Virat Kohli: ರೋಹಿತ್​ ದಾಖಲೆ ಮೇಲೆ ವಿರಾಟ್ ಕಣ್ಣು, ಮತ್ತೆ ನಂಬರ್​ 1 ಆಗ್ತಾರಾ ಕಿಂಗ್​ ಕೊಹ್ಲಿ?

ಕಳೆದ ವರ್ಷದ ಏಷ್ಯಾಕಪ್​ ಬಳಿಕ ವಿರಾಟ್​ ಕೊಹ್ಲಿ ಮತ್ತೆ ತಮ್ಮ ಹಳೆಯ ಫಾರ್ಮ್​ಗೆ ಮರಳಿದ್ದಾರೆ. ಅಲ್ಲದೇ ಈ ವರ್ಷದ ಆರಂಭದಲ್ಲಿಯೇ ಭರ್ಜರಿ ಶತಕ ಸಿಡಿಸಿ ಹೊಸ ವರ್ಷವನ್ನು ಅಬ್ಬರಿಸಿದ್ದರು. ಈ ಮೂಲಕ ಕೊಹ್ಲಿ ಅನೇಕ ದಾಖಲೆಗಳನ್ನು ಮುರಿದಿದ್ದಾರೆ.

2022ರಲ್ಲಿ, ಕೊಹ್ಲಿ ಶತಕದ ಬರವನ್ನು ಕೊನೆಗೊಳಿಸಿದರು. ಏಷ್ಯಾ ಕಪ್ 2022 ರಿಂದ, ವಿರಾಟ್ ಇನ್ನಿಂಗ್ಸ್‌ನಲ್ಲಿ ಒಟ್ಟು ಮೂರು ಶತಕಗಳು ಹೊರಬಂದಿವೆ. ಅಲ್ಲದೇ ಕಳೆದ ಶ್ರೀಲಂಕಾ ಪಂದ್ಯದಲ್ಲಿಯೂ ಅವರು ಭರ್ಜರಿ 113 ರನ್​ಗಳ ಅದ್ಭುತ ಇನ್ನಿಂಗ್ಸ್​ ಆಡಿದರು. ಅಲ್ಲದೇ 3ನೇ ಪಂದ್ಯದಲ್ಲಿಯೂ 166 ರನ್​ಗಳ ಭರ್ಜರಿ ಶತಕ ಸಿಡಿಸಿದರು.

ಹಲವು ದಾಖಲೆಗಳನ್ನು ಹೊಂದಿರುವ ಕೊಹ್ಲಿ ಅವರ ಮುಂದೆ ಒಂದು ಸವಾಲಿದೆ. ಅವರು ಏಕದಿನ ಕ್ರಿಕೆಟ್‌ನಲ್ಲಿ ಒಂದು ಕ್ಯಾಲೆಂಡರ್ ವರ್ಷದಲ್ಲಿ ಶತಕಗಳ ದಾಖಲೆಯಲ್ಲಿ ಹಿಂದುಳಿದಿದ್ದಾರೆ. 2017 ಮತ್ತು 2018 ಕೊಹ್ಲಿ ತಮ್ಮ ಫಾರ್ಮ್‌ನ ಉತ್ತುಂಗವನ್ನು ತಲುಪಿದ ವರ್ಷಗಳು. ಎರಡೂ ವರ್ಷಗಳಲ್ಲಿ ಅವರು 6-6 ಶತಕಗಳನ್ನು ಬಾರಿಸಿದರು. ಏತನ್ಮಧ್ಯೆ, ಕೊಹ್ಲಿ ಇದೀಗ ಏಕದಿನ ಶ್ವಕಪ್ ವರ್ಷವನ್ನು ಶತಕದೊಂದಿಗೆ ಪ್ರಾರಂಭಿಸಿದ್ದಾರೆ. ಮತ್ತು ಈ ವರ್ಷ ವಿರಾಟ್ ಕೊಹ್ಲಿ ಆ ದಾಖಲೆಯನ್ನೂ ತಮ್ಮ ಖಾತೆಗೆ ಸೇರಿಸಿಕೊಳ್ಳುತ್ತಾರೆಯೇ ಎಂದು ಕಾದು ನೋಡಬೇಕಿದೆ.

ಶ್ರೀಲಂಕಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಕೊಹ್ಲಿ 113 ರನ್ ಗಳಿಸಿ ಅತ್ಯುತ್ತಮ ಇನ್ನಿಂಗ್ಸ್ ಆಡಿದ್ದರು. ಈ ಶತಕದೊಂದಿಗೆ ರನ್ ಮಷಿನ್ ಏಕದಿನ ಕ್ರಿಕೆಟ್ ನಲ್ಲಿ 45 ಶತಕಗಳನ್ನು ಪೂರೈಸಿದರು. ಈ ಮಾದರಿಯಲ್ಲಿ 49 ಶತಕ ಸಿಡಿಸಿರುವ ಭಾರತದ ಮಾಜಿ ದಿಗ್ಗಜ ಸಚಿನ್ ತೆಂಡೂಲ್ಕರ್ ಕೊಹ್ಲಿಗಿಂತ ಮುಂದಿದ್ದಾರೆ.

ಜೊತೆಗೆ ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮಾ 2019ರಲ್ಲಿ ರನ್‌ಗಳ ಮಹಾಪೂರವನ್ನೇ ಹರಿಸಿದ್ದರು. ಅವರು ಏಕದಿನ ವಿಶ್ವಕಪ್‌ನಲ್ಲಿಯೇ 5 ಅದ್ಭುತ ಶತಕಗಳನ್ನು ಗಳಿಸಿದ್ದರು. ಆ ವರ್ಷದಲ್ಲಿ ಹಿಟ್‌ಮ್ಯಾನ್ ಒಟ್ಟು 7 ಶತಕಗಳ ಇನ್ನಿಂಗ್ಸ್‌ಗಳನ್ನು ಆಡಿದ್ದರು. ರೋಹಿತ್ ಶರ್ಮಾ ಕೇವಲ 27 ಇನ್ನಿಂಗ್ಸ್‌ಗಳಲ್ಲಿ ಈ ಸಾಧನೆ ಮಾಡಿದ್ದಾರೆ. ಇದೀಗ ಕೊಹ್ಲಿ ಈವರ್ಷ ಈ ಸಾಧನೆ ಮಾಡಲಿದ್ದಾರೆಯೇ ಎಂದು ಕಾದು ನೋಡಬೇಕಿದೆ.

2019ರಲ್ಲಿ ರೋಹಿತ್ ಶರ್ಮಾ 57.30ರ ಸರಾಸರಿಯಲ್ಲಿ 1490 ರನ್ ಗಳಿಸಿದ್ದರು. ಆ ಸಮಯದಲ್ಲಿ, 7 ಶತಕಗಳ ಜೊತೆಗೆ, ಹಿಟ್‌ಮ್ಯಾನ್ 6 ಅರ್ಧಶತಕಗಳ ಇನ್ನಿಂಗ್ಸ್‌ಗಳನ್ನು ಸಹ ಆಡಿದ್ದರು. ವಿರಾಟ್ ಕೊಹ್ಲಿ 2023ರಲ್ಲಿ ಶತಕ ಬಾರಿಸುವ ಮೂಲಕ ಆರಂಭಿಸಿದ್ದಾರೆ. ಈ ವರ್ಷ ವಿಶ್ವಕಪ್ ಕೂಡ ಇದೆ. ಇದರೊಂದಿಗೆ ರೋಹಿತ್ ದಾಖಲೆಯನ್ನು ಕೊಹ್ಲಿ ಮುರಿಯುತ್ತಾರೆಯೇ ಎಂದು ಕಾದು ನೋಡಬೇಕಿದೆ.

ಈ ಪಟ್ಟಿಯಲ್ಲಿ ಭಾರತದ ಮಾಜಿ ಅನುಭವಿ ಆಟಗಾರ ಸೌರವ್ ಗಂಗೂಲಿ ಕೂಡ ಇದ್ದಾರೆ. 2000ನೇ ಇಸವಿಯಲ್ಲಿ ದಾದಾ 32 ಏಕದಿನ ಪಂದ್ಯಗಳನ್ನು ಆಡಿ ಏಳು ಶತಕಗಳನ್ನು ಬಾರಿಸಿದ್ದರು. ಸೌರವ್ ಗಂಗೂಲಿ 56.39 ಸರಾಸರಿಯಲ್ಲಿ 6 ಅರ್ಧಶತಕ ಸೇರಿದಂತೆ 1579 ರನ್ ಗಳಿಸಿದ್ದರು.

ಈ ದಾಖಲೆಯಲ್ಲಿ ಮೊದಲ ಹೆಸರು ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಕೇಳಿಬರುತ್ತದೆ. ಅವರು 1998ರಲ್ಲಿ 32 ಪಂದ್ಯಗಳ ಮೂಲಕ 65.31ರ ಸರಾಸರಿಯಲ್ಲಿ 1894 ರನ್ ಗಳಿಸಿದ್ದರು. ಆ ವರ್ಷ ಸಚಿನ್ 9 ಶತಕಗಳನ್ನು ಬಾರಿಸಿದ್ದರು.