Pro Kabaddi: ಯು ಮುಂಬಾಗೆ ಮನೆ ದಾರಿ ತೋರಿಸಲು ಸಜ್ಜಾದ ಪಾಟ್ನಾ ಪೈರೇಟ್ಸ್​​.. ವಿಜಯಲಕ್ಷ್ಮಿ ಯಾರ ಕಡೆ ಒಲಿಯುತ್ತಾಳೆ?

ಬೆಂಗಳೂರಿನಲ್ಲಿ ಎಂಟನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್ ಟೂರ್ನಿ ನಡೆಯುತ್ತಿದ್ದು, ಇಂದು ಎರಡು ಪಂದ್ಯಗಳು ನಡೆಯಲಿವೆ. ಮೊದಲಿಗೆ ಸಂಜೆ 7.30ಕ್ಕೆ ತಮಿಳು ತಲೈವಾಸ್​ ಹಾಗೂ ಹರಿಯಾಣ ಸ್ಟೀಲರ್ಸ್ ನಡುವೆ ಕಾದಾಟ ನಡೆಯಲಿದೆ. ನಂತರ 8:30ಕ್ಕೆ ಯು ಮುಂಬಾ ವರ್ಸಸ್​ ಪಾಟ್ನಾ ಪೈರೇಟ್ಸ್ ಕಾದಾಟ ನಡೆಸಲಿವೆ.

ತಮಿಳ್​ ತಲೈವಾಸ್​ ತಂಡ ಒಟ್ಟು 16 ಪಂದ್ಯಗಳನ್ನಾಡಿದ್ದು, 5 ಪಂದ್ಯ ಗೆದ್ದು, 5ರಲ್ಲಿ ಸೋಲು ಕಂಡಿದೆ. 45 ಅಂಕಗಳೊಂದಿಗೆ ಟೇಬಲ್​ನಲ್ಲಿ 8ನೇ ಸ್ಥಾನ ಪಡೆದುಕೊಂಡಿದೆ. ಲೀಗ್​ ಹಂತದ ಬಳಿಕ ಪ್ಲೇ ಆಫ್​ ಹಂತಕ್ಕೆ ತಂಡ ಹೋಗಬೇಕೆಂದರೆ ಉಳಿದ ಪಂದ್ಯಗಳನ್ನು ಗೆಲ್ಲಲೇಬೇಕಾದ ಅನಿವಾರ್ಯ ಉಂಟಾಗಿದೆ.

ಇನ್ನೂ ತಮಿಳು ತಲೈವಾಸ್​ಗೆ ಸವಾಲೊಡ್ಡಿರುವ ಹರಿಯಾಣ ಸ್ಟೀಲರ್ಸ್​ ತಂಡ ಆಡಿರುವ 17 ಪಂದ್ಯದಲ್ಲಿ 8ರಲ್ಲಿ ಗೆದ್ದು, 6ರಲ್ಲಿ ಸೋತಿದೆ. 53 ಅಂಕಗಳಿಸಿ 4ನೇ ಸ್ಥಾನದಲ್ಲಿದೆ. ಹೀಗಾಗಿ ಇಂದಿನ ಪಂದ್ಯ ರಣರೋಚಕತೆಯಿಂದ ಕೂಡಿರಲಿದೆ.

ಯು ಮುಂಬಾ ತಂಡ 16 ಪಂದ್ಯಗಳನ್ನಾಡಿದ್ದು, 6ರಲ್ಲಿ ಗೆದಿದೆ. 5 ಪಂದ್ಯಗಳನ್ನು ಸೋತಿದ್ದು, 48 ಅಂಕಗಳೊಂದಿಗೆ ಪಾಯಿಂಟ್ಸ್​ ಟೇಬಲ್​ 6ನೇ ಸ್ಥಾನದಲ್ಲಿದೆ. ಮುಂದಿನ ಹಂತಕ್ಕೆ ಈ ತಂಡ ಪ್ರವೇಶ ಪಡೆಯುವುದು ಬಹಳ ಕಷ್ಟ ಎಂದು ಹೇಳಲಾಗುತ್ತಿದೆ.

ಯು ಮುಂಬಾಗೆ ಮತ್ತೆ ಶಾಕ್​ ಕೊಡುವುದಕ್ಕೆ ಪಾಟ್ನಾ ಪೈರೆಟ್ಸ್​​ ತಂಡ ಸಜ್ಜಾಗಿದೆ. ಪಾಟ್ನಾ ಪೈರೆಟ್ಸ್​ ತಂಡ 16 ಪಂದ್ಯಗಳನ್ನಾಡಿದ್ದು, 11 ಪಂದ್ಯಗಳಲ್ಲಿ ಗೆದ್ದು ಬೀಗಿದೆ. ಕೇವಲ ನಾಲ್ಕು ಪಂದ್ಯಗಳಲ್ಲಿ ಸೋತಿದೆ. ಒಟ್ಟು 60 ಅಂಕಗಳೊಂದಿಗೆ ಪಾಯಿಂಟ್ಸ್​ ಟೇಬಲ್​ನಲ್ಲಿ ಮೊದಲನೇ ಸ್ಥಾನವನ್ನು ಅಲಂಕರಿಸಿದೆ.