LSG vs RCB: ಆರ್​ಸಿಬಿ ಪಂದ್ಯದ ವೇಳೆ ಗಾಯಗೊಂಡ ಕೆಎಲ್ ರಾಹುಲ್​, ಐಪಿಎಲ್​ನಿಂದ ಔಟ್​?

ಐಪಿಎಲ್ 2023ರ 43ನೇ ಪಂದ್ಯದಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ ತಂಡವು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವನ್ನು ಎದುರಿಸಿತು. ಈ ಪಂದ್ಯದಲ್ಲಿ ಲಕ್ನೋಗೆ ದೊಡ್ಡ ಆಘಾತ ಎದುರಾಗಿದೆ. ನಾಯಕ ಕೆಎಲ್​ ರಾಹುಲ್​ ಇಂಜುರಿಗೆ ತುತ್ತಾಗಿದ್ದಾರೆ.

ಹೌದು, ಮಾರ್ಕಸ್ ಸ್ಟೊಯಿನಿಸ್ ಎರಡನೇ ಓವರ್ ಬೌಲ್ ಮಾಡಿದರು. ಅವರ ಓವರ್‌ನ ಕೊನೆಯ ಎಸೆತದಲ್ಲಿ, ಫಾಫ್ ಡು ಪ್ಲೆಸಿಸ್ ಕವರ್‌ಗಳ ದಿಕ್ಕಿನಲ್ಲಿ ಶಾಟ್ ಬಾಲ್​ ಆಡಿದರು. ಚೆಂಡು ವೇಗವಾಗಿ ಬೌಂಡರಿಯತ್ತ ಸಾಗುತ್ತಿದ್ದು, ನಾಯಕ ಕೆಎಲ್ ರಾಹುಲ್ ತಡೆಯಲು ಪ್ರಯತ್ನಿಸಿದರು.

ಆದರೆ, ಚೆಂಡನ್ನು ತಲುಪುವ ಮೊದಲೇ ಅವರು ಸ್ನಾಯು ಸೆಳೆತಕ್ಕೆ ಒಳಗಾದರು. ಬಲಗಾಲಿನ ತೊಡೆಯ ಸ್ನಾಯುಗಳಲ್ಲಿ ಸೆಳೆತ ಇದ್ದಂತೆ ಕಾಣಿಸಿಕೊಂಡಿತು. ಚೆಂಡನ್ನು ಬೌಂಡರಿ ದಾಟದಂತೆ ರಕ್ಷಿಸುವ ಮುನ್ನವೇ ನೆಲದ ಮೇಲೆ ಬಿದ್ದು ನೋವಿನಿಂದ ನರಳಾಡಿದರು.

ಫಿಸಿಯೋ ಹಾಗೂ ಸಹ ಆಟಗಾರರು ತಕ್ಷಣ ಮೈದಾನ ಬಂದು ಕೆಎಲ್ ರಾಹುಲ್ ಅವರನ್ನು ಮೈದಾನದಿಂದ ಹೊರಗೆ ಕರೆದುಕೊಂಡು ಹೋದರು. ರಾಹುಲ್ ಅವರು ತೀವ್ರ ನೋವಿನಲ್ಲಿದ್ದಂತೆ ಕಂಡುಬರುತ್ತಿದೆ. ಅವರು ಬಹಳ ಹೊತ್ತು ನೆಲದ ಮೇಲೆ ಮಲಗಿದ್ದರು.

ಸ್ಟ್ಯಾಂಡ್‌ನಲ್ಲಿ ಕುಳಿತಿದ್ದ ಪತ್ನಿ ಅಥಿಯಾ ಶೆಟ್ಟಿ ತನ್ನ ಪತಿಗೆ ತೊಂದರೆ ನೀಡುವುದನ್ನು ಕಂಡು ಆತಂಕವಾದ ದೃಶ್ಯವೂ ಕಂಡುಬಂತು. ಇದಾದ ನಂತರ ಸಹ ಆಟಗಾರರು ಕೆಎಲ್ ರಾಹುಲ್ ಅವರನ್ನು ಎತ್ತಿಕೊಂಡು ಹೊರ ನಡೆದರು.

ಇದಾದ ಬಳಿಕ ಕೃನಾಲ್ ಪಾಂಡ್ಯ ತಂಡದ ಜವಾಬ್ದಾರಿ ವಹಿಸಿಕೊಂಡರು. ಭಾರತ ಮುಂದಿನ ತಿಂಗಳು ಆಸ್ಟ್ರೇಲಿಯಾ ವಿರುದ್ಧ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್‌ನಲ್ಲಿ ಆಡಬೇಕಾಗಿದ್ದು, ಕೆಎಲ್ ರಾಹುಲ್ ಅವರನ್ನು 15 ಸದಸ್ಯರ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ.

ರಿಷಭ್ ಪಂತ್ ಅನುಪಸ್ಥಿತಿಯಲ್ಲಿ, ಅವರು ವಿಕೆಟ್ ಕೀಪಿಂಗ್‌ಗೆ ಆಯ್ಕೆಯಾಗಿದ್ದಾರೆ. ಆದರೆ, ಅವರು ಗಾಯಗೊಂಡಿರುವುದು ಮತ್ತು ಗಾಯದ ವೇಳೆ ಅವರ ನೋವವನ್ನು ಅನುಭವಿಸಿದ್ದನ್ನು ನೋಡಿದರೆ ಈ ಬಾರಿ ಐಪಿಎಲ್​ನಿಂದ ಹೊರಗುಳಿಯುವ ಸಾಧ್ಯತೆ ದಟ್ಟವಾಗಿ ಕಂಡುಬರುತ್ತಿದೆ.

ಲಕ್ನೋ ಸೂಪರ್​ ಜೈಂಟ್ಸ್​ ಪ್ಲೇಯಿಂಗ್​ 11: ಕೆಎಲ್ ರಾಹುಲ್ (ನಾಯಕ), ಕೈಲ್ ಮೇಯರ್ಸ್, ದೀಪಕ್ ಹೂಡಾ, ಮಾರ್ಕಸ್ ಸ್ಟೊಯಿನಿಸ್, ಕೃನಾಲ್ ಪಾಂಡ್ಯ, ನಿಕೋಲಸ್ ಪೂರನ್ (WK), ಕೃಷ್ಣಪ್ಪ ಗೌತಮ್, ರವಿ ಬಿಷ್ಣೋಯ್, ನವೀನ್-ಉಲ್-ಹಕ್, ಅಮಿತ್ ಮಿಶ್ರಾ, ಯಶ್ ಠಾಕೂರ್.