RCB vs MI, IPL 2023: ಆರ್​ಸಿಬಿ ತಂಡಕ್ಕೆ ವಾಂಖೆಡೆ ಮೈದಾನದ್ದೇ ಟೆನ್ಶನ್​, 8 ವರ್ಷದ ಬಳಿಕ ಇಲ್ಲಿ ಒಲಿಯುತ್ತಾಳಾ ವಿಜಯಲಕ್ಷ್ಮಿ!

ಐಪಿಎಲ್​ (IPL 2023) 2023ರ 54ನೇ ಪಂದ್ಯದಲ್ಲಿ ಆರ್​ಸಿಬಿ ಮತ್ತು ಮುಂಬೈ ಇಂಡಿಯನ್ಸ್ ತಂಡಗಳು ಸೆಣಸಲಿದೆ. ಈ ಪಂದ್ಯವು ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆಯಲಿದೆ.

ಆದರೆ, ಆರ್​ಸಿಬಿ ತಂಡಕ್ಕೆ ಇದೀಗ ಹೊಸ ಟೆನ್ಷನ್​ ಶುರುವಾಗಿದೆ. ಅದೂ ಸಹ ವಾಂಖೆಡೆ ಸ್ಟೇಡಿಯಂನಲ್ಲಿ ಆರ್​ಸಿಬಿ ಪ್ರದರ್ಶನ ಈ ಚಿಂತೆಗೆ ಕಾರಣವಾಗಿದೆ.

ಹೌದು, ಆರ್​ಸಿಬಿ ತಂಡ ಮುಂಬೈ ಎದುರು ವಾಂಖೆಡೆ ಮೈದಾನದಲ್ಲಿ ಕಳೆದ 8 ವರ್ಷಗಳಿಂದ ಗೆದ್ದಿಲ್ಲ. ವಾಂಖೆಡೆ ಮೈದಾನದಲ್ಲಿ ಮುಂಬೈ ವಿರುದ್ಧ ಆರ್​ಸಿಬಿ ತಂಡ ಕೊನೆಯದಾಗಿ 2015ರಲ್ಲಿ ಗೆಲುವು ಕಂಡಿತ್ತು. ಬಳಿಕ ಒಂದೇ ಒಂದು ಪಂದ್ಯ ಗೆದ್ದಿಲ್ಲ.

ಮೇ 10, 2015ರಲ್ಲಿ ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆದ ಮುಂಬೈ ವಿರುದ್ಧದ ಪಂದ್ಯದಲ್ಲಿ ಆರ್​ಸಿಬಿ ತಂಡ 235 ರನ್​ ಗಳಿಸತು. ಈ ಮೊತ್ತ ಬೆನ್ನಟ್ಟಿದ ಮುಂಬೈ ಅಂತಿಮವಾಗಿ 39 ರನ್​ಗಳಿಂದ ಸೋಲನ್ನಪ್ಪಿತ್ತು.

ಈ ಗೆಲುವಿನ ಬಳಿಕ ಆರ್​ಸಿಬಿ ತಂಡ ಮುಂಬೈ ವಿರುದ್ಧ ವಾಂಖೆಡೆಯಲ್ಲಿ ಈವರೆಗೂ ಗೆಲುವು ಕಂಡಿಲ್ಲ. ಇಂದಿನ ಪಂದ್ಯದಲ್ಲಿ ಆರ್​ಸಿಬಿ ಗೆಲುವು ಕಾಣುವ ಮೂಲಕ 8 ವರ್ಷಗಳ ಕಾಯುವಿಕೆಗೆ ಅಂತ್ಯ ಹಾಡುತ್ತಾ ಕಾದುನೋಡಬೇಕಿದೆ.

ಈವರೆಗೆ ಆರ್​ಸಿಬಿ ಮತ್ತು ಮುಂಬೈ ತಂಡಗಳು ವಾಂಖೆಡೆ ಮೈದಾನದಲ್ಲಿ 9 ಬಾರಿ ಮುಖಾಮುಖಿ ಆಗಿದೆ. ಇದರಲ್ಲಿ ಆರ್​ಸಿಬಿ ಕೇವಲ 3 ಬಾರಿ ಗೆದ್ದರೆ, ಉಳಿದ 6 ಬಾರಿ ಮುಂಬೈ ತಂಡ ಗೆಲುವು ಕಂಡಿದೆ.

ಪಿಚ್​ ವರದಿ: ಮುಂಬೈನ ವಾಂಖೆಡೆ ಸ್ಟೇಡಿಯಂ ಕಳೆದ ಮೂರು ವರ್ಷಗಳಲ್ಲಿ 46 T20 ಪಂದ್ಯಗಳಿಗೆ ವೇದಿಕೆಯಾಗಿದೆ, ಅಲ್ಲಿ ಸರಾಸರಿ ಮೊದಲ ಇನ್ನಿಂಗ್ಸ್ ಸ್ಕೋರ್ 170 ಕ್ಕಿಂತ ಹೆಚ್ಚು ರನ್ ಆಗಿದೆ. ಮೊದಲು ಬ್ಯಾಟಿಂಗ್ ಮಾಡಿದ ತಂಡವು ಇಲ್ಲಿ ಕೇವಲ 33% ಪಂದ್ಯಗಳನ್ನು ಗೆದ್ದಿದೆ. ಹೀಗಾಗಿ ಇಂದು ಟಾಸ್ ಗೆದ್ದ ತಂಡ ಬೌಲಿಂಗ್ ಆಯ್ಕೆ ಮಾಡಬಹುದು.