IPL 2023: RCB ಪಂದ್ಯದ ಟಿಕೆಟ್​ ಬುಕಿಂಗ್​ ಓಪನ್​, ಖಾಲಿಯಾಗುವ ಮೊದಲು ಹೀಗೆ ಬುಕ್​ ಮಾಡ್ಕೊಳಿ

ಇದೇ ತಿಂಗಳ ಅಂತ್ಯದಿಂದ ಐಪಿಎಲ್ 2023 16ನೇ ಸೀಸನ್​ ಆರಂಭವಾಗಲಿದೆ. ಈಗಾಗಲೇ ಎಲ್ಲಾ ತಂಡಗಳು ಮೆಗಾ ಟೂರ್ನಿಗಾಗಿ ಭರ್ಜರಿ ಸಿದ್ಧತೆ ನಡೆಸುತ್ತಿದೆ. ಅದರ ಭಾಗವಾಗಿ ಆರ್​ಸಿಬಿ ತಂಡವೂ ಸಹ ಈಗಾಗಲೇ ಈ ಮೆಗಾ ಟೂರ್ನಿಗೆ ಭರದ ಸಿದ್ಧತೆ ನಡೆಸುತ್ತಿದ್ದು, ಮೊದಲ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ತಂಡವನ್ನು ಎದುರಿಸಲಿದೆ.

ಈ ಬಾರಿ ಫಾಫ್ ಡುಪ್ಲೆಸಿಸ್ ನಾಯಕತ್ವದ ಬೆಂಗಳೂರು ತಂಡ ಏಪ್ರಿಲ್ 2 ರಂದು ತನ್ನ ಮೊದಲ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ಸೆಣಸಾಡಲಿದೆ. ಇದೀಗ ಈ ಪಂದ್ಯದ ಟಿಕೆಟ್ ಖರೀದಿಗೆ ಅವಕಾಶ ನೀಡಲಾಗಿದ್ದು, ಬುಕಿಂಗ್​ ಓಪನ್​ ಆಗಿದೆ.

ಇಂದಿನಿಂದ ಆರ್​ಸಿಬಿಯ ಅಧಿಕೃತ ವೆಬ್​ಸೈಟ್​ನಲ್ಲಿ ಟಿಕೆಟ್ ಮಾರಾಟ ಆರಂಭವಾಗಿದೆ. ಆರಂಭಿಕ ಬೆಲೆ 2,310 ರೂ ಆಗಿದೆ. ಆದರೆ ಅಂತಿಮವಾಗಿ ಟಿಕೆಟ್​ ಬೆಲೆ ಬರೋಬ್ಬರಿ 42,000 ರೂ. ವರೆಗಿನ ಲಭ್ಯವಿದೆ. ಈಗಾಗಲೇ ಬಹುತೇಕ ಟಿಕೆಟ್ ಸೋಲ್ಡ್ ಔಟ್ ಆಗಿದ್ದು ಕೂಡಲೇ ಬುಕ್ ಮಾಡಿದರೆ ಮಾತ್ರ ನಿಮಗೂ ಸಿಗಲಿದೆ.

ಇನ್ನು, ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನದಲ್ಲಿ ನಡೆಯಲಿರುವ ಎಲ್ಲಾ ಪಂದ್ಯದ ಟಿಕೆಟ್ ಬುಕ್ ಮಾಡಲು ಆರ್​ಸಿಬಿಯ ಅಧಿಕೃತ ವೆಬ್​ಸೈಟ್​ನಲ್ಲಿ ಅವಕಾಶ ನೀಡಲಾಗಿದೆ. ಆರ್​ಸಿಬಿ vs ಮುಂಬೈ ಟಿಕೆಟ್ ಬೆಲೆ ನೋಡುವುದಾದರೆ, ಆರಂಭಿಕ ಬೆಲೆ 2310 ರೂ ಇಂದ ಆರಂಭವಾಗಲಿದ್ದು, ಕ್ರಮವಾಗಿ 3300, 4840, 6049, 9075, 10890, 24200 ಮತ್ತು 42350ರೂ ಇರಲಿದೆ.

ಇದರ ನಡುವೆ, ಕಳೆದ ಎಲ್ಲ ಸೀಸನ್ ಗಳ ರೀತಿಯಲ್ಲಿ ಈ ಬಾರಿಯೂ ಆರ್​ಸಿಬಿ ತನ್ನ ಅಭಿಮಾನಿಗಳಿಗೆ ಸರ್ಪ್ರೈಸ್ ನೀಡಲು ಮುಂದಾಗಿದೆ. ಇದರ ಭಾಗವಾಗಿ ಆರ್​ಸಿಬಿ ಪ್ರಾಂಚೈಸಿ ಮಾರ್ಚ್ 25 ರಂದು ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನದಲ್ಲಿ ಅದ್ದೂರಿ ಕಾರ್ಯಕ್ರಮ ಹಮ್ಮಿಕೊಂಡಿದೆ.

ಹೌದು, ಆರ್​ಸಿಬಿ ಪ್ರತಿ ವರ್ಷದಂತೆಯೇ ‘ಆರ್​ಸಿಬಿ ಅನ್​ ಬಾಕ್ಸಿಂಗ್​ ಇವೆಂಟ್‘​ ಅನ್ನು ಇದೇ ಮಾರ್ಚ್ 25ರಂದು ಚಿನ್ನಸ್ವಾಮಿ ಮೈದಾನದಲ್ಲಿ ಏರ್ಪಡಿಸಿದೆ. 2019ರ ಬಳಿಕ ಈ ವರ್ಷ ಮತ್ತೆ ಎಲ್ಲಾ ತಂಡಗಳು ತಮ್ಮ ತವರಿನಲ್ಲಿ ಪಂದ್ಯವಾಡಲಿದ್ದು, ಇದರ ಕ್ರೇಜ್​ ಹೆಚ್ಚಿಸಲು ಆರ್​ಸಿಬಿ ಸಿದ್ಧವಾಗುತ್ತಿದೆ.

ಬೆಂಗಳೂರು ತಂಡ: ಫಾಫ್ ಡು ಪ್ಲೆಸಿಸ್ (ಸಿ), ಫಿನ್ ಅಲೆನ್, ವಿರಾಟ್ ಕೊಹ್ಲಿ, ರಜತ್ ಪಾಟಿದಾರ್, ಸುಯಶ್ ಪ್ರಭುದೇಸಾಯಿ, ವಿಲ್ ಜ್ಯಾಕ್ಸ್, ಅನುಜ್ ರಾವತ್, ದಿನೇಶ್ ಕಾರ್ತಿಕ್, ವನಿಂದು ಹಸರಂಗ, ಮಹಿಪಾಲ್ ಲೊಮ್ರೋರ್, ಗ್ಲೆನ್ ಮ್ಯಾಕ್ಸ್‌ವೆಲ್, ಶಹಬಾಜ್ ಅಹ್ಮದ್, ಸೋನು ಯಾದವ್.

ಮನೋಜ್ ಭಾಂಡಗೆ, ಆಕಾಶ್ ಭಾಂಡಗೆ, ಜೋ ಹ್ಯಾಜಲ್‌ವುಡ್, ಸಿದ್ದಾರ್ಥ್ ಕೌಲ್, ಮೊಹಮ್ಮದ್ ಸಿರಾಜ್, ಹರ್ಷಲ್ ಪಟೇಲ್, ಕರ್ಣ್ ಶರ್ಮಾ, ಡೇವಿಡ್ ವಿಲ್ಲಿ (ಇಎನ್‌ಜಿ), ಅವಿನಾಶ್ ಸಿಂಗ್, ರಾಜನ್ ಕುಮಾರ್, ರೀಸ್ ಟೋಪ್ಲಿ, ಹಿಮಾಂಶು ಶರ್ಮಾ.