷನ್​ಗೆ ಹೋಗೋದಕ್ಕೆ.

ಮಾರ್ಚ್ ತಿಂಗಳಲ್ಲಿ ಬಹುನಿರೀಕ್ಷಿತ ಕೆ.ಆರ್.ಪುರದಿಂದ ವೈಟ್​ಫೀಲ್ಡ್‌ ತನಕ ಮೆಟ್ರೋ ಉದ್ಘಾಟನೆ ಆಗಿತ್ತು. ಜನ ನೆಮ್ಮದಿಯಿಂದ ಸಂಚಾರ ಮಾಡಬಹುದು ಅನ್ನೋ ಮಾತುಗಳು ಕೇಳಿ ಬಂದಿದ್ದವು. ಆದ್ದರೆ ಬೈಯಪ್ಪನಹಳ್ಳಿ ಮಾರ್ಗದಿಂದ ಕೆಆರ್ ಪುರ ಬರುವವರಿಗೆ ಮಾತ್ರ ಮೆಟ್ರೋ ಸಂಚಾರ ಸಿಗುತ್ತಿದೆ. ಟ್ರ್ಯಾಕ್​ ಇಲ್ಲದ ಕಾರಣಕ್ಕೆ ಒಂದು ತಿಂಗಳಿಗೆ ಅಂತಾ ಫೀಡರ್ ಬಸನ್ನು ಬಿಟ್ಟಿದ್ದರು. ಇದೀಗ ಎರಡು ತಿಂಗಳಾದರೂ ಕೂಡಾ ಇನ್ನೂ ಇದೇ ಸ್ಥಿತಿ ಮುಂದುವರಿದಿದೆ.‌

ಕೇವಲ 2.5 ಕಿಲೋ ಮೀಟರ್ ಮೆಟ್ರೋ ಟ್ರ್ಯಾಕ್‌ ಕಲ್ಪಿಸಲು ಬಿಎಂಆರ್‌ಸಿಎಲ್ ವಿಫಲವಾಗಿದೆ. ಈ ಹಿನ್ನೆಲೆ ಇಂದಿಗೂ ಕೂಡಾ ಪ್ರಯಾಣಿಕರು ಮೆಟ್ರೋದಲ್ಲಿ ಓಡಾಡೋ ಭಾಗ್ಯ ಸಿಕ್ಕಿಲ್ಲ. ಬಸ್‌ನಲ್ಲಿ ಟ್ರಾಫಿಕ್‌ನಲ್ಲೇ ಕೆ.ಆರ್.ಪುರಕ್ಕೆ ಪ್ರಯಾಣ ಮಾಡುತ್ತಿದ್ದಾರೆ. ಇದರಿಂದ ನಮಗೆ ತುಂಬಾ ಸಮಸ್ಯೆಯಾಗುತ್ತಿದೆ ಅಂತ ಬೇಸರ ಹೊರ ಹಾಕುತ್ತಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಪ್ರಯಾಣಿಕರೊಬ್ಬರು, ಕಾಮಗಾರಿ ಮೊದಲೇ ಆಗುತ್ತೆ ಅಂತ ಹೇಳಿದ್ದರು. ಆದರೆ ಇದುವರೆಗೂ ಆ ಕೆಲಸ ಆಗಿಲ್ಲ. ಇದರಿಂದ ತುಂಬಾ ಸಮಸ್ಯೆ ಆಗುತ್ತಿದೆ. ಅರ್ಧ ಕೆಲಸ ಮಾಡಿದ್ದು, ತುಂಬಾ ಸಮಸ್ಯೆ ಆಗುತ್ತಿದೆ ಎಂದಿದ್ದಾರೆ

ಕಾಮವಾರಿ ಬಗ್ಗೆ ಪ್ರಶ್ನಿಸಿದರೆ ಮಾಡ್ತೇವೆ ಅಂತ ಆಶ್ವಾಸನೆ ನೀಡುತ್ತದ್ದಾರೆ ಅಷ್ಟೇ. ಆದರೆ ಇದುವರೆಗೂ ಭರವಸೆ ಈಡೇರಿಲ್ಲ ಎಂದು ಮತ್ತೊಬ್ಬ ಪ್ರಯಾಣಿಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಒಟ್ಟಿನಲ್ಲಿ ಮೆಟ್ರೋ ನಿಧಾನಗತಿಯ ಕಾಮಗಾರಿಯಿಂದ ಪ್ರಯಾಣಿಕರಿಗೆ ತೊಂದರೆಯಾಗುತ್ತಿದೆ. ಆದಷ್ಟು ಬೇಗ ಕಾಮಗಾರಿ ಮುಗಿಸಿದರೆ ವೈಟ್​ಫೀಲ್ಡ್​ ಕಡೆಗೆ ಸಂಚಾರ ಮಾಡುವ IT-BT ಜನರಿಗೆ ಅನುಕೂಲ ಆಗಲಿದೆ. (ವರದಿ: ಹಂಸ ಶ್ಯಾಮಲ, ನ್ಯೂಸ್ 18, ಬೆಂಗಳೂರು)