Deepak Hooda: ಸ್ಟಾರ್ ಬಾಕ್ಸರ್ ಜೊತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಟೀಂ ಇಂಡಿಯಾ ನಾಯಕ, ಇಲ್ಲಿವೆ ವೆಡ್ಡಿಂಗ್​ ಫೋಟೋಸ್

ಅಂತಾರಾಷ್ಟ್ರೀಯ ಬಾಕ್ಸರ್ ಮತ್ತು ಭೀಮ್ ಪ್ರಶಸ್ತಿ ಪುರಸ್ಕೃತ ಬಾಕ್ಸರ್​ ಸ್ವೀಟಿ ಬುರಾ ಹಾಗೂ ಭಾರತ ಕಬಡ್ಡಿ ತಂಡದ ನಾಯಕ ದೀಪಕ್ ಹೂಡಾ ಇಬ್ಬರೂ ಜುಲೈ 7ರಂದು ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಇದೀಗ ಇವರಿಬ್ಬರ ಮದುವೆಯ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.

ದಕ್ಷಿಣ ಬೈಪಾಸ್‌ನ ರತನ್ ಪ್ಯಾಲೇಸ್‌ನಲ್ಲಿ ವಿವಾಹ ಸಮಾರಂಭ ಅದ್ಧೂರಿಯಾಗಿ ನಡೆಯಿತು. ಈ ಸ್ಟಾರ್​ ಆಟಗಾರರ ವಿವಾಹಕ್ಕೆ ಅನೇಕ ಕ್ರೀಡಾ ಗಣ್ಯರು ಸಾಕ್ಷಿಯಾದರು. ಇನ್ನು, ಸ್ವೀಟಿ ಬುರಾ ಇನ್ನೂ ಸೆಪ್ಟೆಂಬರ್​ ನಲ್ಲಿ ಚೀನಾದಲ್ಲಿ ನಡೆಯಲಿರುವ ಏಷ್ಯನ್ ಗೇಮ್ಸ್ ಗೆ ತಯಾರಿ ನಡೆಸುತ್ತಿದ್ದಾರೆ.

ದೀಪಕ್ ಮತ್ತು ಸ್ವೀಟಿ 2015 ರಲ್ಲಿ ಮ್ಯಾರಥಾನ್‌ನಲ್ಲಿ ಭೇಟಿಯಾದರು. ಆ ನಂತರ ಇಬ್ಬರೂ ಸ್ನೇಹಿತರಾದರು. ಇದಾದ ಬಳಿಕ ಇಬ್ಬರ ನಡುವೆ ಪ್ರೀತಿ ಚಿಗುರಿತ್ತು. ಒಂದು ವರ್ಷದ ಬಳಿಕ ದೀಪಕ್ ಅವರು ಸ್ವೀಟಿ ಅವರಿಗೆ ಪ್ರಪೋಸ್ ಮಾಡಿದ್ದರಂತೆ. ಇದೀಗ ಇವರಿಬ್ಬರೂ ದಾಂಪತ್ಯ ಜೀವನಕ್ಕೆ ಸಂತಸದಿಂದ ಕಾಲಿಟ್ಟಿದ್ದಾರೆ.

ಇನ್ನು ಮದುವೆಯ ಕುರಿತು ಮಾತನಾಡಿರುವ ಬಾಕ್ಸರ್​ ಸ್ವೀಟಿ ಬುರಾ, ‘ಮದುವೆಯ ನಂತರ ಸಹಜವಾಗಿ ತನ್ನ ಜವಾಬ್ದಾರಿ ಹೆಚ್ಚುತ್ತದೆ, ಆದರೆ ತನ್ನ ಆಟವನ್ನು ಬಿಡುವುದಿಲ್ಲ‘ ಎಂದು ಹೇಳಿದ್ದಾರೆ.

2020 ರಲ್ಲಿ, ಭಾರತ ಸರ್ಕಾರವು ದೀಪಕ್ ನಿವಾಸ್ ಹೂಡಾ ಅವರಿಗೆ ಕಬಡ್ಡಿ ಕ್ಷೇತ್ರದಲ್ಲಿ ಅವರ ಅತ್ಯುತ್ತಮ ಪ್ರದರ್ಶನಕ್ಕಾಗಿ ಅರ್ಜುನ ಪ್ರಶಸ್ತಿಯನ್ನು ನೀಡಿ ಗೌರವಿಸಿದೆ. ಅಲ್ಲದೇ ದೀಪಕ್​ ಅವರು ಟೀಂ ಇಂಡಿಯಾ ಕಬಡ್ಡಿ ತಂಡದ ಪರ ನಾಯಕರಾಗಿದ್ದಾರೆ. ಜೊತೆಗೆ 2014ರಲ್ಲಿ ಪ್ರೊ ಕಬಡ್ಡಿ ಲೀಗ್​ಗೆ ಪಾದಾರ್ಪಣೆ ಮಾಡಿದರು.

ದೀಪಕ್ ಹೂಡಾ ಕೂಡ ಕಬಡ್ಡಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದಾರೆ. ನಾಯಕನಾಗಿ ಹಾಗೂ ರೈಡರ್ ಆಗಿ ತಂಡದ ಗೆಲುವಿಗೆ ಶ್ರಮಿಸಿದ್ದನ್ನು ಕಾಣಬಹುದಾಗಿದೆ. ಸದ್ಯ ನವ ವಿವಾಹಿತ ಜೋಡಿಗೆ ಅಭಿಮಾನಿಗಳು ಸಾಮಾಜಿಕ ಜಾಲತಾಣದಲ್ಲಿ ಶುಭ ಹಾರೈಸುತ್ತಿದ್ದಾರೆ.