Rishabh Pant: ಐಪಿಎಲ್​ನಿಂದ ರಿಷಭ್​ ಪಂತ್ ಔಟ್​, ಆದ್ರೂ ಸಿಗಲಿದೆ ಬರೋಬ್ಬರಿ 21 ಕೋಟಿ!

ರಸ್ತೆ ಅಪಘಾತದಲ್ಲಿ ಗಾಯಗೊಂಡ ಟೀಂ ಇಂಡಿಯಾದ ಸ್ಟಾರ್ ವಿಕೆಟ್ ಕೀಪರ್ ರಿಶಪ್ ಪಂತ್ ಅಸ್ಥಿರಜ್ಜು ಗಾಯಕ್ಕೆ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದಾರೆ. ತಜ್ಞರ ಪ್ರಕಾರ, ಅವರು ಶಸ್ತ್ರಚಿಕಿತ್ಸೆಯ ನಂತರ ಮೈದಾನಕ್ಕೆ ಮರಳಲು 6 ತಿಂಗಳಿಗಿಂತ ಹೆಚ್ಚು ಸಮಯ ತೆಗೆದುಕೊಳ್ಳಬಹುದು ಎಂದಿದ್ದಾರೆ.

ಅಂದರೆ, ಐಪಿಎಲ್ 2023 ರಲ್ಲಿ ಪಂತ್ ಆಡುವುದು ಬಹುತೇಕ ಕಷ್ಟಕರವಾಗಲಿದೆ. ಈಗ ಪ್ರಶ್ನೆ ಏನೆಂದರೆ, ಪಂತ್ ಅವರು ಐಪಿಎಲ್ ಆಡದಿದ್ದರೆ, ಅವರು 16 ಕೋಟಿ ರೂಪಾಯಿಗಳನ್ನು ಪಡೆಯುತ್ತಾರೆಯೇ ಎಂದು ಅನುಮಾನ ಮೂಡಿದೆ.

ಐಪಿಎಲ್ 2023ಕ್ಕೆ ಡೆಲ್ಲಿ ಕ್ಯಾಪಿಟಲ್ಸ್ ಪಂತ್​ ಅವರನ್ನು 16 ಕೋಟಿಗೆ ಉಳಿಸಿಕೊಂಡಿತ್ತು. ಆದರೆ ಇದೀಗ ಪಂತ್​ ಅವರು ಐಪಿಎಲ್​ನಲ್ಲಿ ಆಡದಿದ್ದಲ್ಲಿ ಅವರಿಗೆ ಹಣ ನೀಡಲಾಗುತ್ತದೆಯೇ ಎಂದು ಕೇಳಲಾಗುತ್ತಿದೆ. ಇದಕ್ಕೆ ಉತ್ತರ ಇಲ್ಲಿದ್ದು, ಈ ಹಣವನ್ನು ಫ್ರಾಂಚೈಸಿ ನೀಡುವುದಿಲ್ಲ, ಬದಲಿಗೆ ಬಿಸಿಸಿಐ ನೀಡುತ್ತದೆ.

ಈ ಸಂಕಷ್ಟದ ಸಮಯದಲ್ಲಿ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ಅಂದರೆ ಬಿಸಿಸಿಐ ರಿಷಬ್ ಪಂತ್ ಜೊತೆ ನಿಂತಿದೆ. ಅವರ ಚಿಕಿತ್ಸೆಯ ಎಲ್ಲಾ ವೆಚ್ಚವನ್ನು ಬಿಸಿಸಿಐ ಭರಿಸುವುದಾಗಿ ಹೇಳಿಕೊಂಡಿದೆ.

ಪಂತ್ ಈ ವರ್ಷ ಐಪಿಎಲ್‌ನಲ್ಲಿ ಆಡದಿದ್ದರೂ, ಬಿಸಿಸಿಐ ಅವರ ಐಪಿಎಲ್ ಸಂಬಳದ 16 ಕೋಟಿಗಳನ್ನು ದೆಹಲಿ ಕ್ಯಾಪಿಟಲ್ಸ್‌ ಪರವಾಗಿ ಸಂಪೂರ್ಣವಾಗಿ ಪಾವತಿಸುತ್ತದೆ. ಇದು ಮಾತ್ರವಲ್ಲದೆ, ಕೇಂದ್ರ ಒಪ್ಪಂದದಡಿಯಲ್ಲಿ ಅವರು ಪಡೆದ ವಾರ್ಷಿಕ ರಿಟೈನರ್‌ಶಿಪ್ ಶುಲ್ಕಕ್ಕೆ 5 ಕೋಟಿ ರೂ.ಗಳನ್ನು ನೀಡುತ್ತದೆ.

ಇದೀಗ ಪಂತ್ ಅವರನ್ನು ಡೆಲ್ಲಿ ಕ್ಯಾಪಿಟಲ್ಸ್ 16 ಕೋಟಿಗೆ ಖರೀದಿಸಿ ಐಪಿಎಲ್ 2023ಕ್ಕೆ ಉಳಿಸಿಕೊಂಡರೆ, ಬಿಸಿಸಿಐ ಪಂತ್ ಅವರ ಐಪಿಎಲ್ ಸಂಬಳವನ್ನು ಏಕೆ ಪಾವತಿಸುತ್ತದೆ ಎಂಬ ಪ್ರಶ್ನೆ ಎಲ್ಲರಲ್ಲಿಯೂ ಮೂಡುತ್ತದೆ. ಆದರೆ ಇದಕ್ಕೂ ಒಂದು ನಿಯಮವಿದೆ.

ವಾಸ್ತವವಾಗಿ, ಎಲ್ಲಾ ಕೇಂದ್ರೀಯ ಗುತ್ತಿಗೆ ಆಟಗಾರರನ್ನು ವಿಮೆ ಮಾಡಲಾಗುತ್ತದೆ. ಬಿಸಿಸಿಐ ನಿಯಮಗಳ ಪ್ರಕಾರ, ಈ ಆಟಗಾರರು ಗಾಯದ ಕಾರಣ ಐಪಿಎಲ್‌ನಿಂದ ಹೊರಗುಳಿದಿದ್ದಲ್ಲಿ ಮಂಡಳಿಯಿಂದ ಪೂರ್ಣವಾಗಿ ಪಾವತಿಸಲಾಗುತ್ತದೆ. ಸಂಬಂಧಪಟ್ಟ ಫ್ರಾಂಚೈಸಿ ಅಲ್ಲ, ಬದಲಿಗೆ ವಿಮಾ ಕಂಪನಿಯು ಸಂಬಳವನ್ನು ಪಾವತಿಸುತ್ತದೆ.

ರಿಷಬ್ ಪಂತ್ ಅವರನ್ನು ಬಿಸಿಸಿಐ 2021-22ರ ಸೀಸನ್‌ಗಾಗಿ ಕೇಂದ್ರ ಗುತ್ತಿಗೆ ಪಟ್ಟಿಯ ಗ್ರೇಡ್-ಎಯಲ್ಲಿ ಇರಿಸಿದೆ. ಇದರಲ್ಲಿ ಭಾಗಿಯಾಗಿರುವ ಆಟಗಾರರು ವಾರ್ಷಿಕ ರಿಟೈನರ್ ಶಿಪ್ ಶುಲ್ಕವಾಗಿ 5 ಕೋಟಿ ಪಡೆಯಲಿದ್ದಾರೆ. ಐಪಿಎಲ್ 2022 ರ ಮೊದಲು ದೀಪಕ್ ಚಹಾರ್ ಕೂಡ ಗಾಯಗೊಂಡಿದ್ದರು. ಅವರನ್ನು 14 ಕೋಟಿಗೆ ಚೆನ್ನೈ ಸೂಪರ್‌ಕಿಂಗ್ಸ್ ಖರೀದಿಸಿತ್ತು. ಮಾಧ್ಯಮ ವರದಿಗಳ ಪ್ರಕಾರ, ಬಿಸಿಸಿಐ ನಿಯಮಗಳ ಪ್ರಕಾರ, ಅವರು ಪೂರ್ಣ ಹಣವನ್ನು ಪಡೆದಿದ್ದರು.