Wedding season: ಬಾಲಿವುಡ್‌ನಲ್ಲಿ ಮಾತ್ರವಲ್ಲ ಕ್ರಿಕೆಟ್ ಜಗತ್ತಿನಲ್ಲಿಯೂ ಇದು ಮದುವೆಯ ಸೀಸನ್; ವರ್ಷದ ಆರಂಭದಲ್ಲೇ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಕ್ರಿಕೆಟಿಗರು

ಬಾಲಿವುಡ್ ನಲ್ಲಿ ಇಂದು ಮತ್ತೊಂದು ಮದುವೆ ಸಂಭ್ರಮ ಜೋರಾಗಿದೆ. ಸಿದ್ಧಾರ್ಥ್ ಮಲ್ಹೋತ್ರಾ-ಕಿಯಾರಾ ಅಡ್ವಾಣಿ ವಿವಾಹ ಇಂದಿನಿಂದ ಫೆಬ್ರವರಿ 7ರವರೆಗೆ ಜೈಸಲ್ಮೇರ್‌ನಲ್ಲಿ ನಡೆಯಲಿದೆ.

ಇದು ಬಾಲಿವುಡ್ ಮಾತ್ರವಲ್ಲದೆ ಕ್ರಿಕೆಟ್ ಲೋಕದಲ್ಲೂ ಮದುವೆ ಸೀಸನ್ ಆಗಿದೆ. ಟೀಂ ಇಂಡಿಯಾ ಕ್ರಿಕೆಟಿಗ ಕೆಎಲ್ ರಾಹುಲ್ ಮತ್ತು ಸುನಿಲ್ ಶೆಟ್ಟಿ ಅವರ ಪುತ್ರಿ ನಟಿ ಆಥಿಯಾ ಶೆಟ್ಟಿ ಕೆಲ ದಿನಗಳ ಹಿಂದೆಷ್ಟೇ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು. ಜನವರಿ 23ರಂದು ಮುಂಬೈನ ಖಂಡಾಲಾ ಫಾರ್ಮ್‌ಹೌಸ್‌ನಲ್ಲಿ ರಾಹುಲ್, ಆಥಿಯಾ ವಿವಾಹ ಕಾರ್ಯಕ್ರಮ ಕುಟುಂಬ ಸದಸ್ಯರು, ಆತ್ಮೀಯರ ಸಮ್ಮುಖದಲ್ಲಿ ಅದ್ದೂರಿಯಾಗಿ ನಡೆದಿತ್ತು.

ಪಾಕಿಸ್ತಾನಿ ಕ್ರಿಕೆಟಿಗ ಶಾಹೀನ್ ಅಫ್ರಿದಿ ಫೆಬ್ರವರಿ ಮೂರರಂದು ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು. ಪಾಕಿಸ್ತಾನ ತಂಡದ ಮಾಜಿ ಸ್ಟಾರ್ ಆಟಗಾರ ಶಾಹಿದ್ ಅಫ್ರಿದಿ ಅವರ ಮಗಳು ಅನ್ಶಾ ಅಫ್ರಿದಿ ಅವರನ್ನು ವಿವಾಹವಾಗಿದ್ದಾರೆ.

ಕರಾಚಿಯಲ್ಲಿ ನಡೆದ ಮದುವೆಯಲ್ಲಿ ಪಾಕಿಸ್ತಾನಿ ಕ್ರಿಕೆಟ್​​ನ ಬಹುತೇಕ ಸೆಲೆಬ್ರಿಟಿಗಳು ಭಾಗಿಯಾಗಿದ್ದರು. ಪಾಕಿಸ್ತಾನ ಕ್ರಿಕೆಟ್​​ ತಂಡದ ನಾಯಕ ಬಾಬರ್ ಆಜಮ್, ಸರ್ಫರಾಜ್ ಖಾನ್, ನಸೀಮ್ ಶಾ ಮತ್ತು ಶಾದಾಬ್ ಖಾನ್ ಮದುವೆಗೆ ಹಾಜರಾಗಿದ್ದರು.

ಇತ್ತ ಪಾಕಿಸ್ತಾನದ ಕ್ರಿಕೆಟಿಗ ಶಾದಾಬ್ ಖಾನ್ ಪಾಕಿಸ್ತಾನ ತಂಡದ ಕೋಚ್ ಮತ್ತು ಮಾಜಿ ಸ್ಟಾರ್ ಆಟಗಾರ ಸಕ್ಲೀನ್ ಮುಷ್ತಾಕ್ ಅವರ ಮಗಳನ್ನು ವಿವಾಹವಾಗಿದ್ದಾರೆ. ಆಪ್ತರು ಮತ್ತು ಸ್ನೇಹಿತರು ಮಾತ್ರ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

ಶಾನ್ ಮಸೂದ್ ಮದುವೆಯೊಂದಿಗೆ ಪಾಕಿಸ್ತಾನಿ ಕ್ರಿಕೆಟ್ ಲೋಕದಲ್ಲೂ ಮದುವೆ ಸೀಸನ್ ಶುರುವಾಗಿದೆ. ಜನವರಿ 27 ರಂದು ನಡೆದ ಮದುವೆಯಲ್ಲಿ ಶಾಹಿದ್ ಅಫ್ರಿದಿ, ಶಾದಾಬ್ ಖಾನ್ ಸೇರಿದಂತೆ ಹಲವು ಸ್ಟಾರ್​​ಗಳು ಭಾಗವಹಿಸಿದ್ದರು.

ಇನ್ನು, ವರ್ಷದ ಆರಂಭದಲ್ಲಿ ಟೀಂ ಇಂಡಿಯಾದ ಮತ್ತೊಬ್ಬ ಸ್ಟಾರ್​ ಆಟಗಾರ ಅಕ್ಷರ್ ಪಟೇಲ್, ಗೆಳತಿ ಮೇಹಾ ಪಟೇಲ್ ಅವರೊಂದಿಗೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಜನವರಿ 26ರಂದು ವಡೋದರಾದಲ್ಲಿ ನಡೆದ ಮದುವೆ ಕಾರ್ಯಕ್ರಮದಲ್ಲಿ ಆಪ್ತ ಸ್ನೇಹಿತರು ಮತ್ತು ಸಂಬಂಧಿಕರು ಮಾತ್ರ ಪಾಲ್ಗೊಂಡಿದ್ದರು. ಮದುವೆ ಕಾರಣದಿಂದ ನ್ಯೂಜಿಲೆಂಡ್​ ವಿರುದ್ಧದ ಸೀಮಿತ ಓವರ್​​ಗಳ ಸರಣಿಯನ್ನು ಮಿಸ್​ ಮಾಡಿಕೊಂಡಿದ್ದರು.

ಉಳಿದಂತೆ ಟೀಂ ಇಂಡಿಯಾ ವೇಗದ ಬೌಲರ್​ ಶಾರ್ದೂಲ್ ಠಾಕೂರ್ ಮದುವೆ ಕೂಡ ನಿಶ್ಚಿಯವಾಗಿದೆ. ಶಾರ್ದೂಲ್​​ ಠಾಕೂರ್​​ರ ನಿಶ್ಚಿತಾರ್ಥ 2021ರ ನವೆಂಬರ್​ನಲ್ಲಿ ನಡೆದಿತ್ತು. ಯುವ ಜೋಡಿಯ ಮಡುವೆ ಫೆಬ್ರವರಿ 27 ರಂದು ನಿಗದಿಯಾಗಿದೆ. ಇನ್ನು, ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿರುವ ಟೀಂ ಇಂಡಿಯಾ ಆಟಗಾರರ ಅಕ್ಷರ್ ಪಟೇಲ್, ಮೇಹಾ ಪಾಟೇಲ್ ಹಾಗೂ ಕೆಎಲ್ ರಾಹುಲ್, ಆಥಿಯಾ ಶೆಟ್ಟಿ ಅವರ ಆರತಕ್ಷತೆಯ ಪ್ರತ್ಯೇಕ ಸಮಾರಂಭ ಬಿಡುವಿನ ಸಮಯದಲ್ಲಿ ನಡೆಲಿದ್ದು, ಈ ಕಾರ್ಯಕ್ರಮದಲ್ಲಿ ಟೀಂ ಇಂಡಿಯಾ ಕ್ರಿಕೆಟಿಗರು ಪಾಲ್ಗೊಳ್ಳುವ ಸಾಧ್ಯತೆ ಇದೆ.