Virat Kohli: ಕೊಹ್ಲಿ ಎಷ್ಟೇ ರೆಕಾರ್ಡ್‌ ಮಾಡಿದ್ರೂ ಸಚಿನ್‌ಗೆ ಸಮ ಅಲ್ವಂತೆ, ಕ್ರಿಕೆಟ್ ದೇವರ ಈ ದಾಖಲೆ ಮುರಿಯೋಕೆ ಆಗಲ್ವಂತೆ!

ವಿರಾಟ್ ಕೊಹ್ಲಿ ಸದ್ಯ ಹಿಂದಿನ ದಾಖಲೆಗಳನ್ನು ಮುರಿಯುತ್ತಿದ್ದಾರೆ. ಈಗಿನ ಕ್ರಿಕೆಟಿಗರಲ್ಲಿ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ದಾಖಲೆ ಮುರಿಯುತ್ತಿರುವ ವಿಶ್ವದ ಏಕೈಕ ಕ್ರಿಕೆಟಿಗ ಎಂದರೆ ಅದು ಕೊಹ್ಲಿ ಎನ್ನಬಹುದು.

ಕೊಹ್ಲಿ ತಮ್ಮ ಹೆಸರಿನಲ್ಲಿ ಈಗಾಗಲೇ ಅನೇಕ ದಾಖಲೆಗಳನ್ನು ಬರೆದಿದ್ದಾರೆ. ಸಚಿನ್ ಅವರ ಹೆಸರಿನಲ್ಲಿದ್ದ ದಾಖಲೆಗಳನ್ನು ಕೊಹ್ಲಿ ಮುರಿಯುತ್ತಿದ್ದಾರೆ.

2014ರಿಂದ 2019ರ ವರೆಗೆ ಗರಿಷ್ಠ ಫಾರ್ಮ್‌ನಲ್ಲಿದ್ದ ಕೊಹ್ಲಿ ನಂತರ ನಿಧಾನಗತಿಯಲ್ಲಿ ಸಾಗಿದರು. 2019 ರಿಂದ ಸೆಪ್ಟೆಂಬರ್ 2022ರ ವರೆಗೆ, ಅವರು ರನ್ ಮಾಡಲು ಸ್ವಲ್ಪ ಕಷ್ಟಪಟ್ಟರು.

ಆದರೆ 2022ರ ಏಷ್ಯಾಕಪ್‌ನಿಂದ ಫಾರ್ಮ್‌ಗೆ ಮರಳಿರುವ ಕೊಹ್ಲಿ ಸತತ 3 ಶತಕ ಬಾರಿಸಿದ್ದಾರೆ. ಇತ್ತೀಚೆಗಷ್ಟೇ ಶ್ರೀಲಂಕಾ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಶತಕ ಬಾರಿಸಿ ಅನೇಕ ದಾಖಲೆ ಬರೆದಿದ್ದಾರೆ.

ಏಕದಿನ ಪಂದ್ಯಗಳಲ್ಲಿ ಕೊಹ್ಲಿ 45 ಶತಕ ಸಿಡಿಸಿದ್ದಾರೆ. ಸಚಿನ್ ತೆಂಡೂಲ್ಕರ್ 49 ಶತಕ ಸಿಡಿಸಿದ್ದಾರೆ. ಈ ಮಾದರಿಯಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದ ಆಟಗಾರ ಎಂಬ ಖ್ಯಾತಿಗೆ ಸಚಿನ್ ಪಾತ್ರರಾಗಿದ್ದಾರೆ. ಆದರೆ ಕೊಹ್ಲಿ ಇನ್ನೂ ಐದು ಶತಕ ಬಾರಿಸಿದರೆ ಸಚಿನ್ ಅವರ ದಾಖಲೆಯನ್ನೂ ಮುರಿಯುತ್ತಾರೆ.

ಆದರೆ ಸಚಿನ್ ಅವರ ಈ ದಾಖಲೆ ಮುರಿಯಲು ಕೊಹ್ಲಿಗೆ ಅಸಾಧ್ಯ ಎನಿಸುತ್ತಿದೆ. ತೆಂಡೂಲ್ಕರ್ ಟೆಸ್ಟ್‌ನಲ್ಲಿ 51 ಶತಕಗಳನ್ನು ಗಳಿಸಿದ್ದಾರೆ. ಈ ಮಾದರಿಯಲ್ಲೂ ಅತಿ ಹೆಚ್ಚು ಶತಕ ಸಿಡಿಸಿದ ಆಟಗಾರ ಸಚಿನ್.

ಟೆಸ್ಟ್ ನಲ್ಲಿ ಸಚಿನ್ ಅವರ 51 ಶತಕಗಳ ದಾಖಲೆಯನ್ನು ಮುರಿಯಲು ಕೊಹ್ಲಿಯಿಂದ ಕಷ್ಟವಾಗಬಹುದು. ಕೊಹ್ಲಿ ಇದುವರೆಗೆ ಟೆಸ್ಟ್‌ನಲ್ಲಿ ಕೇವಲ 27 ಶತಕಗಳನ್ನು ಗಳಿಸಿದ್ದಾರೆ. ಸಚಿನ್ ದಾಖಲೆ ಸರಿಗಟ್ಟಲು ಇನ್ನೂ 24 ಶತಕಗಳ ಅಗತ್ಯವಿದೆ.

ಸದ್ಯ ಕೊಹ್ಲಿ ವಯಸ್ಸು 33 ವರ್ಷ ಆಗಿದೆ. ಅವರು ಇನ್ನೂ 4 ವರ್ಷಗಳ ಕಾಲ ಕ್ರಿಕೆಟ್ ಆಡುವುದು ಖಚಿತ. ಆ ಲೆಕ್ಕಾಚಾರದ ಪ್ರಕಾರ ಕೊಹ್ಲಿ ವರ್ಷಕ್ಕೆ ಟೆಸ್ಟ್ ನಲ್ಲಿ 6 ಶತಕ ಸಿಡಿಸಬೇಕು. ಆದರೆ ಸಚಿನ್ ಅವರ ಟೆಸ್ಟ್ ಶತಕಗಳ ದಾಖಲೆಯನ್ನು ಸರಿಗಟ್ಟುವುದು ಕೊಹ್ಲಿಗೆ ಅಸಾಧ್ಯ ಎಂದು ಮಾಜಿ ಆಟಗಾರ ಹಾಗೂ ವೀಕ್ಷಕ ವಿವರಣೆಗಾರ ಸಂಜಯ್ ಮಂಜ್ರೇಕರ್ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಅಂತರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಶತಕಗಳ ಶತಕ ಸಿಡಿಸಿದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೂ ಸಚಿನ್ ಪಾತ್ರರಾಗಿದ್ದಾರೆ. ಸಚಿನ್ ಟೆಸ್ಟ್ ಮತ್ತು ODI ಎರಡರಲ್ಲೂ ಸೇರಿ ಒಟ್ಟು 100 ಶತಕಗಳನ್ನು ಗಳಿಸಿದ್ದಾರೆ. ಕೊಹ್ಲಿ ಇದುವರೆಗೆ 73 ಶತಕ ಸಿಡಿಸಿದ್ದಾರೆ. ಇದರಲ್ಲಿ 45 ODIಗಳು, 27 ಟೆಸ್ಟ್‌ಗಳು ಮತ್ತು ಒಂದು T20 ಶತಕ ಸೇರಿದೆ. ಸಚಿನ್ ಅವರ ಶತಕಗಳ ಶತಕವನ್ನು ತಲುಪಲು ಕೊಹ್ಲಿ ಇನ್ನೂ 27 ಶತಕಗಳನ್ನು ಬಾರಿಸಬೇಕಾಗಿದೆ.