Pro Kabaddi: ಪ್ರೊ ಕಬಡ್ಡಿ ಯಾವಾಗ ಶುರು? ಇಲ್ಲಿದೆ ಮಾಹಿತಿ

ಕೊರೋನಾ ಆತಂಕದ ನಡುವೆ ಕ್ರೀಡಾ ಚಟುವಟಿಕೆಗಳು ನಿಧಾನವಾಗಿ ಆರಂಭವಾಗುತ್ತಿವೆ. ಈಗಾಗಲೇ ಕ್ರಿಕೆಟ್ ಜನಕರ ನಾಡಾದ ಇಂಗ್ಲೆಂಡ್‌ನಲ್ಲಿ ಟೆಸ್ಟ್​ ಸರಣಿ ಹಾಗೂ ಭಾರತ-ನ್ಯೂಜಿಲೆಂಡ್ ನಡುವಿನ ವಿಶ್ವ ಟೆಸ್ಟ್ ಚಾಂಪಿಯನ್ ಯಶಸ್ವಿಯಾಗಿ ಮುಗಿದಿದೆ. ಇದರ ನಡುವೆ ಐಪಿಎಲ್ ಟೂರ್ನಿ ಯುಎಇನಲ್ಲಿ ನಡೆಯುವುದು ಕೂಡ ಖಚಿತವಾಗಿದೆ. ಇದರ ನಡುವೆ ದೇಸಿ ಅಂಗಳದ ಮದಗಜಗಳ ಕಾಳಗ ಎಂದೇ ಪ್ರಖ್ಯಾತಿ ಹೊಂದಿರುವ ಪ್ರೋ ಕಬಡ್ಡಿ ಲೀಗ್ ಯಾವಾಗ ಎಂಬ ಪ್ರಶ್ನೆಯೊಂದು ಹುಟ್ಟಿಕೊಂಡಿದೆ.

ಏಕೆಂದರೆ ಕಳೆದ ವರ್ಷ ಕೊರೋನಾ ಕಾರಣದಿಂದ ಪ್ರೋ ಕಬಡ್ಡಿ ಲೀಗ್ ನಡೆದಿರಲಿಲ್ಲ. ಇದಾಗ್ಯೂ ಈ ಸಲ ನಡೆಸುವುದಾಗಿ ಆಯೋಜಕರು ತಿಳಿಸಿದ್ದರು. ಅದರಂತೆ ಏಪ್ರಿಲ್​ನಲ್ಲಿ ಬಿಡ್ಡಿಂಗ್ ನಡೆಸಲಾಗುವುದು ಎಂದು ಹೇಳಲಾಗಿತ್ತು. ಆದರೆ ಈ ಸಲ ಕೂಡ ಕೊರೋನಾ ಕಾರಣದಿಂದ ಟೂರ್ನಿ ಆಯೋಜನೆಗೆ ಅಡ್ಡಿಯಾಗಿದೆ. ಇದಾಗ್ಯೂ ಈಗ ಟೂರ್ನಿಯನ್ನು ಆಯೋಜಿಸಲು ಬೇಕಾದ ಪ್ರಾರಂಭಿಕ ಸಿದ್ಧತೆಗಳು ಶುರುವಾಗಿದೆ.

ಕೊರೋನಾ ಆತಂಕದಲ್ಲಿ ಟೂರ್ನಿಯನ್ನು ಮುಂದೂಡಿದರೆ ಮುಂದೆ ಪಂದ್ಯಾವಳಿಯನ್ನು ಆಯೋಜಿಸಿದರೂ ವೀಕ್ಷಕರ ಕೊರತೆ ಎದುರಾಗುವ ಸಾಧ್ಯತೆಯಿದೆ. ಏಕೆಂದರೆ ಅಕ್ಟೋಬರ್​ನಲ್ಲಿ ಟಿ20 ವಿಶ್ವಕಪ್ ಆರಂಭವಾಗಲಿದ್ದು, ಒಂದೇ ಸಮ​ಯ​ದ​ಲ್ಲಿ ಎರ​ಡು ಪ್ರಮುಖ ಟೂರ್ನಿಗಳನ್ನು ನಿಭಾ​ಯಿ​ಸುವುದು ಪ್ರಸಾರ ಹಕ್ಕು ಹೊಂದಿ​ರುವ ಸ್ಟಾರ್‌ ವಾಹಿ​ನಿಗೆ ಸವಾ​ಲಾಗಿ ಪರಿ​ಣ​ಮಿ​ಸ​ಲಿದೆ.

ಹೀಗಾಗಿ ಟಿ20 ವಿಶ್ವಕಪ್ ಆರಂಭಕ್ಕೂ ಮುನ್ನವೇ ಪ್ರೋ ಕಬಡ್ಡಿ ಲೀಗ್​ನ್ನು ಮುಗಿಸಲು ಫ್ರಾಂಚೈಸಿಗಳು ನಿರ್ಧರಿಸಿದ್ದಾರೆ ಎನ್ನಲಾಗಿದೆ. ಅದರಂತೆ ಜುಲೈ ಹಾಗೂ ಅಕ್ಟೋಬರ್​ ನಡುವೆ ಪ್ರೋ ಕಬಡ್ಡಿ ಸೀಸನ್​ 8 ನಡೆಸುವ ಬಗ್ಗೆ ಚರ್ಚಿಸಲಾಗಿದೆ. ಕೆಲ ಮೂಲಗಳ ಪ್ರಕಾರ ಜುಲೈ 20 ರಿಂದ ಪ್ರೋ ಕಬಡ್ಡಿಗೆ ಚಾಲನೆ ಸಿಗಲಿದ್ದು, ಅಕ್ಟೋಬರ್ 19 ಕ್ಕೆ ಫೈನಲ್ ಕಾದಾಟ ನಡೆಯಲಿದೆ.

ಹೀಗಾಗಿ ಜುಲೈ ಮೊದಲ ವಾರದಲ್ಲೇ ಆಟಗಾರರ ಬಿಡ್ಡಿಂಗ್ ಕೂಡ ನಡೆಯುವ ಸಾಧ್ಯತೆ ಕೂಡ ಇದೆ. ಒಟ್ಟಿನಲ್ಲಿ ಖಾಲಿ ಸ್ಟೇಡಿಯಂ, ಕೊರೋನಾ ಸುರಕ್ಷತಾ ನಿಯಮಗಳನ್ನು ಪಾಲಿಸಿ ಪ್ರೋ ಕಬಡ್ಡಿ ಲೀಗ್​ ಸೀಸನ್​ 8ಕ್ಕೆ ಚಾಲನೆ ನೀಡಲು ಆಯೋಜಕರು ನಿರ್ಧರಿಸಿದ್ದು, ಅದರಂತೆ ಮುಂದಿನ ತಿಂಗಳು ಕಬಡ್ಡಿ ಅಂಗಳದ ಮದಗಜಗಳ ಕಾದಾಟ ನಡೆಯುವ ಸಾಧ್ಯತೆಯಿದೆ.