Shaheen Afridi: ಅಫ್ರಿದಿ ಮಗಳ ಜೊತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಪಾಕ್​ ವೇಗಿ, ಮದ್ವೆ ಆದ್ರೂ ಹೆಂಡ್ತಿ ಜೊತೆ ಇರಲ್ವಂತೆ ಶಾಹೀನ್!

ಪಾಕಿಸ್ತಾನ ಕ್ರಿಕೆಟ್‌ನಲ್ಲಿ ಮದುವೆಯ ಸೀಸನ್‌ ನಡೆಯುತ್ತಿದೆ. ಹ್ಯಾರಿಸ್ ರೌಫ್, ಶಾದಾಬ್ ಖಾನ್ ಮತ್ತು ಶಾನ್ ಮಸೂದ್ ನಂತರ ಪಾಕಿಸ್ತಾನದ ಮತ್ತೊಬ್ಬ ಕ್ರಿಕೆಟಿಗ ಶಾಹೀನ್ ಅಫ್ರಿದಿ ವಿವಾಹವಾಗಿದ್ದಾರೆ. ಶಾಹೀನ್ ಮಾಜಿ ನಾಯಕ ಶಾಹಿದ್ ಅಫ್ರಿದಿ ಪುತ್ರಿ ಅನ್ಶಾ ಅವರ ಜೊತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಈ ಕಾರ್ಯಕ್ರಮವು ಪಾಕಿಸ್ತಾನದ ಬಂದರು ನಗರ ಎಂದು ಕರೆಯಲ್ಪಡುವ ಕರಾಚಿ ನಗರದಲ್ಲಿ ನಡೆಯಿತು.

ಕರಾಚಿಯ ಜಕಾರಿಯಾ ಮಸೀದಿಯಲ್ಲಿ ಶಾಹೀನ್ ಅಫ್ರಿದಿ ಮತ್ತು ಅನ್ಶಾ ಅವರ ಮದುವೆ ಅದ್ಧೂರಿಯಾಗಿ ಜರುಗಿತು. ಈ ಸಂದರ್ಭದಲ್ಲಿ, ಶಾಹಿದ್ ಅಫ್ರಿದಿ ಜೊತೆ ಶಾಹೀನ್ ಕುಟುಂಬದ ಸದಸ್ಯರು ಉಪಸ್ಥಿತರಿದ್ದರು.

ಕುಟುಂಬದ ಮೂಲಗಳ ಪ್ರಕಾರ, ಶಾಹೀನ್ ಮತ್ತು ಅನ್ಶಾ ಅವರ ಮೆಹಂದಿ ಕಾರ್ಯಕ್ರಮ ನಡೆದಿದೆ. ಶಾಹೀನ್ ಕುಟುಂಬವು ಮದುವೆಗೆ ಎರಡು ದಿನಗಳ ಹಿಂದೆ ಕರಾಚಿಗೆ ಬಂದಿತ್ತು.

ಇನ್ನು, ಶಾಹೀನ್ ಮದುವೆ ನಡೆದಿರಬಹುದು. ಆದರೆ ಈಗ ಅನ್ಶಾ ಜೊತೆ ಇರುವುದಿಲ್ಲ. ಏಕೆಂದರೆ ಅಫ್ರಿದಿ ತನ್ನ ಮಗಳು ಅನ್ಶಾ ತನ್ನ ಅಧ್ಯಯನವನ್ನು ಮೊದಲು ಮುಗಿಸಬೇಕೆಂದು ಬಯಸಿದ್ದರು. ಹೀಗಾಗಿ ಮದುವೆಯಾದರೂ ಶಾಹೀನ್ ಸದ್ಯಕ್ಕೆ ಪತ್ನಿಯೊಂದಿಗೆ ಇರಲು ಸಾಧ್ಯವಿಲ್ಲ.

ಶಾಹೀನ್ ಮದುವೆಯಾದ ತಕ್ಷಣ ಆರತಕ್ಷತೆ ಕಾರ್ಯಕ್ರಮ ನಡೆಯಿತು. ಇದರಲ್ಲಿ ಪಾಕ್ ತಂಡದ ನಾಯಕ ಬಾಬರ್ ಅಜಮ್, ಸರ್ಫರಾಜ್ ಅಹ್ಮದ್, ಶಾದಾಬ್ ಖಾನ್, ನಸೀಮ್ ಶಾ ಮೊಹಮ್ಮದ್ ಹಫೀಜ್ ಮತ್ತು ಪಾಕಿಸ್ತಾನದ ಮಾಜಿ ಕೋಚ್ ಸಕ್ಲೇನ್ ಮುಷ್ತಾಕ್ ಉಪಸ್ಥಿತರಿದ್ದರು. ಇವರಲ್ಲದೆ, ಹಿರಿಯ ಸ್ಕ್ವಾಷ್ ಆಟಗಾರ ಜಹಾಂಗೀರ್ ಖಾನ್ ಕೂಡ ಉಪಸ್ಥಿತರಿದ್ದರು.

ಶಾಹೀನ್ ಅವರ ತಂಡ ಲಾಹೋರ್ ಖಲಂದರ್ಸ್ ಪಾಕಿಸ್ತಾನ ಸೂಪರ್ ಲೀಗ್‌ನ ಹಾಲಿ ಚಾಂಪಿಯನ್ ಆಗಿದೆ. ಫೆಬ್ರವರಿ 13 ರಿಂದ ಪ್ರಾರಂಭವಾಗುವ ಪಿಎಸ್ಎಲ್ 8ನೇ ಋತುವಿನಲ್ಲಿ ಅವರು ಮೈದಾನದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಹೊಸ ವರ್ಷದ ಆರಂಭದಲ್ಲಿಯೇ ಪಾಕಿಸ್ತಾನದ 4 ಆಟಗಾರರು ವಿವಾಹವಾಗಿದ್ದಾರೆ. ಈಗ ಎಲ್ಲರ ಕಣ್ಣು ಕ್ಯಾಪ್ಟನ್ ಬಾಬರ್ ಆಜಮ್ ಮೇಲೆ ನೆಟ್ಟಿದೆ. ಅವರು ಯಾವಾಗ ಮದುವೆಯಾಗುತ್ತಾರೆ ಎಂದು ಇದೀಗ ಎಲ್ಲಡೆ ಚರ್ಚೆ ಆಗುತ್ತಿದೆ.

ಇದರ ನಡುವೆ ಬಾಬರ್ ಅಜಮ್​ ಹುಡುಗಿಯನ್ನು ಪ್ರೀತಿಸುತ್ತಿದ್ದಾರೆ ಎಂದು ಹೇಳಲಾಗುತ್ತಿದೆ. ಬಾಬರ್​ ಅವರ ಪ್ರೇಯಸಿ ಹೆಸರು ನಾಡಿಯಾ ಎಂದು ಹೇಳಲಾಗುತ್ತಿದ್ದು, ಅವಳು ಬಾಬರ್ ಅವರ ಸೋದರಸಂಬಂಧಿ ಎಂದು ಹೇಳಲಾಗಿದೆ. ಇಬ್ಬರೂ ಶೀಘ್ರದಲ್ಲೇ ಮದುವೆಯಾಗುತ್ತಾರೆ ಎನ್ನಲಾಗುತ್ತಿದೆ.