Team India: ಟೀಂ ಇಂಡಿಯಾ ಆಟಗಾರರ ಬಗ್ಗೆ ಚೇತನ್​ ಶರ್ಮಾ ಶಾಕಿಂಗ್ ಹೇಳಿಕೆ, ಮತ್ತೆ ಸದ್ದು ಮಾಡ್ತಿದೆ ಹಳೇ ಡೋಪಿಂಗ್​ ಟೆಸ್ಟ್​ ಪ್ರಕರಣ

ಚೇತನ್​ ಶರ್ಮಾ ಅವರು ಕುಟುಕು ಕಾರ್ಯಾಚರಣೆಯಲ್ಲಿ ಹೇಳಿರುವ ವಿಚಾರಗಳು ಕ್ರಿಕೆಟ್​ ಲೋಕದಲ್ಲಿಯೇ ಹೊಸ ವಿವಾದಕ್ಕೆ ಕಾರಣವಾಗಿದೆ. ಆಟಗಾರರು ಡೋಪಿಂಗ್​ ಪಡೆಯುವ ಮೂಲಕ ಫಿಟ್​ ಆಗಿರುತ್ತಾರೆ ಎಂದು ಹೇಳಿಕೆ ನೀಡಿದ್ದಾರೆ.

ಖಾಸಗಿ ವಾಹಿನಿ ಮಾಡಿದ ಈ ಕುಟುಕು ಕಾರ್ಯಾಚರಣೆಯಲ್ಲಿ ಚೇತನ್ ಶರ್ಮಾ, ‘ಅನೇಕ ಆಟಗಾರರು ಫಿಟ್ ಆಗಿರಲು ಇಂಜೆಕ್ಷನ್ ತೆಗೆದುಕೊಳ್ಳುತ್ತಾರೆ, ಆದರೆ ಅವರು ನೋವು ನಿವಾರಕಗಳನ್ನು ತೆಗೆದುಕೊಳ್ಳುವುದಿಲ್ಲ ಎಂದು ಹೇಳಿದ್ದಾರೆ. ಇದರಿಂದಾಗಿ ಡೋಪ್ ಪರೀಕ್ಷೆಯಲ್ಲಿಯೂ ಸಿಕ್ಕಿಕೊಳ್ಳುವುದಿಲ್ಲ ಎಂದಿದ್ದಾರೆ.

ಡೋಪಿಂಗ್​ ವಿಷಯದಲ್ಲಿ ಬಿಸಿಸಿಐ ಯಾವಾಗಲೂ ಕಟ್ಟುನಿಟ್ಟಾಗಿದೆ. ಇದರಿಂದಾಗಿ 2007ರಲ್ಲಿ ಟಿ20 ವಿಶ್ವಕಪ್ ಗೆದ್ದ ತಂಡದ ಸದಸ್ಯರಾಗಿದ್ದ ಯೂಸುಫ್ ಪಠಾಣ್ ಅವರಿಂದ ಹಿಡಿದು ನಾಯಕನಾಗಿ 19 ವರ್ಷದೊಳಗಿನವರ ವಿಶ್ವಕಪ್ ಪ್ರಶಸ್ತಿ ಗೆದ್ದಿದ್ದ ಪೃಥ್ವಿ ಶಾ ಅವರವರೆಗೆ ಈ ವಿಚಾರದಲ್ಲಿ ಸಮಸ್ಯೆಗೆ ಒಳಗಾಗಿದ್ದರು.

2018 ರಲ್ಲಿ, ಡೋಪಿಂಗ್​ ಪರೀಕ್ಷೆಯಲ್ಲಿ ವಿಫಲವಾದ ಕಾರಣ ಯೂಸುಫ್ ಪಠಾಣ್ ಅವರನ್ನು ಮಂಡಳಿಯು 5 ತಿಂಗಳ ಕಾಲ ನಿಷೇಧಿಸಿತ್ತು. ಆದರೂ ಉದ್ದೇಶಪೂರ್ವಕವಾಗಿ ತಾನು ಮಾಡಿಲ್ಲ ಎಂದು ಪಠಾಣ್ ಹೇಳಿದ್ದರು. ಗಂಟಲಿನ ಸೋಂಕಿಗೆ ಅವರು ಸೇವಿಸಿದ್ದ ಔಷಧದಲ್ಲಿ ನಿಷೇಧಿತ ವಸ್ತುವಿತ್ತು. ನನಗೆ ಇದರ ಅರಿವಿರಲಿಲ್ಲ. ಕಾರ್ಯಕ್ಷಮತೆಯನ್ನು ಹೆಚ್ಚಿಸಲು ನಾನು ಅದನ್ನು ಬಳಸಲಿಲ್ಲ ಎಂದು ಹೇಳಿದ್ದರು.

ಪೃಥ್ವಿ ಶಾ 2019ರಲ್ಲಿ ಡೋಪಿಂಗ್‌ನಲ್ಲಿ ಸಿಕ್ಕಿಬಿದ್ದಿದ್ದರು. ಇದಾದ ಬಳಿಕ ಅವರನ್ನು 8 ತಿಂಗಳ ಕಾಲ ಅಮಾನತುಗೊಳಿಸಲಾಗಿತ್ತು. T20 ಮುಷ್ತಾಕ್ ಅಲಿ ಟ್ರೋಫಿಯ ಸಮಯದಲ್ಲಿ ಅವರ ಮಾದರಿಯನ್ನು ತೆಗೆದುಕೊಳ್ಳಲಾಗಿತ್ತು. ಬಳಿಕ ವರದಿ ಪಾಸಿಟಿವ್​ ಬಂದಿತ್ತು. ನಂತರ ತಾನು ಕೆಮ್ಮು ಸಿರಪ್ ತೆಗೆದುಕೊಂಡಿದ್ದೇನೆ, ಉದ್ದೇಶಪೂರ್ವಕವಾಗಿ ಮಾಡಿಲ್ಲ ಎಂದು ಹೇಳಿದ್ದರು.

ಎಡಗೈ ವೇಗದ ಬೌಲರ್ ಪ್ರದೀಪ್ ಸಾಂಗ್ವಾನ್ ಕೂಡ ಡೋಪ್ ಪರೀಕ್ಷೆಯಲ್ಲಿ ಸಿಕ್ಕಿಬಿದ್ದಿದ್ದರು. ಐಪಿಎಲ್ 2013ರಲ್ಲಿ ನಿಷೇಧಿತ ಮದ್ದು ಸೇವಿಸಿದ ಆರೋಪದಲ್ಲಿ ದೆಹಲಿ ಬೌಲರ್ ಸಾಂಗ್ವಾನ್ ತಪ್ಪಿತಸ್ಥರು ಎಂದು ಹೇಳಲಾಗಿತ್ತು. ಇದಾದ ಬಳಿಕ ಬಿಸಿಸಿಐ ಅವರಿಗೆ 18 ತಿಂಗಳ ನಿಷೇಧ ಹೇರಿತ್ತು. ಆದರೆ, ಇದಾದ ಬಳಿಕ ಮತ್ತೆ ಕ್ರಿಕೆಟ್​ಗೆ ಮರಳಿದರು. 2008ರಲ್ಲಿ ಅಂಡರ್-19 ವಿಶ್ವಕಪ್‌ನಲ್ಲಿ ಉತ್ತಮ ಪ್ರದರ್ಶನ ನೀಡುವ ಮೂಲಕ ಗಮನ ಸೆಳೆದಿದ್ದರು.

ಜಗತ್ತಿನ ಇತರ ಕ್ರಿಕೆಟಿಗರೂ ಡೋಪಿಂಗ್ ನಲ್ಲಿ ಸಿಕ್ಕಿಬಿದ್ದಿದ್ದರು. ಇದರಲ್ಲಿ ಆಸ್ಟ್ರೇಲಿಯಾದ ದಿಗ್ಗಜ ಕ್ರಿಕೆಟಿಗ ಶೇನ್ ವಾರ್ನ್‌ನಿಂದ ಪಾಕಿಸ್ತಾನದ ವೇಗದ ಬೌಲರ್ ಶೋಯೆಬ್ ಅಖ್ತರ್ ವರೆಗೆ ಈ ಪ್ರಕರಣದಲ್ಲಿ ಸಿಲುಕಿಕೊಂಡಿದ್ದರು. ನ್ಯೂಜಿಲೆಂಡ್‌ನ ಮಾಜಿ ನಾಯಕ ಸ್ಟೀಫನ್ ಫ್ಲೆಮಿಂಗ್ ಕೂಡ ಅಮಾನತುಗೊಂಡಿದ್ದರು.