Jason Roy: 65 ಎಸೆತಗಳಲ್ಲಿ 145 ರನ್ ಚಚ್ಚಿದ ಜೇಸನ್​ ರಾಯ್​, ಟಿ20 ಲೀಗ್ ಇತಿಹಾಸದಲ್ಲಿ ವಿಶ್ವ​ ದಾಖಲೆಯ ರನ್​ ಚೇಸ್​

ಪಾಕಿಸ್ತಾನ ಸೂಪರ್ ಲೀಗ್​ನಲ್ಲಿ ಇಂಗ್ಲೆಂಡ್​ ಸ್ಟಾರ್ ಬ್ಯಾಟರ್ ಜೇಸನ್ ರಾಯ್ ಅಬ್ಬರ ಮುಂದುವರಿದಿದೆ. ಬುಧವಾರ ನಡೆದ ಪಂದ್ಯದಲ್ಲಿ ದಾಖಲೆಯ ಶತಕ ಸಿಡಿಸಿದ್ದಾರೆ. ಕೇವಲ 44 ಎಸೆತಗಳಲ್ಲಿ ಶತಕ ಬಾರಿಸಿದ ರಾಯ್ ಕ್ವೆಟ್ಟಾ ಗ್ಲಾಡಿಯೇಟರ್ಸ್ ಗೆಲುವಿಗೆ ಪ್ರಮುಖ ಕಾರಣರಾದರು.

ಪಿಎಸ್​ಎಲ್​ನಲ್ಲಿ ಪೇಶಾವರ ಝಲ್ಮಿ ತಂಡದ ವಿರುದ್ಧ ರಾಯ್​ 65 ಎಸೆತಗಳಲ್ಲಿ ಅಜೇಯ 145 ರನ್​ಗಳಿಸಿದ್ದಾರೆ. ಇವರ ಶತಕದ ನೆರವಿನಿಂದ ಕ್ವೆಟ್ಟಾ ಗ್ಲಾಡಿಯೇಟರ್​ ಇನ್ನು 8 ಎಸೆತಗಳಿರುವಂತೆ 241 ರನ್​ಗಳ ಬೃಹತ್​ ಮೊತ್ತವನ್ನು ಚೇಸ್​ ಮಾಡಿ ಗೆದ್ದಿದೆ.

ಮೊದಲು ಬ್ಯಾಟ್ ಮಾಡಿದ್ದ ಪೇಶಾವರ್ ಝಲ್ಮಿ 20 ಓವರ್​ಗಳಲ್ಲಿ 2 ವಿಕೆಟ್ ಕಳೆದುಕೊಂಡು 240 ರನ್​ಗಳಿಸಿದ್ದರು. ಬಾಬರ್​ ಅಜಮ್​ 65 ಎಸೆತಗಳಲ್ಲಿ 15 ಬೌಂಡರಿ ಹಾಗೂ 3 ಸಿಕ್ಸರ್​ಗಳ ನೆರವಿನಿಂದ 115 ರನ್​ಗಳಿಸಿದ್ದರು. ಸಯೀಮ್ ಆಯುಬ್​ 34 ಎಸೆತಗಳಲ್ಲಿ 74 ರನ್​ಗಳಿಸಿದರೆ, ರೊವ್ಮನ್​ ಪೊವೆಲ್ 18 ಎಸೆತಗಳಲ್ಲಿ 35 ರನ್​ಗಳಿಸಿದ್ದರು.

ಇನ್ನು 241 ರನ್​ಗಳ ದಾಖಲೆಯ ಗುರಿ ಬೆನ್ನತ್ತಿದ ಕ್ವೆಟ್ಟಾ ಗ್ಲಾಡಿಯೇಟರ್​  18.2 ಓವರ್​ಗಳಲ್ಲಿ 2 ವಿಕೆಟ್​ ಕಳೆದುಕೊಂಡು ಗುರಿ ತಲುಪಿತು. ರಾಯ್ 145 ರನ್​ಗಳಿಸಿದರೆ, ಮೊಹಮ್ಮದ್​ ಹಫೀಜ್​ 18 ಎಸೆತಗಳಲ್ಲಿ 41 ರನ್​ಗಳಿಸಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.

ಜೇಸನ್​ ರಾಯ್​ ಅವರ ಅಮೋಘ ಶತಕದ ನೆರವಿನಿಂದ ಕ್ವೆಟ್ಟಾ ಗ್ಲಾಡಿಯೇಟರ್​ ಟಿ20 ಕ್ರಿಕೆಟ್​ ಇತಿಹಾಸದಲ್ಲಿ 3ನೇ ಗರಿಷ್ಠ ರನ್​ ಚೇಸ್​ ಮಾಡಿದ ದಾಖಲೆಗೆ ಪಾತ್ರವಾಯಿತು. ಹಾಗೂ ಟಿ20 ಲೀಗ್​ಗಳಲ್ಲಿ (ಅಂತರಾಷ್ಟ್ರೀಯ ಪಂದ್ಯ ಹೊರತುಪಡಿಸಿ) ಗರಿಷ್ಠ ರನ್​ ಚೇಸ್​ ಮಾಡಿದ ದಾಖಲೆಗೆ ಪಾತ್ರವಾಯಿತು. ಅಲ್ಲದೆ ಇದು ಪಿಎಸ್​ಎಲ್​ ಇತಿಹಾಸದಲ್ಲಿ 3ನೇ ಗರಿಷ್ಠ ಮೊತ್ತ ದಾಖಲಿಸಿದೆ.

ಆಸ್ಟ್ರೇಲಿಯಾ ತಂಡ ನ್ಯೂಜಿಲ್ಯಾಂಡ್​ ನೀಡಿದ್ದ 244ರನ್​ಗಳ ಬೃಹತ್​ ಮೊತ್ತವನ್ನು ಚೇಸ್​ ಮಾಡುವ ಮೂಲಕ ವಿಶ್ವ ದಾಖಲೆಯನ್ನು ತನ್ನದಾಗಿಸಿಕೊಂಡಿದೆ.  2ನೇ ಸ್ಥಾನದಲ್ಲಿ ಬಲ್ಗೇರಿಯಾ ತಂಡವಿದ್ದು, ಇದು ಸರ್ಬಿಯಾ ವಿರುದ್ಧ 2022ರಲ್ಲಿ 243 ರನ್​ಗಳ ಬೃಹತ್​ ಮೊತ್ತವನ್ನು ಯಶಸ್ವಿಯಾಗಿ ಚೇಸ್​ ಮಾಡಿತ್ತು. ಇದೀಗ ಗ್ಲಾಡಿಯೇಟರ್​ ಗರಿಷ್ಠ ಮೊತ್ತ ಚೇಸ್​ ಮಾಡಿದ ಪಟ್ಟಿಯಲ್ಲಿ 3ನೇ ಸ್ಥಾನಕ್ಕೇರಿದೆ.

ವಿಚಿತ್ರವೆಂದರೆ ಅದ್ಭುತ ಫಾರ್ಮ್​ನಲ್ಲಿರುವ ಜೇಸನ್​ ರಾಯ್​ 2023ರ ಮಿನಿ ಐಪಿಎಲ್ ಹರಾಜಿನಲ್ಲಿ ಅನ್​ಸೋಲ್ಡ್ ಆಗಿದ್ದರು. 2022ರ ಆವೃತ್ತಿಯಲ್ಲಿ ಗುಜರಾತ್ ಟೈಟನ್ಸ್ ತಂಡ 2 ಕೋಟಿ ರೂಪಾಯಿಗಳಿಗೆ ರಾಯ್​ರನ್ನು ಖರೀದಿಸಿತ್ತು. ಆದರೆ ಆ ಆವೃತ್ತಿಯಿಂದ ರಾಯ್ ತಾವಾಗಿಯೇ ಆಡದಿರಲು ತೀರ್ಮಾನಿಸಿದ್ದರು. ಈ ಕಾರಣದಿಂದ ಈ ವರ್ಷದ ಹರಾಜಿನಲ್ಲಿ ಅವರನ್ನು ಯಾವ ತಂಡಗಳೂ ಖರೀದಿಸರಲಿಲ್ಲ.