HBD Sachin Tendulkar: ಇಂದು ಕ್ರಿಕೆಟ್​ ದೇವರಿಗೆ ಜನ್ಮದಿನದ ಸಂಭ್ರಮ, ಇಲ್ಲಿದೆ ಯಾರಿಗೂ ತಿಳಿದಿರದ ಸಚಿನ್​ ಬಗೆಗಿನ ಆಸಕ್ತಿಕರ ಸಂಗತಿಗಳು

ಕ್ರಿಕೆಟ್ ಲೋಕದ ದೇವರು ಮಾಸ್ಟರ್ ಬ್ಲಾಸ್ಟರ್ ಸಚಿನ್‌ ತೆಂಡುಲ್ಕರ್ ಅವರು ಇಂದು 50ನೇ ವಸಂತಕ್ಕೆ ಕಾಲಿಟ್ಟಿದ್ದು ಅಭಿಮಾನಿಗಳು, ಮಾಜಿ ಕ್ರಿಕೆಟಿಗರು ಸೇರಿದಂತೆ ಅನೇಕರು ಸಚಿನ್ ಅವರಿಗೆ ಸಾಮಾಜಿಕ ತಾಣಗಳಲ್ಲಿ ಶುಭಾಶಯಗಳನ್ನು ತಿಳಿಸುತ್ತಿದ್ದಾರೆ.

ಮಹಾರಾಷ್ಟ್ರದ ಮುಂಬೈನಲ್ಲಿ 1973ರಂದು ಜನಿಸಿದ ಮಾಸ್ಟರ್‌ ಬ್ಲಾಸ್ಟರ್‌ ಸಚಿನ್‌ ಶತಕದ ಶತಕಗಳ ಸರದಾರ. ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 100 ಶತಗಳನ್ನು ಬಾರಿಸಿ ದಾಖಲೆ ಮಾಡಿದ ಕ್ರಿಕೆಟ್‌ ಏಕೈಕ ದಂತಕತೆ ಅಂದರೆ ಅದು ಸಚಿನ್​ ತೆಂಡೂಲ್ಕರ್​.

24 ವರ್ಷಗಳ ಕಾಲ ಕ್ರಿಕೆಟ್ ಆಡಿ ಬ್ಯಾಟಿಂಗ್​​ನಲ್ಲಿ ನೂರಾರು ದಾಖಲೆ ಬರೆದ ಸಚಿನ್, ಭಾರತ ರತ್ನ ಪುರಸ್ಕೃತರೂ ಹೌದು. ಇಂದಿಗೂ ಸಚಿನ್ ಅವರು ಯುವ ಆಟಗಾರರಿಗೆ ಮಾದರಿಯಾಗಿದ್ದಾರೆ. ಲಿಟ್ಲ್​ ಮಾಸ್ಟರ್​ ಎಂದೇ ಪ್ರಖ್ಯಾತಿ ಆಗಿರುವ ಸಚಿನ್​ ಅವರು ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಪಾಕಿಸ್ತಾನ ವಿರುದ್ಧದ ಪಂದ್ಯದ ಮೂಲಕ ಪದಾರ್ಪಣೆ ಮಾಡಿದರು.

ಅಂತಾರಾಷ್ಟ್ರೀಯ ಏಕದಿನ ಪಂದ್ಯಾಗಳಲ್ಲಿ ಅಜೇಯ 200 ರನ್​ ಗಳಿಸಿದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ 2010ರಲ್ಲೇ ಸಚಿನ್​ ಅವರು ಪಾತ್ರರಾಗಿದ್ದಾರೆ. ಏಕದಿನ ಕ್ರಿಕೆಟ್​​ನಲ್ಲಿ ಒಟ್ಟು 463 ಪಂದ್ಯಗಳನ್ನು ಆಡಿರುವ ಇವರು 18,426 ರನ್ ಕಲೆಹಾಕಿದ್ದಾರೆ. 49 ಶತಕ ಹಾಗೂ 96 ಅರ್ಧಶತಕ ಸಿಡಿಸಿದ್ದಾರೆ. ಬೌಲಿಂಗ್​​ನಲ್ಲೂ 154 ವಿಕೆಟ್ ಪಡೆದುಕೊಂಡಿದ್ದಾರೆ. ಟೆಸ್ಟ್​​ನಲ್ಲಿ 200 ಪಂದ್ಯಗಳನ್ನಾಡಿದ್ದು, 15,921 ರನ್ ಗಳಿಸಿದ್ದಾರೆ. ಇದರಲ್ಲಿ 51 ಶತಕ ಹಾಗೂ 68 ಅರ್ಧಶತಕ ಬಾರಿಸಿದ್ದಾರೆ.

ಅದರಂತೆ 2013ರಲ್ಲಿ ವಿಂಡೀಸ್​ ವಿರುದ್ಧವೇ ಟೆಸ್ಟ್ ಪಂದ್ಯಕ್ಕೆ ಹಾಗೂ 2012ರಲ್ಲಿ ಪಾಕ್ ವಿರುದ್ಧದ ಏಕದಿನ ಪಂದ್ಯಕ್ಕೆ ವಿದಾಯ ಹೇಳುವ ಮೂಲಕ ಅಂತರಾಷ್ಟ್ರೀಯ ಕ್ರಿಕೆಟ್ ಲೋಕಕ್ಕೆ ಗುಡ್ ಬೈ ಹೇಳಿದರು.

ಕೇವಲ ತಮ್ಮ ಬ್ಯಾಟ್​ ನಿಂದ ಮಾತ್ರವಲ್ಲದೇ ಕೆಲ ವಿಚಿತ್ರ ದಾಖಲೆಗಳೂ ಅವರ ಹೆಸರಿನಲ್ಲಿದೆ. ಹೌದು ಅತೀ ಹೆಚ್ಚು ಬಾರಿ ನರ್ವಸ್ 90ಗೆ ಔಟ್ ಆದ ಆಟಗಾರರಾಗಿದ್ದಾರೆ. ಇದರಲ್ಲದೇ ಮೂರನೆ ಅಂಪೈರ್ ನಿರ್ಣಯದಿಂದ ರನ್‍ಔಟ್ ಆದ ಮೊದಲ ಆಟಗಾರ ಸಹ ಹೌದು.

ಸಚಿನ್ 22 ನೇ ವಯಸ್ಸಿನಲ್ಲಿ ವಿವಾಹವಾದರು. ಸಚಿನ್​ ಅವರಿಗೆ ಅರ್ಜುನ್​ ಮತ್ತು ಸಾರಾ ಎಂಬ ಇಬ್ಬರು ಮಕ್ಕಳಿದ್ದಾರೆ. ಸಾರಾ ಮಾಡಲಿಂಗ್​ ಮಾಡುತ್ತಿದ್ದರೆ, ಅರ್ಜುನ್​ ಸದ್ಯ ಐಪಿಎಲ್​ನಲ್ಲಿ ಮುಂಬೈ ಪರ ಆಡುತ್ತಿದ್ದಾರೆ.

ಸಚಿನ್ ಅವರ ಮಗಳು 'ಸಾರಾ' ಅವರಿಗೆ ಅದೇ ಹೆಸರಿಡಲು ಒಂದು ಕಾರಣವಿದೆ. ಸಚಿನ್ ನಾಯಕನಾಗಿ ಗೆದ್ದ ಮೊದಲ ಪಂದ್ಯಾವಳಿಯ ನಂತರ ಮಗಳಿಗೆ ಸಾರಾ ಎಂದು ಹೆಸರಿಟ್ಟಿದ್ದಾರೆ. 1997 ರಲ್ಲಿ 'ಸಹಾರಾ' ಕಪ್ ವಿಜೇತರಾಗಿದ್ದರು.

ಸಚಿನ್ ಅವರ ಸಾಧನೆಗೆ ಭಾರತರತ್ನ, ಪದ್ಮವಿಭೂಷಣ ಪ್ರಶಸ್ತಿ, ಪದ್ಮಶ್ರೀ ಪ್ರಶಸ್ತಿ, ರಾಜೀವ್ ಗಾಂಧಿ ಖೇಲ್ ರತ್ನ, ಲಾರೆಸ್ ವಿಶ್ವ ಕ್ರೀಡಾ ಪ್ರಶಸ್ತಿ 2020 ಸೇರಿದಂತೆ ಅನೇಕ ಪ್ರಶಸ್ತಿಗಳು ಲಭಿಸಿವೆ.