Zameer ನಿವಾಸದ ಮುಂದೆ ಹೈಡ್ರಾಮಾ; ಇದೇ ಮೊದಲ ಬಾರಿಗೆ ಶಾಸಕರ ಮನೆ ಮೇಲೆ ACB ದಾಳಿ

ಪೊಲೀಸರು ಸೂಚನೆ ನೀಡಿದ್ರೂ ಬೆಂಬಲಿಗರು  ತೆರಳದೇ ಪ್ರಧಾನಿ ಮೋದಿ  ಮತ್ತು  ಬಿಜಪಿ ವಿರುದ್ಧ ದಿಕ್ಕಾರ ಕೂಗುತ್ತಿದ್ದಾರೆ. ಬೆಂಬಲಿಗರ ಸಂಖ್ಯೆ ಹೆಚ್ಚಾಗುತ್ತಿದ್ದು, ಮುನ್ನೇಚ್ಚರಿಕೆ ಕ್ರಮವಾಗಿ ಹೆಚ್ಚು ಪೊಲೀಸರನ್ನು ನಿಯೋಜನೆ ಮಾಡಲಾಗಿದೆ.

ಎಸಿಬಿ ರಚನೆ ಬಳಿಕ ಇದೇ ಮೊದಲ ಬಾರಿಗೆ ಎಂಎಲ್ಎ ಮನೆ ಮೇಲೆ ರೇಡ್ ಮಾಡಲಾಗಿದೆ. ಎಸಿಬಿ ರಚನೆ ಬಳಿಕ ಅಧಿಕಾರಿಗಳ ಮೇಲಷ್ಟೆ ದಾಳಿ ಮಾಡಲಾಗ್ತಿತ್ತು. ಇದೀಗ ಶಾಸಕ ಜಮೀರ್ ಮನೆ ಮೇಲೆ ದಾಳಿ ನಡೆಸಿದೆ. ಈ ಹಿಂದೆ ಕೆಲವು ಪ್ರಕರಣಗಳಲ್ಲಿ ಶಾಸಕರ ವಿಚಾರಣೆ ಮಾಡಿತ್ತು.

2021 ಅಗಸ್ಟ್ 5 ರಂದು ಜಮೀರ್ ಅಹಮದ್ ಮನೆ ಮೇಲೆ ಜಾರಿ ನಿರ್ದೇಶನಾಲಯ ಅಧಿಕಾರಿಗಳು ದಾಳಿ ನಡೆಸಿದ್ರು. ಆದಾಯಕ್ಕೂ ಮೀರಿ ಆಸ್ತಿ ಗಳಿಕೆ, ಭವ್ಯ ಮನೆ ನಿರ್ಮಾಣ, ಇದೇ ವೇಳೆ ಐಎಂಎ ಕೇಸಲ್ಲಿ ಜಮೀರ್ ಹೆಸರು ಕೇಳಿ ಬಂದಿತ್ತು. ಈ ಹಿನ್ನೆಲೆಯಲ್ಲಿ ಜಮೀರ್ ಅಹಮದ್ ಮನೆ ಮೇಲೆ ದಾಳಿ ನಡೆದಿತ್ತು.

ಸುಮಾರು 24 ಗಂಟೆಗಳ ಕಾಲ ಜಮೀರ್ ಮನೆಯಲ್ಲಿ ಶೋಧ ನಡೆಸಿದ್ದ ಜಾರಿ ನಿರ್ದೇಶನಾಲಯ ಅಧಿಕಾರಿಗಳು ಬಳಿಕ ಈ ಬಗ್ಗೆ ತನಿಖೆ ನಡೆಸಿ ಎಸಿಬಿಗೆ ಒಂದು ರಿಪೋರ್ಟ್ ಸಲ್ಲಿಕೆ ಮಾಡಿತ್ತು. ಇಡಿ ರಿಪೋರ್ಟ್ ಬೆನ್ನಲ್ಲೆ ಜಮೀರ್ ಅಹಮದ್ ಮನೆ, ಕಚೇರಿ, ಪ್ಲಾಟ್ ಸೇರಿ ಐದು ಕಡೆ ಎಸಿಬಿ ದಾಳಿ ನಡೆಸಿದೆ.

ಒಟ್ಟು 5 ಕಡೆ ದಾಳಿ ನಡೆದಿದೆ. ಕಂಟೋನ್ಮೆಂಟ್ ರೋಡ್ ಶಾಸಕರಾದ ಶ್ರೀ ಜಮೀರ್ ಅಹಮದ್ ಖಾನ್ ನಿವಾಸ, ಸಿಲ್ವರ್ ಓಕ್ ಅಪಾರ್ಟ್ಮೆಂಟ್ ನಲ್ಲಿರುವ ಫ್ಲಾಟ್, ಸದಾಶಿವನಗರದಲ್ಲಿರುವ ಅತಿಥಿ ಗೃಹ, ಬನಶಂಕರಿಯಲ್ಲಿರುವ ಜಿ ಕೆ ಅಸೋಸಿಯೇಟ್ಸ್ ಕಚೇರಿ ಮತ್ತು ಕಲಾಸಿಪಾಳ್ಯದಲ್ಲಿರುವ ನ್ಯಾಷನಲ್ ಟ್ರಾವೆಲ್ಸ್ ಕಚೇರಿ ಮೇಲೆಯೂ ದಾಳಿ ನಡೆದಿದೆ.

ಸದಾಶಿವನಗರದ ಜಮೀರ್ ಫ್ಲ್ಯಾಟ್ ಮೇಲೆ  ಡಿವೈಎಸ್ ಪಿ ವಿಜಯ್ ಹಡಗಲಿ ಅಂಡ್ ಟೀಂ ದಾಳಿ ನಡೆಸಿದೆ. ಈ ಹಿಂದೆ ಇದೇ ಪ್ಲಾಟ್ ನ್ನ ಹೆಚ್ ಡಿ ಕುಮಾರಸ್ವಾಮಿ ಅವರಿಗೆ ಬಿಟ್ಟುಕೊಟ್ಟಿದ್ದರು. ಇಬ್ಬರ ಸಂಬಂಧ ಹಳಸಿದ ನಂತರ ಫ್ಲ್ಯಾಟ್ ವಾಪಸ್ ಪಡೆದುಕೊಂಡಿದ್ದರು.

ಇನ್ನು ಕಲಾಸಿಪಾಳ್ಯದ ನ್ಯಾಷನಲ್ ಟ್ರಾವೆಲ್ಸ್ ನಲ್ಲಿ  ಕಚೇರಿಯ ಸಿಸಿಟಿವಿ ಕನೆಕ್ಷನ್ ಕಟ್ ಮಾಡಿ ಎಸಿಬಿ ಅಧಿಕಾರಿಗಳು ಶೋಧಕಾರ್ಯ ನಡೆಸುತ್ತಿದ್ದಾರೆ. ಕಚೇರಿಯ ಸೀಲಿಂಗ್ ಪಿಓಪಿಯನ್ನು ಕೆಲವು ಕಡೆ ತೆಗದು ಅಧಿಕಾರಿಗಳು ಪರಿಶೀಲನೆ ಮಾಡುತ್ತಿದ್ದಾರೆ.

ಕಚೇರಿ ಬಳಿಕ ನ್ಯಾಷನಲ್ ಟ್ರಾವೆಲ್ಸ್ ಗೋಡೌನ್ ಗೂ ಅಧಿಕಾರಿಗಳ ಎಂಟ್ರಿ ಕೊಟ್ಟು ಕಡತಗಳ ಪರಿಶೀಲನೆಯಲ್ಲಿ ತೊಡಗಿಕೊಂಡಿದ್ದಾರೆ. ಈ ಗೋಡೌನ್ ನಲ್ಲಿ ಆರ್ಥಿಕ ವ್ಯವಹಾರಗಳಿಗೆ ಸಂಬಂಧಪಟ್ಟ ಕಡತಗಳನ್ನು ಇರಿಸಲಾಗಿದೆ.ಸಿಬ್ಬಂದಿಗಳನ್ನು ಕರೆದುಕೊಂಡು ಅವರ ಸಮ್ಮುಖದಲ್ಲೇ ಗೋಡೌನ್ ಪರಿಶೀಲನೆ  ನಡೆಸಲಾಗುತ್ತಿದೆ.