MS Dhoni: ಡಿಆರ್‌ಎಸ್‌ನಲ್ಲಿ ಕ್ಯಾಪ್ಟನ್ ಕೂಲ್ ಹೊಸ ದಾಖಲೆ, ರಿವ್ಯೂ ತಗೊಂಡ್ರೆ ವಿಕೆಟ್​ ಪಕ್ಕಾ!

ಎಲ್‌ಬಿಡಬ್ಲ್ಯು ವಿಷಯದಲ್ಲಿ ಅಂಪೈರ್‌ಗಳು ಕೆಲವೊಮ್ಮೆ ತಪ್ಪು ನಿರ್ಧಾರಗಳನ್ನು ನೀಡುವುದು ಸಹಜ. ಆದರೆ ಇವುಗಳನ್ನು ಪರಿಶೀಲಿಸುವ ಉದ್ದೇಶದಿಂದ ಐಸಿಸಿ ಡಿಆರ್​ಎಸ್ ನಿಯಮವನ್ನು ಜಾರಿಗೆ ತಂದಿತು.

ಸದ್ಯ ಕ್ರಿಕೆಟ್‌ನಲ್ಲಿ ಡಿಆರ್‌ಎಸ್‌ನ ಮಹತ್ವ ಹೆಚ್ಚಿದೆ. ಡಿಆರ್‌ಎಸ್ ಎಂದರೆ ಕ್ರಿಕೆಟ್ ಭಾಷೆಯಲ್ಲಿ ಡಿಸಿಷನ್ ರಿವ್ಯೂ ಸಿಸ್ಟಮ್. ಒಂದೇ ಮಾತಿನಲ್ಲಿ ಹೇಳುವುದಾದರೆ, ಆನ್ ಫೀಲ್ಡ್ ಅಂಪೈರ್ ನೀಡಿದ ನಿರ್ಧಾರ ನಿಮಗೆ ಇಷ್ಟವಾಗದಿದ್ದರೆ, ನೀವು ಮೇಲ್ಮನವಿ ಸಲ್ಲಿಸಬಹುದು.

ಡಿಆರ್ ಎಸ್ ಪದಕ್ಕೆ ಅಭಿಮಾನಿಗಳು ಹೊಸ ಅರ್ಥ ಕೊಡುತ್ತಿದ್ದಾರೆ. ಡಿಆರ್‌ಎಸ್ ಎಂದರೆ 'ಧೋನಿ ರಿವ್ಯೂ ಸಿಸ್ಟಮ್' ಎಂದು. ಅಂಪೈರ್ ನೀಡಿದ ನಿರ್ಧಾರದ ವಿರುದ್ಧ ಧೋನಿ ಡಿಆರ್‌ಎಸ್ ಕೇಳಿದರೆ, ಫೀಲ್ಡ್ ಅಂಪೈರ್ ತಮ್ಮ ನಿರ್ಧಾರವನ್ನು ಬಹುತೇಕ ಬದಲಾಯಿಸಬೇಕಾಗುತ್ತಿದೆ.

ಧೋನಿ ಅಷ್ಟೊಂದು ನಿಖರತೆಯೊಂದಿಗೆ ಡಿಆರ್‌ಎಸ್‌ಗೆ ಹೋಗುತ್ತಿದ್ದಾರೆ. ಕೆಕೆಆರ್ ವಿರುದ್ಧ ತುಷಾರ್ ದೇಶ್ ಪಾಂಡೆ 17ನೇ ಓವರ್ ಬೌಲಿಂಗ್ ಮಾಡಿದರು. ಡೇವಿಡ್ ವೈಸ್ 3ನೇ ಎಸೆತವನ್ನು ಆಡಲು ಪ್ರಯತ್ನಿಸಿದರು. ಆದರೆ ಚೆಂಡು ಬ್ಯಾಟ್ ಮತ್ತು ಪ್ಯಾಡ್ ಬಳಿ ಹೋಗಿ ಧೋನಿ ಕೈ ಸೇರಿತು.

ಕೂಡಲೇ ಧೋನಿ ಹಾಗೂ ಬೌಲರ್‌ ಅಂಪೈರ್‌ಗೆ ಮನವಿ ಮಾಡಿದರು. ಆದರೆ ಅಂಪೈರ್ ನಾಟ್ ಔಟ್ ಎಂದು ಘೋಷಿಸಿದರು. ರಿಯಲ್ ಟೈಮ್ ನಲ್ಲಿ ನೋಡಿದವರೆಲ್ಲ ಪ್ಯಾಡ್ ಹೊಡೆದಂತೆ ಕಂಡರು. ಆದರೆ ಧೋನಿ ಡಿಆರ್‌ಎಸ್‌ ತೆಗೆದುಕೊಂಡರು.

ಟಿವಿ ರಿಪ್ಲೇ ಬ್ಯಾಟ್‌ಗೆ ಹೊಡೆಯುವುದನ್ನು ಸ್ಪಷ್ಟವಾಗಿ ತೋರಿಸಿದೆ. ಬಳಿಕ ಅಂಪೈರ್ ತಮ್ಮ ನಿರ್ಧಾರವನ್ನು ನಾಟ್ ಔಟ್ ನಿಂದ ಔಟಾಗಿ ಬದಲಾಯಿಸಿದರು. ಅದರೊಂದಿಗೆ ಧೋನಿ 'ಡಿಆರ್‌ಎಸ್ ಕಿಂಗ್' ಎಂದು ಮತ್ತೊಮ್ಮೆ ಸಾಬೀತಾಯಿತು.

ಐಪಿಎಲ್ 16ನೇ ಸೀಸನ್ ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವನ್ನು ಎಲ್ಲಾ ವಿಭಾಗಗಳಲ್ಲಿ ಅದ್ಬುತವಾಗಿ ಮುನ್ನಡೆಸುತ್ತಿರುವ ಧೋನಿ, 'ಡಿಆರ್ ಎಸ್ ಎಂದರೆ ಧೋನಿ ರಿವ್ಯೂ ಸಿಸ್ಟಂ' ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ. ಮೇಲಾಗಿ ಐಪಿಎಲ್ 16ನೇ ಸೀಸನ್ ನಲ್ಲಿ ಧೋನಿಯ ‘ಡಿಆರ್ ಎಸ್’ ಯಶಸ್ಸಿನ ಪ್ರಮಾಣ ಶೇ.85.71ರಷ್ಟಿದೆ.

ಈ ಮೂಲಕ ಡಿಆರ್​ಎಸ್​ ತೆಗೆದುಕೊಳ್ಳುವುದರಲ್ಲಿ ಧೋನಿ ನಿಖರತೆ ಇದೀಗ ದಾಖಲೆಗೆ ಕಾರಣವಾಗಿದೆ. ಇನ್ನು, ಚೆನ್ನೈ ಆಡಿದ 7 ಪಂದ್ಯಗಳಲ್ಲಿ 5ರಲ್ಲಿ ಜಯ ಸಾಧಿಸಿರುವ ಚೆನ್ನೈ ಸೂಪರ್ ಕಿಂಗ್ಸ್ 10 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ಇನ್ನು ನಾಲ್ಕು ಪಂದ್ಯಗಳಲ್ಲಿ ಗೆದ್ದರೆ ಪ್ಲೇ ಆಫ್‌ ಹಂತಕ್ಕೂ ತಲುಪಲಿದೆ. (ರಾಜಸ್ಥಾನ್​ ಪಂದ್ಯದ ಫಲಿತಾಂಶಕ್ಕೂ ಮುನ್ನದ ಅಂಕಿಅಂಶ)