IPL 2023: ಆರ್​​ಸಿಬಿ ಸೋಲಿಗೆ ನವೀನ್ ಲೇವಡಿ; ಕೊಹ್ಲಿ ಕಾಲೆಳೆದ ಲಕ್ನೋ ಬೌಲರ್​ಗೆ ಅಭಿಮಾನಿಗಳ ಟಾಂಗ್​!

ಐಪಿಎಲ್​​ನಲ್ಲಿ ಆರ್​​ಸಿಬಿ ಮತ್ತೊಮ್ಮೆ ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿದೆ. ಐಪಿಎಲ್​ 2023ರ ಆವೃತ್ತಿಯಲ್ಲಿ ಪ್ಲೇ ಆಫ್ಸ್​ಗೆ ಎಂಟ್ರಿ ಕೊಡಲು ಗೆಲ್ಲಲೇಬೇಕಾದ ಪಂದ್ಯದಲ್ಲಿ ಸೋಲುಂಡಿದೆ. ಆದರೆ ಆರ್​​ಸಿಬಿ ಸೋಲನ್ನೇ ಟಾರ್ಗೆಟ್ ಮಾಡಿ ಲಕ್ನೋ ಸೂಪರ್ ಜಾಯಿಂಟ್ಸ್​​​​ ವೇಗಿ ನವೀನ್ ಹುಲ್ ಹಕ್​ ಸಾಮಾಜಿಕ ಜಾಲತಾಣದಲ್ಲಿ ಒಂದು ಪೋಸ್ಟ್​ ಮಾಡಿದ್ದಾರೆ. ಇದನ್ನು ನೋಡಿದ ಫ್ಯಾನ್ಸ್ ನವೀನ್ ವಿರುದ್ಧ ಕಿರಿಕಾರಿದ್ದಾರೆ.

ಪ್ಲೇ ಆಫ್ ತಲುಪಲು ಆರ್‌ಸಿಬಿ ಗೆಲ್ಲಲೇಬೇಕಾದ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಶತಕ ಸಿಡಿಸಿದ್ದರು. ಆರ್‌ಸಿಬಿಯ ಬ್ಯಾಟಿಂಗ್ ವಿಭಾಗದಲ್ಲಿ ಕೊಹ್ಲಿ ಏಕಾಂಗಿ ಹೋರಾಟ ನಡೆಸಿದ್ದರು. ಉಳಿದಂತೆ ಮೈಕಲ್ ಬ್ರೇಸ್ ವೆಲ್ (29) ಮತ್ತು ಅನುಜ್ ರಾವತ್ ಅಜೇಯವಾಗಿ 25 ರನ್​ಗಳ ಕಾಣಿಕೆ ನೀಡಿದ್ದರು. ವಿಕೆಟ್ ಉರುಳುತ್ತಿದ್ದರು ಮತ್ತೊಂದು ಬದಿಯಲ್ಲಿ ಕ್ರೀಸ್ ಕಚ್ಚಿ ನಿಂತಿದ್ದ ಕೊಹ್ಲಿ ಬ್ಯಾಟಿಂಗ್ ನೆರವಿನಿಂದ ಆರ್​ಸಿಬಿ ತಂಡಕ್ಕೆ ಕೊಹ್ಲಿ 197 ರನ್ ಗಳ ಗುರಿಯನ್ನು ನೀಡಿತ್ತು.

ಆದರೆ ಗುಜರಾತ್ ಆರಂಭಿಕ ಆಟಗಾರ ಶುಭಮನ್ ಗಿಲ್ ಅಜೇಯ 104 ರನ್​​ ಶತಕದ ನೆರವಿನಿಂದ ತಂಡಕ್ಕೆ ಗೆಲುವು ತಂದು ಕೊಟ್ಟರು. ಗಿಲ್ ಜೊತೆ ಉತ್ತಮ ಬ್ಯಾಟಿಂಗ್ ಪ್ರದರ್ಶನ ನೀಡಿದ ವಿಜಯ್ ಶಂಕರ್ 54 ರನ್ ಗಳ ಕಾಣಿಕೆಯನ್ನು ನೀಡಿದ್ದರು. ಇವರ ಜೊತೆಯಾಟ ಗುಜರಾತ್ ಗೆಲುವಿಗೆ ಕಾರಣವಾಯ್ತು ಎಂದು ಹೇಳಬಹುದು.

ಗುಜರಾತ್​ ಇನ್ನಿಂಗ್ಸ್​ನ ಕೊನೆಯ ಓವರ್​​ ಎಸೆದ ವೇಯ್ನ್ ಪಾರ್ನೆಲ್ ಮೊದಲ ಎಸೆತವನ್ನೇ ನೋಬಾಲ್ ಎಸೆದು ನಿರಾಸೆ ಮೂಡಿಸಿದ್ದರು. ಈ ವೇಳೆ ಎದುರಾಳಿ ತಂಡಕ್ಕೆ ಫ್ರೀ ಹಿಟ್ ಅವಕಾಶ ಕೂಡ ಸಿಕ್ತು. ಆದರೆ ಎರಡನೇ ಎಸೆತ ಕೂಡ ವೈಡ್ ಮಾಡಿದ ವೇಯ್ನ್ ಪಾರ್ನೆಲ್ ಎದುರಾಳಿ ತಂಡಕ್ಕೆ ಗೆಲುವು ಖಚಿತ ಎಂದು ದೃಢಪಡಿಸಿದ್ದರು. ಮುಂದಿನ ಎಸೆತವನ್ನು ಗಿಲ್ ಸಿಕ್ಸರ್ ಬಾರಿಸಿ ಗುಜರಾತ್​ ತಂಡವನ್ನು ಐದು ಎಸೆತ ಬಾಕಿ ಇರುವಂತೆ ಗೆಲುವಿನ ದಡ ತಲುಪಿಸಿದ್ದರು.

ಇತ್ತ ಮಾಡು ಇಲ್ಲವೇ ಮಡಿ ಪಂದ್ಯದಲ್ಲಿ ನಿರಾಸ ಬೌಲಿಂಗ್ ಪ್ರದರ್ಶನ ತೋರಿದ ಆರ್​ಸಿಬಿಗೆ ಪ್ಲೇ ಆಫ್​ ಆಸೆ ಕೈ ತಪ್ಪಿತ್ತು. ಇತ್ತ ಇದೇ ವೇಳೆ ಮುಂಬೈ ಇಂಡಿಯನ್ಸ್ ತಂಡ ಸನ್ ರೈಸರ್ಸ್​​ ವಿರುದ್ಧ ಗೆಲುವು ಪಡೆದಿದ್ದ ಕಾರಣ ಪ್ಲೇ ಆಫ್​ಗೆ ಎಂಟ್ರಿ ಕೊಟ್ಟಿದೆ.

ಇನ್ನು, ಆರ್​ಸಿಬಿ ತಂಡ ಸೋಲುತ್ತಿದ್ದಂತೆ ಇನ್​​ಸ್ಟಾದಲ್ಲಿ ಲಕ್ನೋ ವೇಗಿ ನವೀನ್ ಉಲ್​ ಹಕ್​ ಮತ್ತೊಮ್ಮೆ ಕೆಣಕಿದ್ದು, ಇನ್​ಸ್ಟಾದಲ್ಲಿ ಪೋಸ್ಟ್​​ವೊಂದನ್ನು ಹಾಕಿ ನೇರ ವಿರಾಟ್ ಕೊಹ್ಲಿ ಕಾಲೆಳೆದಿದ್ದಾರೆ. ಆರ್​ಸಿಬಿ ಸೋಲುಂಡ ಸಮಯದಲ್ಲಿ ಓರ್ವ ಆ್ಯಂಕರ್​ ಬಿದ್ದು ಬಿದ್ದು ನಗುತ್ತಿರುವ ಫೋಟೋ ಶೇರ್ ಮಾಡಿ ಪರೋಕ್ಷವಾಗಿ ಆರ್​​ಸಿಬಿ ಸೋಲನ್ನು ಸಂಭ್ರಮಿಸಿದ್ದಾರೆ.

ಈ ರೀತಿ ಆರ್​ಸಿಬಿ ವಿರುದ್ಧ ನವೀನ್ ಪೋಸ್ಟ್​ ಮಾಡುತ್ತಿರುವುದು ಇದೇ ಮೊದಲೇನು ಅಲ್ಲ. ಕೊಹ್ಲಿ ಔಟ್​ ಆದ ಪ್ರತಿ ಬಾರಿಯೂ ನವೀನ್ ಇಂತಹದ್ದೆ ಪೋಸ್ಟ್​​ಗಳನ್ನು ಹಾಕುತ್ತಾ ಕಾಲೆಳೆಯುವ ಕೆಲಸ ಮಾಡುತ್ತಿದ್ದಾರೆ. ಆದರೆ ಈ ಬಾರಿ ಮಾತ್ರ ಆತ ಮಿತಿ ಮೀರಿ ವರ್ತನೆ ಮಾಡುತ್ತಿದ್ದಾನೆ ಎಂದು ಅಭಿಮಾನಿಗಳು ಕಿಡಿಕಾರಿದ್ದಾರೆ.

ಯಾವುದೇ ಕ್ರೀಡೆಯಲ್ಲಿ ಆದರೂ ಸೋಲು ಗೆಲುವು ಸಾಮಾನ್ಯ. ಕಳೆದ ವರ್ಷದ ಎಲಿಮಿನೇಟರ್ ಪಂದ್ಯದಲ್ಲಿ ಆರ್​ಸಿಬಿ ತಂಡ ಲಕ್ನೋ ತಂಡವನ್ನು ಸೋಲಿಸಿದ್ದನ್ನು ನವೀನ್​ಗೆ ನೆನಪು ಮಾಡಿಕೊಟ್ಟಿದ್ದಾರೆ. ಅಲ್ಲದೆ, ಈ ಬಾರಿಯ ಎಲಿಮಿನೇಟರ್​ ಪಂದ್ಯದಲ್ಲೂ ಲಕ್ನೋ ಗೆಲುವು ಪಡೆಯುತ್ತೆ ಅಂತ ಗ್ಯಾರಂಟಿ ಏನು ಎಂದು ಪ್ರಶ್ನೆ ಮಾಡಿ ನೆಟ್ಟಿಗರು ನವೀನ್​ಗೆ ಕ್ಲಾಸ್​ ತೆಗೆದುಕೊಂಡಿದ್ದಾರೆ. ಇಂತಹ ಕೆಟ್ಟ ಕೀಟಲೆಗಳಿಂದ ಟೀಂ ಇಂಡಿಯಾ ಕ್ರಿಕೆಟ್ ಅಭಿಮಾನಿಗಳು ದ್ವೇಷ ಮಾಡುವ ಆಟಗಾರನಾಗುತ್ತಿಯಾ ಅಂತಲೂ ಹಲವರು ವಾರ್ನಿಂಗ್ ನೀಡಿದ್ದಾರೆ.