Virat Kohli vs Avesh Khan: ಕೊತ ಕೊತ ಕುದಿಯುತ್ತಿರೋ ಕೊಹ್ಲಿ ಕೋಪ, ಇಂದು ಆವೇಶ್​ ಖಾನ್​ಗೆ ಕಾದಿದೆ ಮಾರಿಹಬ್ಬ!

RCB vs LSG: ಆರ್​ಸಿಬಿ ಅಂದ್ರೆ ಕೇವಲ ಐಪಿಎಲ್​ನ ಕ್ರಿಕೆಟ್​ ತಂಡ ಅಲ್ಲ, ಕನ್ನಡಿಗ ಉಸಿರು ಅಂದರೂ ತಪ್ಪಾಗಲ್ಲ. ಯಾಕಂದ್ರೆ ಆರ್​ಸಿಬಿ ತಂಡವನ್ನು 16 ವರ್ಷಗಳಿಂದ ಹೇಗೆ ಪ್ರೀತಿಸಿಕೊಂಡು, ಸಪೋರ್ಟ ಮಾಡುತ್ತಾ ಬಂದಿದ್ದೀವಿ ಅಂತ ಎಲ್ಲರಿಗೂ ಗೊತ್ತಿದೆ.

ಕಪ್​ ಗೆಲ್ಲದಿದ್ದರೂ ಆರ್​ಸಿಬಿ ಕೈ ಬಿಟ್ಟಿಲ್ಲ ಅಭಿಮಾನಿಗಳು. ಅದು ನಮ್ಮ ಕನ್ನಡಿಗರು ಅಂದ್ರೆ. ಅದೆಷ್ಟೋ ಪಂದ್ಯಗಳನ್ನು ಆಡಿದೆ. ಗೆಲುವು-ಸೋಲು, ನೋವು-ನಲಿವು, ಕೋಪ-ತಾಪ ಎಲ್ಲವನ್ನೂ ಆರ್​ಸಿಬಿ ತಂಡದಲ್ಲಿ ನೋಡಿದ್ದೇವೆ.

ವಿರಾಟ್​ ಕೊಹ್ಲಿ ಅಬ್ಬರ ಯಾರಿಗೆ ತಾನೇ ಗೊತ್ತಿಲ್ಲ. ಕಳೆದ ಮೂರು ಪಂದ್ಯಗಳಿಂದ ಮತ್ತೆ ಅವರೇ ಆರ್​ಸಿಬಿ ತಂಡದ ನಾಯಕತ್ವ ಜವಾಬ್ದಾರಿ ಹೊತ್ತಿದ್ದಾರೆ. ಇಂದು ಆರ್​ಸಿಬಿ, ಎಲ್​ಎಸ್​ಜಿ ವಿರುದ್ಧ ಎರಡನೇ ಬಾರಿ ಮುಖಾಮುಖಿಯಾಗ್ತಿದೆ.

ಏಪ್ರಿಲ್​ 10 ರಂದು ಐಪಿಎಲ್​ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಲಖನೌ ಸೂಪರ್ ಜೇಂಟ್ಸ್ (RCB vs LSG) ನಡುವಣ ಪಂದ್ಯ ಕೊನೆಯ ಎಸೆತದ ವರೆಗೂ ನಡೆದು ಎಲ್​ಎಸ್​ಜಿ ರೋಚಕ ಜಯ ಸಾಧಿಸಿತು.

ಕಡೆಯ ಎಸೆತದಲ್ಲಿ ಒಂದು ರನ್​ ಬೇಕಿತ್ತು. ಎಲ್​ಎಸ್​ಜಿ ತಂಡದ ಕೊನೆಯ ಇಬ್ಬರು ಆಟಗಾರರು ಸ್ಕ್ರೀಜ್​ನಲ್ಲಿದ್ದರು. ಸ್ಟ್ರೈಕ್​ನಲ್ಲಿ ಆವೇಶ್ ಖಾನ್ ಇದ್ದರು. ಆದರೆ, ಚೆಂಡು ಆವೇಶ್ ಬ್ಯಾಟ್​ಗೆ ತಾಗದೆ ಕೀಪರ್ ಸೈರಿತು. ಕೀಪರ್ ದಿನೇಶ್ ಕಾರ್ತಿಕ್ ವಿಕೆಟ್​ಗೆಂದು ಎಸೆದರೂ ಅದು ಗುರಿ ತಪ್ಪಿತು. ಅತ್ತ ಆವೇಶ್ ಒಂದು ರನ್ ಕಲೆಹಾಕಿ ಲಖನೌ ಸೂಪರ್ ಜೇಂಟ್ಸ್ ರೋಚಕ ಜಯ ಸಾಧಿಸಿತ್ತು.

ಆವೇಶ್ ಖಾನ್ ನಾನ್​ಸ್ಟ್ರೈಕರ್ ಕಡೆ ಬಂದು ಒಂದು ರನ್ ಪೂರ್ಣಗೊಳಿಸಿದ ಸಂದರ್ಭ ವಿಶೇಷವಾಗಿ ಸಂಭ್ರಮಾಚರಣೆ ಮಾಡಿದ್ದರು. ತಾವು ಹಾಕಿಕೊಂಡಿದ್ದ ಹೆಲ್ಮೆಟ್ ಅನ್ನು ಕೈಯಿಂದ ತೆಗೆದು ಮೈದಾನದ ಕೆಳಕ್ಕೆ ಜೋರಾಗಿ ಎಸೆದಿದ್ದರು. ಇದು ಬಿಸಿಸಿಐ ನಿರ್ಮಿಸಿರುವ ಐಪಿಎಲ್​ನ ನೀತಿ ಸಂಹಿತೆಯ 2.2 ಹಂತ 1 ಅಪರಾಧವಾಗಿತ್ತು.

ಆಗ ವಿರಾಟ್​ ಕೊಹ್ಲಿ ಕೋಪ ಮಾಡಿಕೊಳ್ಳದೇ ಒಂದು ಖಡಕ್​ ಸ್ಮೈಲ್​ ಕೊಟ್ಟಿದ್ದರು. ಆ ಫೋಟೋ ಅಂದಿನಿಂದ ವೈರಲ್ ಆಗಿತ್ತು. ಕೋಪಿಷ್ಟ ಕೊಹ್ಲಿಯೇ ಸ್ಮೈಲ್ ಕೊಟ್ಟಿದ್ದಾರೆ ಅಂದ್ರೆ ಮುಂದಿನ ಪಂದ್ಯದಲ್ಲಿ ಆವೇಶ್​ ಖಾನ್​ಗೆ ಮಾರಿಹಬ್ಬ ಕಾದಿದೆ ಅಂತ ಅಭಿಮಾನಿಗಳು ಮಾತನಾಡಿಕೊಂಡಿದ್ರು.

ಇಂದು ಲಖನೌ-ಆರ್​ಸಿಬಿ ಮುಖಾಮುಖಿಯಾಗುತ್ತಿದ್ದು, ವಿರಾಟ್​ ಕೊಹ್ಲಿ ಆವೇಶ್​ ಖಾನ್​ಗೆ ಯಾವ ರೀತಿ ಟಾಂಗ್​ ಕೊಡ್ತಾರೆ ಅಂತ ಎಲ್ಲರೂ ಕಾತುರದಿಂದ ಕಾಯುತ್ತಿದ್ದರು. ಪಕ್ಕಾ ಕೊಹ್ಲಿ ಬ್ಯಾಟ್ ಮೂಲಕವೇ ಉತ್ತರಿಸುತ್ತಾರೆ ಅಂತ ಫ್ಯಾನ್​ ಹೇಳುತ್ತಿದ್ದಾರೆ.