Online Scam: ನಿಮ್ಮ ಹಣ ಡಬಲ್​ ಮಾಡ್ತೀವಿ ಅಂತ ದೋಖಾ, ಟೆಲಿಗ್ರಾಮ್​ನಲ್ಲಿ ಲಿಂಕ್​ ಓಪನ್​ ಮಾಡೋ ಮುನ್ನ ಹುಷಾರ್​!

ಸ್ಮಾರ್ಟ್​​ಫೋನ್​ಗಳ ಬಳಕೆ ಹೆಚ್ಚಾಗಿದೆ ಹೌದು, ಆದರೆ ಇದನ್ನೇ ಬಂಡವಾಳವಾಗಿಟ್ಟುಕೊಂಡು ಕೆಲ ಕಿಡಿಗೇಡಿಗಳು ಆನ್​ಲೈನ್ ಮೂಲಕ ವಂಚನೆ ಮಾಡಲು ಹೊಸ ಹೊಸ ಮಾರ್ಗಗಳನ್ನು ಹುಡುಕುತ್ತಿದ್ದಾರೆ. ಇದುವರೆಗೆ ಈ ಆನ್​ಲೈನ್​ ವಂಚಕರಿಗೆ ಎಷ್ಟೋ ಜನರು ಬಲಿಯಾಗಿದ್ದಾರೆ.

ವಾಟ್ಸಾಪ್​, ಜಿಮೇಲ್​, ಓಟಿಪಿ ಸ್ಕ್ಯಾಮ್​ ಈ ರೀತಯಲ್ಲೆಲ್ಲಾ ಇದುವರೆಗೆ ಮೊಬೈಲ್​ ಬಳಕೆದಾರರನ್ನು ವಂಚಿಸುತ್ತಿದ್ದರು. ಇದೀಗ ಟೆಲಿಗ್ರಾಮ್​ ಮೂಲಕವೂ ಬಳಕೆದಾರರರ ಡೇಟಾಗಳನ್ನು ಕದಿಯಲು ಆರಂಭಿಸಿದ್ದಾರೆ.

ಎಷ್ಟೋ ಜನರು ಉದ್ಯೋಗ ಇಲ್ಲದೆ ಇನ್ನೂ ಮನೆಯಲ್ಲಿಯೇ ಇದ್ದಾರೆ. ಇನ್ನೂ ಕೆಲವರು ಉದ್ಯೋಗ ಸಿಕ್ಕರೂ ಹೊರಗಡೆ ಹೋಗಿ ಕೆಲಸ ಮಾಡಲು ಇಷ್ಟಪಡದವರು ಮನೆಯಲ್ಲಿಯೇ ಇದ್ದಾರೆ. ಇಂತವರನ್ನೇ ಗುರಿಯಾಗಿಸಿಕೊಂಡು ಹ್ಯಾಕರ್ಸ್​ಗಳು ವಂಚನೆಗೆ ಹೊಸ ಮಾರ್ಗವನ್ನು ಹುಡುಕಿದ್ದಾರೆ. ಇಂತಹದೇ ಒಂದು ಘಟನೆ ಹುಬ್ಬಳ್ಳಿಯಲ್ಲಿ ನಡೆದಿದ್ದು, ಉದ್ಯೋಗ ನೀಡುವ ನೆಪದಲ್ಲಿ ಲಕ್ಷಗಟ್ಟಲೆ ಹಣವನ್ನು ದೋಚಿದ್ದಾರೆ.

ಟೆಲಿಗ್ರಾಮ್ ಮೂಲಕ ಮನೆಯಲ್ಲಿ ಕುಳಿತು ಹಣ ಗಳಿಸಬಹುದೆಂದು ನಂಬಿಸಿ ಹುಬ್ಬಳ್ಳಿಯ ಇಬ್ಬರಿಗೆ ಒಟ್ಟು 3.64 ಲಕ್ಷ ರೂಪಾಯಿ ವಂಚನೆ ಮಾಡಿದ್ದಾರೆ.

ಅದರಲ್ಲಿ ವಾಣಿ ಎಂಬ ಮಹಿಳೆಗೆ ಮನೆಯಲ್ಲಿಯೇ ಕುಳಿತು ಲಕ್ಷಗಟ್ಟಲೆ ಹಣ ಮಾಡಿ ಎಂದು ಹೇಳುವ ಮೂಲಕ 3,16,138 ರೂಪಾಯಿ ವಂಚನೆ ಮಾಡಿದ್ದಾರೆ.

ಮೊದಲಿಗೆ ಟೆಲಿಗ್ರಾಮ್​ ಆ್ಯಪ್​ನಲ್ಲಿ ತೋರಿಸುವ ಚಿತ್ರಗಳಿಗೆ ರೇಟಿಂಗ್ ಕೊಡುವ ಟಾಸ್ಕ್ ಕೊಟ್ಟು ವಂಚನೆ ಮಾಡಿದ್ದಾರೆ. ನಂತರ ಕಮೀಷನ್‌ ಆಸೆ ತೋರಿಸಿದ್ದ ಅಪರಿಚಿತರು ಬಳಿಕ ಇ ಬೈ ಅಪ್ಲಿಕೇಶನ್‌ ಡೌನ್‌ ಲೋಡ್ ಮಾಡಿಸಿ ಹಣ ವರ್ಗಾಯಿಸಿಕೊಂಡಿದ್ದರು.

ಮತ್ತೊಂದೆಡೆ ಮಡಿವಾಳಪ್ಪ ಎಂಬುವರಿಗೂ ವಂಚನೆ ಮಾಡಿದ್ದರು. ಆದರೆ ಇವರು ಯಾವುದೇ ಮಾಹಿತಿ ಶೇರ್ ಮಾಡಿಲ್ಲ. ಆದರೆ 48 ಸಾವಿರ ರೂಪಾಯಿ ಕಳೆದುಕೊಂಡಿದ್ದಾರೆ. ಈ ಬಗ್ಗೆ ಹುಬ್ಬಳ್ಳಿ-ಧಾರವಾಡ ಸೈಬರ್ ಕ್ರೈಂ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಇತ್ತೀಚೆಗೆ ಈ ಸೈಬರ್ ವಂಚನೆ ಪ್ರಕರಣಗಳು ಬಹಳಷ್ಟು ಹೆಚ್ಚಾಗುತ್ತಿದ್ದು,ಯಾವುದೇ ಲಿಂಕ್​ಗಳು, ಕರೆಗಳು ಬಂದಾಗ ಅದರ ಬಗ್ಗೆ ಸರಿಯಾಗಿ ತಿಳಿದುಕೊಂಡು ಓಪನ್ ಮಾಡ್ಬೇಕು. ಇಲ್ಲವಾದ್ರೆ ಈ ರೀತಿಯ ವಂಚನೆಗೆ ಒಳಗಾಗೋದು ಗ್ಯಾರಂಟಿ.