ಎಸ್ಕೇಪ್ ಆಗಿದ್ದ ಸ್ಲಂ ಭರತ್​ ಮೇಲೆ ಬೆಂಗಳೂರು ಪೊಲೀಸರ ಫೈರಿಂಗ್; ಚಿಕಿತ್ಸೆ ಫಲಕಾರಿಯಾಗದೆ ರೌಡಿಶೀಟರ್ ಸಾವು

ಸ್ಲಂ ಭರತ್​ನ ಕಾಲಿಗೆ ಗುಂಡು ಹೊಡೆದು ಪೊಲೀಸರು ಬಂಧಿಸಿದ್ದರು. ಸೋಲದೇವನಹಳ್ಳಿ ಬಳಿ ಸ್ಲಂ ಭರತ್​ನನ್ನು ಬಂಧಿಸಲಾಗಿದೆ. ಸಹಚರರ ಜತೆ ಎಸ್ಕೇಪ್ ಆಗುವಾಗ ಫೈರಿಂಗ್ ನಡೆಸಲಾಗಿತ್ತು.

ಕುಖ್ಯಾತ ರೌಡಿಶೀಟರ್ ಸ್ಲಂ ಭರತ್​ನನ್ನು ಬಂಧಿಸಿ, ಬೆಂಗಳೂರಿಗೆ ಕರೆತರುವಾಗ ಸಿನಿಮೀಯ ರೀತಿಯಲ್ಲಿ ಪರಾರಿಯಾಗಿದ್ದ. ಎಸ್ಕೇಪ್ ಆಗಿದ್ದ ಸ್ಲಂ ಭರತ್​ನ ಮೇಲೆ ಹೆಸರಘಟ್ಟ ಬಳಿ ಪೊಲೀಸರು ಫೈರಿಂಗ್ ನಡೆಸಿದ್ದರು.

ಸ್ಲಂ ಭರತ್ ಮೇಲೆ ಇನ್​ಸ್ಪೆಕ್ಟರ್​ ಲೋಹಿತ್ ಅವರಿಂದ 3 ಸುತ್ತಿನ ಗುಂಡು ಹಾರಿಸಲಾಗಿತ್ತು. ಆತನ ಕಾಲು, ಎದೆ, ಕಿಬ್ಬೊಟ್ಟೆಗೆ ಗುಂಡು ತಗುಲಿತ್ತು.

ಪೊಲೀಸರ ಗುಂಡೇಟಿನಿಂದ ಗಂಭೀರವಾಗಿ ಗಾಯಗೊಂಡಿದ್ದ ಸ್ಲಂ ಭರತ್​ ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿದ್ದಾನೆ.

ಸ್ಲಂ ಭರತ್​ನನ್ನು ಹೈದರಾಬಾದ್​ನಲ್ಲಿ ಬಂಧಿಸಿದ್ದ ಪೊಲೀಸರು ಬುಧವಾರ ಆತನನ್ನು ಬೆಂಗಳೂರಿಗೆ ಕರೆತರುತ್ತಿದ್ದರು. ಈ ವೇಳೆ ಪೀಣ್ಯ ಬಳಿ ಭರತ್​ನ ಗ್ಯಾಂಗ್​ನವರು 2 ಕಾರುಗಳಲ್ಲಿ ಬಂದು ಪೊಲೀಸರ ಕಾರನ್ನು ಅಡ್ಡಗಟ್ಟಿ, ಅವರ ಮೇಲೆ ಗುಂಡು ಹಾರಿಸಿದ್ದರು.

ಇದರಿಂದ ಪೊಲೀಸರು ಗಾಬರಿಗೊಂಡು, ತಮ್ಮನ್ನು ರಕ್ಷಣೆ ಮಾಡಿಕೊಳ್ಳಲು ಮುಂದಾದಾಗ ಅವರ ವಶದಲ್ಲಿದ್ದ ಸ್ಲಂ ಭರತ್​ ಪೊಲೀಸರ ಕೈ ಕಚ್ಚಿ ತನ್ನ ಗ್ಯಾಂಗ್​ನೊಂದಿಗೆ ಕಾರಿನಲ್ಲಿ ಪರಾರಿಯಾಗಿದ್ದ.

ಪೊಲೀಸರ ಕಾರಿಗೆ ಅಡ್ಡಗಟ್ಟಿದ ಭರತ್​ನ ಗ್ಯಾಂಗ್​ನವರು ಪೊಲೀಸರ ಮೇಲೆ ಗುಂಡು ಹಾರಿಸಿ, ಮಾರಕಾಸ್ತ್ರಗಳಿಂದ ಹಲ್ಲೆ ಮಾಡಲು ಯತ್ನಿಸಿದ್ದರು. ಈ ವೇಳೆ ಪೊಲೀಸ್ ಪೇದೆ ಸುಭಾಷ್ ಎಂಬುವವರಿಗೆ ಗಾಯವಾಗಿತ್ತು.

ರಾಜಗೋಪಾಲನಗರ ಠಾಣೆಯ ರೌಡಿಶೀಟರ್ ಆಗಿರುವ ಸ್ಲಂ ಭರತ್​ ಮೇಲೆ ಹಲವಾರು ಗಂಭೀರ ಪ್ರಕರಣಗಳು ದಾಖಲಾಗಿತ್ತು. ಆತನನ್ನು ಸೆರೆ ಹಿಡಿಯಲು ಬೆಂಗಳೂರಿನ ಎಲ್ಲಾ ಹೊರ ವಲಯದಲ್ಲಿ ನಾಕಾಬಂಧಿ ಹಾಕಿ ತಪಾಸಣೆ ಮಾಡಲಾಗಿತ್ತು. ಈ ವೇಳೆ ಹೆಸರಘಟ್ಟದ ಬಳಿ ಆತ ಸಿಕ್ಕಿಬಿದ್ದಿದ್ದ.

ಕಾಮಾಕ್ಷಿಪಾಳ್ಯ ಕೊಲೆ ಪ್ರಕರಣದಲ್ಲಿ ಪೊಲೀಸರಿಗೆ ಬೇಕಾಗಿದ್ದ ಪ್ರಮುಖ ಆರೋಪಿ ಸ್ಲಂ ಭರತ್. ಇತ್ತೀಚೆಗೆ ಆತನನ್ನು ಬಂಧಿಸಲು ಮುಂದಾಗಿದ್ದ ರಾಜಗೋಪಾಲನಗರ ಪೊಲೀಸರ ಕಾರಿಗೆ ಡಿಕ್ಕಿ ಹೊಡೆದು ಎಸ್ಕೇಪ್ ಆಗಿದ್ದ. ಬನಶಂಕರಿ ಬಳಿ ಇರುವ ದೇವೇಗೌಡ ಪೆಟ್ರೋಲ್ ಬಂಕ್ ಬಳಿ ಎಸ್ಕೇಪ್ ಆಗಿದ್ದ ರೌಡಿಶೀಟರ್ ಭರತ್ ನಂತರ ಉತ್ತರ ಭಾರತದ ಕಡೆ ಹೋಗಿ ತಲೆಮರೆಸಿಕೊಂಡಿದ್ದ. ಇಂದು ನಡೆದ ಫೈರಿಂಗ್ ವೇಳೆ ಚಿಕಿತ್ಸೆ ಫಲಕಾರಿಯಾಗದೆ ಸ್ಲಂ ಭರತ್ ಸಾವನ್ನಪ್ಪಿದ್ದಾನೆ.