Virat Kohli: 4 ವರ್ಷಗಳ ಬಳಿಕ ಶತಕ ಸಿಡಿಸಿ ಅಬ್ಬರಿಸಿದ ಕಿಂಗ್​ ಕೊಹ್ಲಿ, ಹೊಸ ಇತಿಹಾಸ ನಿರ್ಮಿಸಿದ ವಿರಾಟ್

ಆರ್​ಸಿಬಿ 19.2 ಓವರ್​ಗಳಲ್ಲಿ 2 ವಿಕೆಟ್​ ನಷ್ಟಕ್ಕೆ 187 ರನ್​ ಗಳಿಸುವ ಮೂಲಕ 8 ವಿಕೆಟ್​ಗಳ ಭರ್ಜರಿ ಗೆಲುವು ದಾಖಲಿಸಿತು. ಈ ಮೂಲಕ ಆರ್​ಸಿಬಿ ಪ್ಲೇಆಫ್​ ಹಂತಕ್ಕೆ ಸನಿಹವಾಗಿದ್ದಲ್ಲದೇ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೇರಿದೆ.

ವಿರಾಟ್ ಕೊಹ್ಲಿ ಇಂದು ಬೆಂಕಿ ಬ್ಯಾಟಿಂಗ್​ ಮಾಡುವ ಮೂಲಕ ಆಕರ್ಷಕ ಶತಕ ಸಿಡಿಸಿದರು. ಕೊಹ್ಲಿ 63 ಎಸೆತದಲ್ಲಿ 12 ಫೋರ್​ ಮತ್ತು 4 ಸಿಕ್ಸ್ ಮೂಲಕ 100 ರನ್ ಗಳಿಸಿದರು. ಈ ಮೂಲಕ ಈ ವರ್ಷ ಐಪಿಎಲ್​ನಲ್ಲಿಯೂ ತಮ್ಮ ಶತಕದ ಬರವನ್ನು ನೀಗಿಸಿದರು.

ಇದರ ನಡುವೆ ಕೊಹ್ಲಿ ಅಬ್ಬರಕ್ಕೆ ನಲುಗಿದ ಹೈದರಾಬಾದ್​ ಟೀಂ ಆರ್​ಸಿಬಿ ಎದುರು ಮಂಡಿಯೂರಿತು. ಈ ಮೂಲಕ ಕೊಹ್ಲಿ ಐಪಿಎಲ್​ನಲ್ಲಿ ಬರೋಬ್ಬರಿ 4 ವರ್ಷಗಳ ಬಳಿಕ ಶತಕ ಸಿಡಿಸಿ ಸಂಭ್ರಮಿಸಿದರು.

ಹೌದು, ಕಿಂಗ್​ ಕೊಹ್ಲಿ ಕೊನೆಯದಾಗಿ 2019 ರಲ್ಲಿ ಕೋಲ್ಕತ್ತಾ ನೈಟ್​ ರೈಡರ್ಸ್​ ವಿರುದ್ಧ ಶತಕ ಬಾರಿಸಿದ್ದರು. ಅದಾದ ಬಳಿಕ ಸತತ 4 ವರ್ಷದಿಂದ ಐಪಿಎಲ್​ ಶತಕಕ್ಕಾಗಿ ಕಾಯುತ್ತಿದ್ದರು. ಆದರೆ ಇಂದು ಆ ಕಾಯುವಿಕೆಗೂ ಫುಲ್​ಸ್ಟಾಪ್​ ಇಟ್ಟಿದ್ದಾರೆ.

ಕಳೆದ ಏಷ್ಯಾಕಪ್​ನಿಂದ ಸತತ ಶತಕ ಸಿಡಿಸುತ್ತಿರುವ ವಿರಾಟ್ ಕೊಹ್ಲಿ ಏಕದಿನ ಮತ್ತು ಟಿ20 ಮಾದರಿಯಲ್ಲಿ ಅಂತರಾಷ್ಟ್ರೀಯ ಪಂದ್ಯಗಳಲ್ಲಿನ ಸಂಚುರಿ ಬಳಿಕ ಇದೀಗ ಆರ್​ಸಿಬಿ ತಂಡದ ಮಹತ್ವದ ಪಂದ್ಯದಲ್ಲಿ ಐಪಿಎಲ್​ನಲ್ಲಿಯೂ ಶತಕ ಸಿಡಿಸಿದರು.

ಹೈದರಾಬಾದ್ ವಿರುದ್ಧ ಅದ್ಭುತ ಇನ್ನಿಂಗ್ಸ್ ಆಡುವ ವೇಳೆ ವಿರಾಟ್ ಕೊಹ್ಲಿ ಶತಕ ಬಾರಿಸಿ ಮತ್ತೊಮ್ಮೆ ಅಬ್ಬರಿಸಿದರು. ಇಂಡಿಯನ್ ಪ್ರೀಮಿಯರ್ ಲೀಗ್‌ನ ಇತಿಹಾಸದಲ್ಲಿ, ಈಗ ಅತಿ ಹೆಚ್ಚು ಶತಕಗಳನ್ನು ಗಳಿಸಿದ ಬ್ಯಾಟ್ಸ್‌ಮನ್‌ನ ದಾಖಲೆಯನ್ನು ನಿರ್ಮಿಸಿದ್ದಾರೆ.

ಹೌದು, ಕೊಹ್ಲಿ ಅತಿ ಹೆಚ್ಚು ಐಪಿಎಲ್​ ಶತಕ ಸಿಡಿಸಿದ ಪಟ್ಟಿಯಲ್ಲಿ ಗೇಲ್​ಗೆ ಸರಿಸಮನಾಗಿ ನಿಂತಿದ್ದಾರೆ. ಕ್ರಿಸ್ ಗೇಲ್ ಟೂರ್ನಿಯಲ್ಲಿ ಗರಿಷ್ಠ 6 ಶತಕಗಳನ್ನು ಬಾರಿಸಿದ ದಾಖಲೆಯನ್ನು ಹೊಂದಿದ್ದು, ಇದೀಗ ವಿರಾಟ್ ಅವರ ಸರಿಸಮಾನಕ್ಕೆ ತಲುಪಿದ್ದಾರೆ.