Rinku Singh: ತುತ್ತು ಅನ್ನಕ್ಕೂ ತತ್ವಾರ, ಕಸ ಗುಡಿಸುವ ಕೆಲಸ ಮಾಡಿ ಮನೆ ಕಷ್ಟಕ್ಕೆ ನೆರವಾಗ್ತಿದ್ದ ಬಾಲಕ! ಇದು ಐಪಿಎಲ್ ಹೀರೋ ರಿಂಕು ಸಿಂಗ್ ಜೀವನದ ಕಥೆ

ಆಂಡ್ರೆ ರಸೆಲ್ 1 ರನ್​ಗೆ ಔಟ್, ರಶೀದ್ ಖಾನ್ ಹ್ಯಾಟ್ರಿಕ್ ಕೊನೆಯ ಓವರ್ ನಲ್ಲಿ ಗೆಲುವಿಗೆ 29 ರನ್ ಬೇಕಿತ್ತು. ರಿಂಕು ಸಿಂಗ್ ಮತ್ತು ಉಮೇಶ್ ಯಾದವ್ ಕ್ರೀಸ್‌ನಲ್ಲಿದ್ದರು. ಆದರೆ ಇಲ್ಲಿ ರಿಂಕು ಸಿಂಗ್ ಬ್ಯಾಟಿಂಗ್​ ಇದೀಗ ಎಲ್ಲಡೆ ಸಖತ್​ ಸದ್ದು ಮಾಡುತ್ತಿದೆ.

ಕೊನೆಯ ಓವರ್ ನಲ್ಲಿ ಯಶ್ ದಯಾಲ್​ ಬೌಲಿಂಗ್​ ಮಾಡಿದರು. ಉಮೇಶ್ ಯಾದವ್ ಮೊದಲ ಎಸೆತದಲ್ಲಿ ಸಿಂಗಲ್ ರನ್ ಗಳಿಸಿ ರಿಂಕು ಸಿಂಗ್ ಗೆ ಸ್ಟ್ರೈಕ್ ನೀಡಿದರು. ರಿಂಕು ಸಿಂಗ್ ಮುಂದಿನ ಐದು ಎಸೆತಗಳಲ್ಲಿ 6, 6, 6, 6, 6 ರನ್ ಗಳಿಸಿದರು. ಸೋಲುತ್ತಿದ್ದ ಪಂದ್ಯದಲ್ಲಿ ಕೆಕೆಆರ್ ಭರ್ಜರಿ ಗೆಲುವು ಸಾಧಿಸಿತ್ತು. ಅಲ್ಲಿಯವರೆಗೂ ಗೆಲುವಿನ ವಿಶ್ವಾಸದಲ್ಲಿದ್ದ ಗುಜರಾತ್ ಟೈಟಾನ್ಸ್ ಏಕಾಏಕಿ ಸೋತಿತು. ರಿಂಕು ಸಿಂಗ್ 21 ಎಸೆತಗಳಲ್ಲಿ ಔಟಾಗದೆ 48 ರನ್ ಗಳಿಸಿ ಕೆಕೆಆರ್ ಗೆ ಸೂಪರ್ ಗೆಲುವು ತಂದುಕೊಟ್ಟರು.

24 ವರ್ಷದ ರಿಂಕು ಸಿಂಗ್ ಉತ್ತರ ಪ್ರದೇಶದ ಬಡ ಕುಟುಂಬದಲ್ಲಿ ಜನಿಸಿದರು. ತಂದೆ ಅಲಿಘರ್‌ನಲ್ಲಿ ಗ್ಯಾಸ್ ಸಿಲಿಂಡರ್‌ಗಳನ್ನು ಮನೆ ಮನೆಗೆ ತಲುಪಿಸುವ ಮೂಲಕ ಕುಟುಂಬವನ್ನು ಬೆಂಬಲಿಸುತ್ತಿದ್ದರು. ರಿಂಕುಗೆ ಒಬ್ಬ ಸಹೋದರ ಮತ್ತು ಸಹೋದರಿ ಇದ್ದಾರೆ. ಹಣಕಾಸಿನ ತೊಂದರೆಯಿಂದಾಗಿ ರಿಂಕು ಸಿಂಗ್ 9ನೇ ತರಗತಿಯಲ್ಲಿ ಓದುವುದನ್ನು ನಿಲ್ಲಿಸಿದ್ದರು.

ತಂದೆಗೆ ಆಸರೆಯಾಗಲು ಕೆಲವು ದಿನ ಕಸ ಗುಡಿಸುವ ಕೆಲಸ ಮಾಡಿದರು. ಅದೇ ವೇಳೆ ಆಟೊ ಓಡಿಸಿದರು. ರಿಂಕುವಿನ 9 ಮಂದಿಯ ಕುಟುಂಬವು ಅಲಿಘರ್‌ನಲ್ಲಿ ಎರಡು ಕೋಣೆಗಳ ಕೋಣೆಯಲ್ಲಿ ವಾಸಿಸುತ್ತಿದ್ದರು.

2018ರ ಐಪಿಎಲ್ ಹರಾಜಿನಲ್ಲಿ ರಿಂಕು ಸಿಂಗ್ ರೂ. 80 ಲಕ್ಷಕ್ಕೆ ಕೋಲ್ಕತ್ತಾ ನೈಟ್ ರೈಡರ್ಸ್ ಖರೀದಿಸಿದೆ. ಐಪಿಎಲ್ ಒಪ್ಪಂದ ರಿಂಕುವಿನ ಬದುಕನ್ನೇ ಬದಲಿಸಿತು. ಆದರೆ, 2018ರಿಂದ 2021ರ ನಡುವೆ ಕೋಲ್ಕತ್ತಾ ಪರ ಆಡಿದ ರಿಂಕುಗೆ ಹೆಚ್ಚು ರನ್ ಗಳಿಸಲು ಸಾಧ್ಯವಾಗಿರಲಿಲ್ಲ.

ಆದರೆ, ಅವರ ಮೇಲಿನ ನಂಬಿಕೆಯಿಂದ 2022ರ ಮೆಗಾ ಹರಾಜಿನಲ್ಲಿ ಕೆಕೆಆರ್ ರೂ. 55 ಲಕ್ಷ ಕೊಟ್ಟು ಮತ್ತೆ ರಿಂಕು ಖರೀದಿಸಿದ್ದಾರೆ. ಆದರೆ ಆರಂಭದಲ್ಲಿ ಬೆಂಚ್‌ಗೆ ಸೀಮಿತವಾಗಿದ್ದ ರಿಂಕು ಸಿಂಗ್ 2022ರಲ್ಲಿ ಸಿಕ್ಕ ಅವಕಾಶಗಳನ್ನು ಸರಿಯಾಗಿ ಬಳಸಿಕೊಂಡಿದ್ದಾರೆ.

ಕಳೆದ ವರ್ಷ ರಾಜಸ್ಥಾನ ವಿರುದ್ಧದ ಪಂದ್ಯದೊಂದಿಗೆ ರಿಂಕು ಸಿಂಗ್ ಜಾತಕವೇ ಬದಲಾಯಿತು. ಆ ಪಂದ್ಯದಲ್ಲಿ ರಿಂಕು ಸಿಂಗ್ 23 ಎಸೆತಗಳಲ್ಲಿ 42 ರನ್ ಗಳಿಸಿ ಅಜೇಯರಾಗಿ ಉಳಿದು ತಂಡಕ್ಕೆ ಜಯ ತಂದುಕೊಟ್ಟರು. ‘ಪಂದ್ಯದ ಆಟಗಾರ’ ಪ್ರಶಸ್ತಿಯನ್ನೂ ಪಡೆದರು.