Virat Kohli: ನಾಯಕತ್ವ ಹೋಯ್ತು, ಫಾರ್ಮ್ ಹೋಯ್ತು; ಆದ್ರೂ ಫಿನಿಕ್ಸ್ ರೀತಿ ಎದ್ದು ಬಂದ ಕಿಂಗ್​ ಕೊಹ್ಲಿ! 2022ರಲ್ಲಿ ಹೇಗಿತ್ತು 'ವಿರಾಟ್'​ ಪರ್ವ?

ಕ್ರಿಕೆಟ್​ ಲೋಕದಲ್ಲಿ ಹೊಸ ಸಂಚಲನವನ್ನೇ ಮೂಡಿಸಿದ್ದ ಟೀಂ ಇಂಡಿಯಾದ ಮಾಜಿ ನಾಯಕ, ಗ್ರೇಟ್​ ಫಿನಿಶರ್​ ಕಿಂಗ್​ ಕೊಹ್ಲಿ ವೃತ್ತಿ ಜೀವನ ಈ ವರ್ಷ ಅನೇಕ ಏರಿಳಿತದಿಂದ ಕೂಡಿತ್ತು. ಈ ಸಂಪೂರ್ಣ ವರ್ಷ ಅವರ ಕ್ರಿಕೆಟ್​ ಜೀವನ ಹೇಗಿತ್ತು ಎನ್ನುವುದರ ಕುರಿತು ಒಂದು ಇಣುಕು ನೋಟ ಇಲ್ಲಿದೆ ನೊಡಿ.

ಈ ವರ್ಷ ಆರಂಭದಲ್ಲಿಯೇ ಕಿಂಗ್ ಕೊಹ್ಲಿ ಅಭಿಮಾನಿಗಳಿಗೆ ಬಿಗ್ ಶಾಕ್ ನೀಡಿದ್ದರು. ಕಳೆದ ವರ್ಷ ಏಕದಿನ ನಾಯಕತ್ವದಿಂದ ಹೊರಬಂದಿದ್ದ ಅವರು, ಈ ವರ್ಷದ ಆರಂಭದಲ್ಲಿ ಟೆಸ್ಟ್ ನಾಯಕತ್ವದಿಂದಲೂ ಹೊಬಂದು ಶಾಕ್​ ನೀಡಿದರು.

ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್ ಸರಣಿ ಸೋಲಿನ ಬಳಿಕ ಜನವರಿ ಅಂತ್ಯದಲ್ಲಿ ವಿರಾಟ್ ಕೊಹ್ಲಿ ಟೆಸ್ಟ್ ನಾಯಕತ್ವಕ್ಕೆ ವಿದಾಯ ಹೇಳಿದರು. ಅದರ ಬಳಿಕ ಅವರ ಫಾರ್ಮ್​ ಸಹ ಅವರಿಗೆ ಕೈಕೊಟ್ಟಿತ್ತು.

ಈ ವೇಳೆ ಸತತ ಫಾರ್ಮ್​ ಸಮಸ್ಯೆಯಿಂದ ಅವರ ಬಗ್ಗೆ ಅನೇಖ ದಿಗ್ಗಜ ಆಟಗಾರರು ವಿಭಿನ್ನ ರೀತಿಯಲ್ಲಿ ಕಾಮೆಂಟ್​ ಮಾಡಿದ್ದರು. ಆದರೆ ವಿರಾಟ್ ಅಫ್ಘಾನಿಸ್ತಾನ ವಿರುದ್ಧ 53 ಎಸೆತಗಳಲ್ಲಿ 100 ರನ್ ಗಡಿ ದಾಟಿದರು. ಈ ಮೂಲಕ 1000 ದಿನಗಳ ಬಳಿಕ ಆಕರ್ಷಕ ಶತಕ ಸಿಡಿಸಿ ಮಿಂಚಿದ್ದರು.

ಏಷ್ಯಾಕಪ್​ 2022ರಲ್ಲಿ ಕೊಹ್ಲಿ ಮತ್ತೆ ತಮ್ಮ ಹಳೆಯ ಫಾರ್ಮ್​ಗೆ ಮರಳಿದ್ದರು. ನವೆಂಬರ್ 2019 ರಲ್ಲಿ ತಮ್ಮ 70 ನೇ ಶತಕದ ಬಳಿಕ ಈ ವರ್ಷ ವಿರಾಟ್​ 71ನೇ ಶತಕ ಸಿಡಿಸಿದರು. ಅದೂ ಸಹ ಟಿ20 ಕ್ರಿಕೆಟ್​ ನಲ್ಲಿ ಕೊಹ್ಲಿಯ ಮೊದಲ ಶತಕ ಸಹ ಇದೇ ಆಗಿತ್ತು.

ಇದರ ಬಳಿಕ ಮತ್ತೊಮ್ಮೆ ವಿರಾಟ್​ ಅಬ್ಬರ ಶುರುವಾಗಿದೆ. ಅದೂ ಟಿ20 ವಿಶ್ವಕಪ್​ನಲ್ಲಿಯೂ ಮುಂದುವರೆಸಿದರು. ಅದರಂತೆ ಕಿಂಗ್​ ಕೊಹ್ಲಿ ಪಾಕ್ ಎದುರು ಭರ್ಜರಿ ಬ್ಯಾಟಿಂಗ್​ ಮಾಡಿದರು. ಸಂಕಷ್ಟದ ಸಮಯದಲ್ಲಿ ವಿರಾಟ್ ಕೊಹ್ಲಿ ಮತ್ತು ಹಾರ್ದಿಕ್ ಪಾಂಡ್ಯ ಉತ್ತಮ 100 ರನ್ ಗಳ ಜೊತೆಯಾಟ ಆಡುವ ಮೂಲಕ ತಂಡಕ್ಕೆ ಗೆಲುವನ್ನು ತಂದುಕೊಟ್ಟರು. ವಿರಾಟ್ ಕೊಹ್ಲಿ 53 ಬೌಲ್​ಗೆ 4 ಸಿಕ್ಸ್ 6 ಬೌಂಡರಿ ಮೂಲಕ 82 ರನ್ ಗಳಿಸಿ ಔಟಾಗದೇ ಉಳಿದರು.

ಐತಿಹಾಸಿಕ ಜಯ ತಂದುಕೊಟ್ಟು ಮತ್ತೊಮ್ಮೆ ಅಭಿಮಾನಿಗಳ ಹೃದಯ ಗೆದ್ದರು. ಅವರ ಅದ್ಭುತ ಪ್ರದರ್ಶನಕ್ಕೆ ಪಂದ್ಯ ಶ್ರೇಷ್ಠ ಪ್ರಶಸ್ತಿ ದೊರಕಿತು. ಈ ವೇಳೆ ಕೊಹ್ಲಿ ಮೊದಲ ಬಾರಿಗೆ ಭಾವುಕರಾಗಿದ್ದಲ್ಲದೇ ಗೆಲುವಿನ ಖುಷಿಯಲ್ಲಿ ಕಣ್ಣೀರಿಟ್ಟರು.

ಟಿ20 ವಿಶ್ವಕಪ್​ನಲ್ಲಿ ನೀಡಿದ ಭರ್ಜರಿ ಪ್ರದರ್ಶನದಿಂದ ಐಸಿಸಿ ಸಹ ಕೊಹ್ಲಿಗೆ ಗೌರವ ಸಲ್ಲಿಸಿತು. ನವೆಂಬರ್‌ 7ರಂದು ಐಸಿಸಿ ಅಕ್ಟೋಬರ್‌ ತಿಂಗಳಲ್ಲಿ ಶ್ರೇಷ್ಠ ಪ್ರದರ್ಶನ ನೀಡಿದ ಕೊಹ್ಲಿಗೆ ಗೌರವ ನೀಡಿದೆ. ಈ ಮೂಲಕ ಅನೇಕ ಏರಿಳಿತದ ವರ್ಷವನ್ನು ಕೊಹ್ಲಿ ಈ ವರ್ಷ ತಮ್ಮ ವೃತ್ತಿ ಜೀನವದಲ್ಲಿ ಕಂಡಿದ್ದಾರೆ. ನಾಳೆಯಿಂದ ಆರಂಭವಾಗುವ ವರ್ಷದ ಅಂತಿಮ ಸರಣಿಯಾದ ಬಾಂಗ್ಲಾದೇಶ ಸರಣಿಯಲ್ಲಿಯೂ ಅಬ್ಬರಿಸುವ ಸೂಚನೆ ನೀಡಿದ್ದಾರೆ.