Rohit Sharma: ಬ್ಯಾಟ್ ಖರೀದಿಸಲು ಹಣವಿಲ್ಲದೇ ಹಾಲು ಮಾರುತ್ತಿದ್ರಂತೆ ರೋಹಿತ್ ಶರ್ಮಾ! ಇದು ಹಿಟ್‌ ಮ್ಯಾನ್ ಬದುಕಿನ ರೋಚಕ ಕಹಾನಿ

ಕ್ರಿಕೆಟ್‌ನಲ್ಲಿ ಸ್ಟಾರ್ ಎನಿಸಿಕೊಂಡವರಲ್ಲಿ ಅನೇಕರು ಕಠಿಣ ಪರಿಶ್ರಮದಿಂದ ತಂಡದಲ್ಲಿ ಸ್ಥಾನ ಗಳಿಸಿದ್ದಾರೆ. ಧೋನಿ, ಕೊಹ್ಲಿ, ರೋಹಿತ್, ಶಮಿ ಹೀಗೆ ಅನೇಕರು ಮಧ್ಯಮ ವರ್ಗದ ಕಷ್ಟಗಳನ್ನು ಅನುಭವಿಸಿದವರು. ಈಗ ಟೀಂ ಇಂಡಿಯಾದ ಸ್ಟಾರ್ ಆಟಗಾರರಾಗಿದ್ದಾರೆ.

ಹಿಟ್​ಮ್ಯಾನ್ 30 ಏಪ್ರಿಲ್ 1987ರಂದು ಮಹಾರಾಷ್ಟ್ರದ ನಾಗ್ಪುರದ ಬನ್ಸೋಡ್ನಲ್ಲಿ ಜನಿಸಿದರು. ಅಮ್ಮ ಪೂರ್ಣಿಮಾ ಶರ್ಮಾ ವಿಶಾಖಪಟ್ಟಣದವರು. ಅವರ ತಂದೆ ಗುರುನಾಥ ಶರ್ಮಾ ಅವರು ಸಾರಿಗೆ ಸಂಸ್ಥೆಯ ಸ್ಟೋರ್ ಹೌಸ್‌ನಲ್ಲಿ ಕೇರ್‌ಟೇಕರ್ ಆಗಿ ಕೆಲಸ ಮಾಡುತ್ತಿದ್ದರು. 1999ರಲ್ಲಿ ಚಿಕ್ಕಪ್ಪನಿಂದ ಹಣ ಪಡೆದು ಕ್ರಿಕೆಟ್ ಶಿಬಿರಕ್ಕೆ ಸೇರಿಕೊಂಡರು. ಆ ನಂತರ ಹಂತ ಹಂತವಾಗಿ ಮೇಲೇರಿದ ಅವರು ಇದೀಗ ಟೀಂ ಇಂಡಿಯಾ ನಾಯಕರಾಗಿದ್ದಾರೆ.

ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಪ್ರಸ್ತುತ ಪೀಳಿಗೆಯ ಶ್ರೇಷ್ಠ ಕ್ರಿಕೆಟಿಗರಲ್ಲಿ ಒಬ್ಬರು. ರೋಹಿತ್ ಏಕದಿನದಲ್ಲಿ ಮೂರು ದ್ವಿಶತಕ ಗಳಿಸಿದ ಏಕೈಕ ಆಟಗಾರ. ಇತ್ತೀಚಿನ ಟೀಂ ಇಂಡಿಯಾ ಕ್ರಿಕೆಟಿಗ ಪ್ರಗ್ಯಾನ್ ಓಜಾ ಅವರು ರೋಹಿತ್ ಜೊತೆಗಿನ ಸಂಬಂಧವನ್ನು ಹಂಚಿಕೊಂಡಿದ್ದಾರೆ.

ರೋಹಿತ್ ಬಾಲ್ಯದಲ್ಲಿ ಕ್ರಿಕೆಟ್ ಕಿಟ್ ಖರೀದಿಸಲು ಹಾಲಿನ ಪ್ಯಾಕೆಟ್‌ಗಳನ್ನು ಮನೆ ಮನೆಗೆ ತಲುಪಿಸುತ್ತಿದ್ದರು. 15 ವರ್ಷದೊಳಗಿನವರ ರಾಷ್ಟ್ರೀಯ ಶಿಬಿರದಲ್ಲಿ ಮೊದಲ ಬಾರಿಗೆ ರೋಹಿತ್ ಅವರನ್ನು ಭೇಟಿಯಾಗಿದ್ದನ್ನು ಓಜಾ ನೆನಪಿಸಿಕೊಳ್ಳುತ್ತಾರೆ.

15 ವರ್ಷದೊಳಗಿನವರ ರಾಷ್ಟ್ರೀಯ ಶಿಬಿರದಲ್ಲಿ ನಾನು ರೋಹಿತ್ ಅವರನ್ನು ಮೊದಲು ಭೇಟಿಯಾದಾಗ, ಅವರು ವಿಶೇಷ ಆಟಗಾರ ಎಂದು ಎಲ್ಲರೂ ಹೇಳಿದರು. ನಂತರ ರೋಹಿತ್ ಗೆ ಎದುರಾಳಿಯಾಗಿ ಆಡುತ್ತಾ ನಾನು ಅವರ ವಿಕೆಟ್ ಪಡೆದೆ. ಮುಂಬೈನ ಟಿಪಿಕಲ್ ಹುಡುಗನಂತೆ ರೋಹಿತ್ ಹೆಚ್ಚು ಮಾತನಾಡುವುದಿಲ್ಲ. ಆದರೆ ಆಟದಲ್ಲಿ ಆಕ್ರಮಣಕಾರಿ. ನಮಗೆ ಒಬ್ಬರಿಗೊಬ್ಬರು ಪರಿಚಯವಿಲ್ಲದಿದ್ದರೂ ಅವರು ನನ್ನ ಕಡೆಗೆ ಆಕ್ರಮಣಕಾರಿಯಾಗಿ ಆಡಿದ್ದು ನನಗೆ ಆಶ್ಚರ್ಯವಾಯಿತು. ಆದರೆ ಆ ನಂತರ ನಮ್ಮ ಸ್ನೇಹ ಬೆಳೆಯಿತು ಎಂದು ಓಜಾ ಹೇಳಿದ್ದಾರೆ.

ರೋಹಿತ್ ಮಧ್ಯಮ ವರ್ಗದಿಂದ ಬಂದವರು. ಕ್ರಿಕೆಟ್ ಕಿಟ್​ ಖರೀದಿಸಲು ಹಣ ನೀಡುವ ಸ್ಥಿತಿಯಲ್ಲಿ ಇಲ್ಲದ ಕಾರಣ ಹಾಲಿನ ಪ್ಯಾಕೆಟ್‌ಗಳನ್ನು ಮಾರುತ್ತಿದ್ದರು. ಈಗ ಇವರನ್ನು ಕಂಡರೆ ತುಂಬಾ ಹೆಮ್ಮೆಯಾಗುತ್ತದೆ ಎಂದು ಹೇಳಿದ್ದಾರೆ.

ರೋಹಿತ್ ಮತ್ತು ಓಜಾ ಇಬ್ಬರೂ ಡೆಕ್ಕನ್ ಚಾರ್ಜರ್ಸ್ ಮತ್ತು ಮುಂಬೈ ಇಂಡಿಯನ್ಸ್‌ಗಾಗಿ ಐಪಿಎಲ್‌ನಲ್ಲಿ ಒಟ್ಟಿಗೆ ಆಡಿದ್ದರು. ಟೀಂ ಇಂಡಿಯಾ ಪರ 24 ಪಂದ್ಯಗಳಲ್ಲಿ ಇಬ್ಬರೂ ಒಟ್ಟಿಗೆ ಆಡಿದ್ದಾರೆ. ಈಗಲೂ ಮುಂಬೈ ಇಂಡಿಯನ್ಸ್ ತಂಡದ ನಾಯಕರಾಗಿ ಸೇವೆ ಸಲ್ಲಿಸುತ್ತಿರುವ ರೋಹಿತ್ ಐಪಿಎಲ್ ನ ಯಶಸ್ವಿ ನಾಯಕರಲ್ಲಿ ಒಬ್ಬರಾಗಿ ಗುರುತಿಸಿಕೊಂಡಿದ್ದಾರೆ.

ರೋಹಿತ್ ಶರ್ಮಾ ತಮ್ಮ ವೃತ್ತಿಜೀವನವನ್ನು ಆಫ್ ಸ್ಪಿನ್ನರ್ ಆಗಿ ಪ್ರಾರಂಭಿಸಿದರು. ಬಾಲ್ಯದ ಕೋಚ್ ಲಾಡ್ ರೋಹಿತ್ ಶರ್ಮಾ ಅವರ ಬ್ಯಾಟಿಂಗ್ ಸಾಮರ್ಥ್ಯವನ್ನು ಗಮನಿಸಿ ಎಂಟನೇ ಸ್ಥಾನದಿಂದ ಇನಿಂಗ್ಸ್ ಆರಂಭಿಸಲು ಹೇಳಿದರು. ಆರಂಭಿಕರಾಗಿ ಚೊಚ್ಚಲ ಪಂದ್ಯದಲ್ಲೇ ಶತಕ ಬಾರಿಸಿದ್ದರು. ಹ್ಯಾರಿಸ್ ಗಿಲ್ಲೆಸ್ ಶೀಲ್ಡ್ ಶಾಲೆಯ ಕ್ರಿಕೆಟ್ ಪಂದ್ಯಾವಳಿಗಳಲ್ಲಿ ಮಿಂಚಿದ್ದರು. ಅದರ ನಂತರ, ಅವರು ಟೀಂ ಇಂಡಿಯಾದಲ್ಲಿ ತಮ್ಮ ಪ್ರಥಮ ದರ್ಜೆ ವೃತ್ತಿಜೀವನವನ್ನು ಆರಂಭಿಸಿದರು.

ರೋಹಿತ್ ಶರ್ಮಾ 2007ರ ಟಿ 20 ವಿಶ್ವಕಪ್ ನಲ್ಲಿ ದಕ್ಷಿಣ ಆಫ್ರಿಕಾ ಪರ 50 ರನ್ ಗಳಿಸುವ ಮೂಲಕ ಟೀಂ ಇಂಡಿಯಾ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಇದೀಗ ಈ ಸ್ಟಾರ್​ ಪ್ಲೇಯರ್​ ಭಾರತ ತಂಡದ ನಾಯಕರಾಗಿ ಯಶಸ್ವಿಯಾಗುತ್ತಿದ್ದಾರೆ.

ಮಹೇಂದ್ರ ಸಿಂಗ್ ಧೋನಿ ಅದುವರೆಗೆ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್‌ಮನ್ ಆಗಿ ಮಾತ್ರ ಆಡಿದ್ದ ರೋಹಿತ್ ಶರ್ಮಾ ಅವರ ಪ್ರತಿಭೆಯನ್ನು ಕಂಡು ಆರಂಭಿಕರಾಗಿ ಬಡ್ತಿ ನೀಡಿದರು. 2013ರ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಆರಂಭಿಕರಾಗಿ ಬಡ್ತಿ ಪಡೆದ ನಂತರ ರೋಹಿತ್ ಹಿಂತಿರುಗಿ ನೋಡಲೇ ಇಲ್ಲ. ಅವರು ಭಾರತೀಯ ಕ್ರಿಕೆಟ್ ತಂಡದ ಪ್ರಮುಖ ಆಟಗಾರರಾದರು.