WTC Final 2023: ಮತ್ತೆ ಟೀಂ ಇಂಡಿಯಾಗೆ ಕಂಬ್ಯಾಕ್​ ಮಾಡ್ತಾರಾ ಧೋನಿ? ಅಚ್ಚರಿಯ ಉತ್ತರ ನೀಡಿದ ರವಿಶಾಸ್ತ್ರಿ

ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್ ಪಂದ್ಯ ಜೂನ್ 7 ರಿಂದ ಇಂಗ್ಲೆಂಡ್‌ನ ಓವಲ್‌ನಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ನಡುವೆ ನಡೆಯಲಿದೆ. ಈ ಅಮೋಘ ಪಂದ್ಯಕ್ಕಾಗಿ 15 ಸದಸ್ಯರ ಟೀಂ ಇಂಡಿಯಾವನ್ನು ಪ್ರಕಟಿಸಲಾಗಿದೆ. ಗಾಯದ ಸಮಸ್ಯೆಯಿಂದಾಗಿ ರಿಷಭ್ ಪಂತ್ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್‌ನಲ್ಲಿ ಹೊರಗುಳಿದಿದ್ದಾರೆ.

ಬಿಸಿಸಿಐ ಆಯ್ಕೆ ಮಾಡಿರುವ 15 ಸದಸ್ಯರ ತಂಡದಲ್ಲಿ ಕೆಎಸ್ ಭರತ್ ಸ್ಪೆಷಲಿಸ್ಟ್ ವಿಕೆಟ್ ಕೀಪರ್ ಆಗಿ ಸೇರ್ಪಡೆಗೊಂಡಿದ್ದಾರೆ. ಅದೇ ಸಮಯದಲ್ಲಿ, ಕೆಎಲ್ ರಾಹುಲ್ ಕೂಡ ಈ ತಂಡದಲ್ಲಿದ್ದು, ವಿಕೆಟ್ ಕೀಪರ್ ಪಾತ್ರವನ್ನು ನಿರ್ವಹಿಸಬಹುದು.

ಆದರೆ, ಇದೆಲ್ಲದರ ನಡುವೆ ಅಂತರಾಷ್ಟ್ರೀಯ ಕ್ರಿಕೆಟ್‌ನಿಂದ ನಿವೃತ್ತಿಯಾಗಿರುವ ಭಾರತದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರ ಹೆಸರೂ ಡಬ್ಲ್ಯುಟಿಸಿ ಫೈನಲ್‌ನಲ್ಲಿ ವಿಕೆಟ್‌ ಕೀಪಿಂಗ್‌ಗಾಗಿ ಕೇಳಿಬರುತ್ತಿದೆ. ಏನಿದು ವಿಷಯ ಎಂದು ನೋಡೋಣ ಬನ್ನಿ.

ಡಬ್ಲ್ಯುಟಿಸಿ ಫೈನಲ್‌ಗಾಗಿ, ಕೆಎಸ್ ಭರತ್ ಮತ್ತು ಕೆಎಲ್ ರಾಹುಲ್ ಪೈಕಿ ಯಾರು ಪ್ಲೇಯಿಂಗ್-ಇಲೆವೆನ್‌ನಲ್ಲಿ ವಿಕೆಟ್‌ ಕೀಪರ್ ಆಗಿ ಅವಕಾಶ ಪಡೆಯಬೇಕು ಎಂಬ ಗೊಂದಲದಲ್ಲಿ ಟೀಂ ಇಂಡಿಯಾವಿದೆ.

ಇದರ ನಡುವೆ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್‌ಗೆ ಧೋನಿ ವಿಕೆಟ್‌ ಕೀಪರ್ ಆಗಬಹುದೇ ಎಂದು ಸಂದರ್ಶನವೊಂದರಲ್ಲಿ ಮಾಜಿ ಕೋಚ್​ ರವಿಶಾಸ್ತ್ರಿ ಅವರಿಗೆ ಕೇಳಲಾಯಿತು. ಹೌದು, ನಿವೃತ್ತಿಯಿಂದ ಹಿಂತಿರುಗುವಂತೆ ನಾವು ಧೋನಿ ಅವರಿಗೆ ಮನವಿ ಮಾಡಬಹುದೇ ಎಂದು ಶಾಸ್ತ್ರಿ ಅವರನ್ನು ಕೇಳಲಾಯಿತು.

ಈ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಭಾರತದ ಮಾಜಿ ಕೋಚ್, ಖಂಡಿತವಾಗಿಯೂ ಹೌದು, ಧೋನಿ ನಮ್ಮ ಯುವಕರಿಗೆ ಐಪಿಎಲ್ ಮೂಲಕ ವಿಕೆಟ್ ಕೀಪಿಂಗ್ ಬಗ್ಗೆ ಗೈಡ್​ ಮಾಡುತ್ತಿದ್ದಾರೆ. ಅವರು ಎಂದಿಗೂ ದಾಖಲೆಗಾಗಿ ಆಡಲಿಲ್ಲ, ಅವರು ಟೆಸ್ಟ್‌ನಿಂದ ಹೊರನಡೆಯಲು ಮನಸ್ಸು ಮಾಡಿದಾಗ, ಅವರ ನಿರ್ಧಾರವನ್ನು ಯಾರೂ ಬದಲಾಯಿಸಲು ಸಾಧ್ಯವಾಗಲಿಲ್ಲ.

ಧೋನಿ ಅವರು ನಿರ್ಧಾರ ತೆಗೆದುಕೊಂಡಾಗ ಅದನ್ನು ಬದಲಾಯಿಸುವುದಿಲ್ಲ. 100 ಟೆಸ್ಟ್‌ಗಳ ಬಳಿಕ ಅವರು ಟೆಸ್ಟ್ ಕ್ರಿಕೆಟ್ ತೊರೆದರು ಮತ್ತು ಅತ್ಯುತ್ತಮ ಫಾರ್ಮ್‌ನಲ್ಲಿದ್ದರು. ಆದರೆ, ದಿಢೀರ್ ನಿವೃತ್ತಿ ಪಡೆದು ಹೊಸಬರಿಗೆ ಅವಕಾಶ ನೀಡಿದರು. 2014ರ ಡಿಸೆಂಬರ್‌ನಲ್ಲಿ ಟೆಸ್ಟ್‌ ಕ್ರಿಕೆಟ್‌ನಿಂದ ನಿವೃತ್ತರಾದ ಧೋನಿ 3 ವರ್ಷಗಳ ಹಿಂದೆ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹೇಳಿದ್ದರು.

ಇದೀಗ ಧೋನಿ ಐಪಿಎಲ್​ನಿಂದಲೂ ನಿವೃತ್ತಿ ನೀಡುವ ಸೂಚನೆ ನೀಡಿದ್ದಾರೆ. ಧೋನಿ ಅವರು ಈ ಸೀಸನ್​ ಬಳಿಕ ಐಪಿಎಲ್​ ಮಾದರಿಗೂ ನಿವೃತ್ತಿ ಘೊಷಿಸುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಆದರೆ ಈ ಕುರಿತು ಅವರು ಯಾವುದೇ ಮಾಹಿತಿ ನೀಡಿಲ್ಲ.